១០. សាលមណ្ឌបិយត្ថេរអបទានំ

១៩០. ‘‘អជ្ឈោគាហេត្វា សាលវនំ, សុកតោ អស្សមោ មម;

សាលបុប្ផេហិ សញ្ឆន្នោ, វសាមិ វិបិនេ តទា.

១៩១. ‘‘បិយទស្សី ច ភគវា, សយម្ភូ អគ្គបុគ្គលោ;

វិវេកកាមោ សម្ពុទ្ធោ, សាលវនមុបាគមិ.

១៩២. ‘‘អស្សមា អភិនិក្ខម្ម, បវនំ អគមាសហំ;

មូលផលំ គវេសន្តោ, អាហិណ្ឌាមិ វនេ តទា.

១៩៣. ‘‘តត្ថទ្ទសាសិំ សម្ពុទ្ធំ, បិយទស្សិំ មហាយសំ;

សុនិសិន្នំ សមាបន្នំ, វិរោចន្តំ មហាវនេ.

១៩៤. ‘‘ចតុទណ្ឌេ ឋបេត្វាន, ពុទ្ធស្ស ឧបរី អហំ;

មណ្ឌបំ សុកតំ កត្វា, សាលបុប្ផេហិ ឆាទយិំ.

១៩៥. ‘‘សត្តាហំ ធារយិត្វាន, មណ្ឌបំ សាលឆាទិតំ;

តត្ថ ចិត្តំ បសាទេត្វា, ពុទ្ធសេដ្ឋមវន្ទហំ.

១៩៦. ‘‘ភគវា តម្ហិ សមយេ, វុដ្ឋហិត្វា សមាធិតោ;

យុគមត្តំ បេក្ខមានោ, និសីទិ បុរិសុត្តមោ.

១៩៧. ‘‘សាវកោ វរុណោ នាម, បិយទស្សិស្ស សត្ថុនោ;

វសីសតសហស្សេហិ, ឧបគច្ឆិ វិនាយកំ.

១៩៨. ‘‘បិយទស្សី ច ភគវា, លោកជេដ្ឋោ នរាសភោ;

ភិក្ខុសង្ឃេ និសីទិត្វា, សិតំ បាតុករី ជិនោ.

១៩៩. ‘‘អនុរុទ្ធោ ឧបដ្ឋាកោ, បិយទស្សិស្ស សត្ថុនោ;

ឯកំសំ ចីវរំ កត្វា, អបុច្ឆិត្ថ មហាមុនិំ.

២០០. ‘‘‘កោ នុ ខោ ភគវា ហេតុ, សិតកម្មស្ស សត្ថុនោ;

ការណេ វិជ្ជមានម្ហិ, សត្ថា បាតុករេ សិតំ’.

២០១. ‘‘‘សត្តាហំ សាលច្ឆទនំ [បុប្ផឆទនំ (សី. ស្យា. បី.)], យោ មេ ធារេសិ មាណវោ;

តស្ស កម្មំ សរិត្វាន, សិតំ បាតុករិំ អហំ.

២០២. ‘‘‘អនោកាសំ ន បស្សាមិ, យត្ថ [យំ តំ (ស្យា. បី. ក.)] បុញ្ញំ វិបច្ចតិ;

ទេវលោកេ មនុស្សេ វា, ឱកាសោវ ន សម្មតិ.

២០៣. ‘‘‘ទេវលោកេ វសន្តស្ស, បុញ្ញកម្មសមង្គិនោ;

យាវតា បរិសា តស្ស, សាលច្ឆន្នា ភវិស្សតិ.

២០៤. ‘‘‘តត្ថ ទិព្ពេហិ នច្ចេហិ, គីតេហិ វាទិតេហិ ច;

រមិស្សតិ សទា សន្តោ, បុញ្ញកម្មសមាហិតោ.

២០៥. ‘‘‘យាវតា បរិសា តស្ស, គន្ធគន្ធី ភវិស្សតិ;

សាលស្ស បុប្ផវស្សោ ច, បវស្សិស្សតិ តាវទេ.

២០៦. ‘‘‘តតោ ចុតោយំ មនុជោ, មានុសំ អាគមិស្សតិ;

ឥធាបិ សាលច្ឆទនំ, សព្ពកាលំ ធរិស្សតិ [ធរិយតិ (សី. បី.)].

២០៧. ‘‘‘ឥធ នច្ចញ្ច គីតញ្ច, សម្មតាឡសមាហិតំ;

បរិវារេស្សន្តិ មំ និច្ចំ, ពុទ្ធបូជាយិទំ ផលំ.

២០៨. ‘‘‘ឧគ្គច្ឆន្តេ ច សូរិយេ, សាលវស្សំ បវស្សតិ;

បុញ្ញកម្មេន សំយុត្តំ, វស្សតេ សព្ពកាលិកំ.

២០៩. ‘‘‘អដ្ឋារសេ កប្បសតេ, ឱក្កាកកុលសម្ភវោ;

គោតមោ នាម គោត្តេន, សត្ថា លោកេ ភវិស្សតិ.

២១០. ‘‘‘តស្ស ធម្មេសុ ទាយាទោ, ឱរសោ ធម្មនិម្មិតោ;

សព្ពាសវេ បរិញ្ញាយ, និព្ពាយិស្សតិនាសវោ.

២១១. ‘‘‘ធម្មំ អភិសមេន្តស្ស, សាលច្ឆន្នំ ភវិស្សតិ;

ចិតកេ ឈាយមានស្ស, ឆទនំ តត្ថ ហេស្សតិ’.

២១២. ‘‘វិបាកំ កិត្តយិត្វាន, បិយទស្សី មហាមុនិ;

បរិសាយ ធម្មំ ទេសេសិ, តប្បេន្តោ ធម្មវុដ្ឋិយា.

២១៣. ‘‘តិំសកប្បានិ ទេវេសុ, ទេវរជ្ជមការយិំ;

សដ្ឋិ ច សត្តក្ខត្តុញ្ច, ចក្កវត្តី អហោសហំ.

២១៤. ‘‘ទេវលោកា ឥធាគន្ត្វា, លភាមិ វិបុលំ សុខំ;

ឥធាបិ សាលច្ឆទនំ, មណ្ឌបស្ស ឥទំ ផលំ.

២១៥. ‘‘អយំ បច្ឆិមកោ មយ្ហំ, ចរិមោ វត្តតេ ភវោ;

ឥធាបិ សាលច្ឆទនំ, ហេស្សតិ សព្ពកាលិកំ.

២១៦. ‘‘មហាមុនិំ តោសយិត្វា, គោតមំ សក្យបុង្គវំ;

បត្តោម្ហិ អចលំ ឋានំ, ហិត្វា ជយបរាជយំ.

២១៧. ‘‘អដ្ឋារសេ កប្បសតេ, យំ ពុទ្ធមភិបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

២១៨. កិលេសា ឈាបិតា មយ្ហំ…បេ… វិហរាមិ អនាសវោ.

២១៩. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

២២០. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សាលមណ្ឌបិយោ ថេរោ ឥមា គាថាយោ

អភាសិត្ថាតិ.

សាលមណ្ឌបិយត្ថេរស្សាបទានំ ទសមំ.

បំសុកូលវគ្គោ ឯកូនបញ្ញាសមោ.