៨. តរណិយត្ថេរអបទានំ

១៤៨. ‘‘អត្ថទស្សី តុ ភគវា, សយម្ភូ លោកនាយកោ;

វិនតា នទិយា តីរំ [តីរេ (ស្យា. បី. ក.)], ឧបាគច្ឆិ តថាគតោ.

១៤៩. ‘‘ឧទកា អភិនិក្ខម្ម, កច្ឆបោ វារិគោចរោ;

ពុទ្ធំ តារេតុកាមោហំ, ឧបេសិំ លោកនាយកំ.

១៥០. ‘‘‘អភិរូហតុ មំ ពុទ្ធោ, អត្ថទស្សី មហាមុនិ;

អហំ តំ តារយិស្សាមិ, ទុក្ខស្សន្តករោ តុវំ’.

១៥១. ‘‘មម សង្កប្បមញ្ញាយ, អត្ថទស្សី មហាយសោ;

អភិរូហិត្វា មេ បិដ្ឋិំ, អដ្ឋាសិ លោកនាយកោ.

១៥២. ‘‘យតោ សរាមិ អត្តានំ, យតោ បត្តោស្មិ វិញ្ញុតំ;

សុខំ មេ តាទិសំ នត្ថិ, ផុដ្ឋេ បាទតលេ យថា.

១៥៣. ‘‘ឧត្តរិត្វាន សម្ពុទ្ធោ, អត្ថទស្សី មហាយសោ;

នទីតីរម្ហិ ឋត្វាន, ឥមា គាថា អភាសថ.

១៥៤. ‘‘‘យាវតា វត្តតេ ចិត្តំ, គង្គាសោតំ តរាមហំ;

អយញ្ច កច្ឆបោ រាជា, តារេសិ មម បញ្ញវា.

១៥៥. ‘‘‘ឥមិនា ពុទ្ធតរណេន, មេត្តចិត្តវតាយ ច;

អដ្ឋារសេ កប្បសតេ, ទេវលោកេ រមិស្សតិ.

១៥៦. ‘‘‘ទេវលោកា ឥធាគន្ត្វា, សុក្កមូលេន ចោទិតោ;

ឯកាសនេ និសីទិត្វា, កង្ខាសោតំ តរិស្សតិ.

១៥៧. ‘‘‘យថាបិ ភទ្ទកេ ខេត្តេ, ពីជំ អប្បម្បិ រោបិតំ;

សម្មាធារេ បវច្ឆន្តេ, ផលំ តោសេតិ កស្សកំ [កស្សកេ (ស្យា.)].

១៥៨. ‘‘‘តថេវិទំ ពុទ្ធខេត្តំ, សម្មាសម្ពុទ្ធទេសិតំ;

សម្មាធារេ បវច្ឆន្តេ, ផលំ មំ តោសយិស្សតិ’.

១៥៩. ‘‘បធានបហិតត្តោម្ហិ, ឧបសន្តោ និរូបធិ;

សព្ពាសវេ បរិញ្ញាយ, វិហរាមិ អនាសវោ.

១៦០. ‘‘អដ្ឋារសេ កប្បសតេ, យំ កម្មមករិំ តទា;

ទុគ្គតិំ នាភិជានាមិ, តរណាយ ឥទំ ផលំ.

១៦១. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

១៦២. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

១៦៣. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា តរណិយោ ថេរោ ឥមា គាថាយោ

អភាសិត្ថាតិ.

តរណិយត្ថេរស្សាបទានំ អដ្ឋមំ.