៧. បុលិនុប្បាទកត្ថេរអបទានំ

១១១. ‘‘បព្ពតេ ហិមវន្តម្ហិ, ទេវលោ នាម តាបសោ;

តត្ថ មេ ចង្កមោ អាសិ, អមនុស្សេហិ មាបិតោ.

១១២. ‘‘ជដាភារេន [ជដាភារស្ស (ស្យា. ក.)] ភរិតោ, កមណ្ឌលុធរោ សទា;

ឧត្តមត្ថំ គវេសន្តោ, វិបិនា និក្ខមិំ តទា.

១១៣. ‘‘ចុល្លាសីតិសហស្សានិ, សិស្សា មយ្ហំ ឧបដ្ឋហុំ;

សកកម្មាភិបសុតា, វសន្តិ វិបិនេ តទា.

១១៤. ‘‘អស្សមា អភិនិក្ខម្ម, អកំ បុលិនចេតិយំ;

នានាបុប្ផំ សមានេត្វា, តំ ចេតិយមបូជយិំ.

១១៥. ‘‘តត្ថ ចិត្តំ បសាទេត្វា, អស្សមំ បវិសាមហំ;

សព្ពេ សិស្សា សមាគន្ត្វា, ឯតមត្ថំ បុច្ឆិំសុ មំ [ឯតមត្ថមបុច្ឆុ មំ (សី.), ឯតមត្តំ អបុច្ឆិំសុ (ស្យា. ក.)].

១១៦. ‘‘‘បុលិនេន កតោ ថូបោ [កតោ ថូបេ (សី.)], យំ ត្វំ ទេវ [ទេវំ (សី. បី.)] មស្សតិ;

មយម្បិ ញាតុមិច្ឆាម, បុដ្ឋោ អាចិក្ខ នោ តុវំ’.

១១៧. ‘‘‘និទ្ទិដ្ឋា នុ [និទ្ទិដ្ឋា នោ (សី. បី.), ទិដ្ឋានោ វោ (ស្យា.)] មន្តបទេ, ចក្ខុមន្តោ មហាយសា;

តេ ខោ អហំ នមស្សាមិ, ពុទ្ធសេដ្ឋេ មហាយសេ’.

១១៨. ‘‘‘កីទិសា តេ មហាវីរា, សព្ពញ្ញូ លោកនាយកា;

កថំវណ្ណា កថំសីលា, កីទិសា តេ មហាយសា’.

១១៩. ‘‘‘ពាត្តិំសលក្ខណា ពុទ្ធា, ចត្តាលីសទិជាបិ ច;

នេត្តា គោបខុមា តេសំ, ជិញ្ជុកា ផលសន្និភា.

១២០. ‘‘‘គច្ឆមានា ច តេ ពុទ្ធា, យុគមត្តញ្ច បេក្ខរេ;

ន តេសំ ជាណុ នទតិ, សន្ធិសទ្ទោ ន សុយ្យតិ.

១២១. ‘‘‘គច្ឆមានា ច សុគតា, ឧទ្ធរន្តាវ គច្ឆរេ;

បឋមំ ទក្ខិណំ បាទំ, ពុទ្ធានំ ឯស ធម្មតា.

១២២. ‘‘‘អសម្ភីតា ច តេ ពុទ្ធា, មិគរាជាវ កេសរី;

នេវុក្កំសេន្តិ អត្តានំ, នោ ច វម្ភេន្តិ បាណិនំ.

១២៣. ‘‘‘មានាវមានតោ មុត្តា, សមា សព្ពេសុ បាណិសុ;

អនត្តុក្កំសកា ពុទ្ធា, ពុទ្ធានំ ឯស ធម្មតា.

១២៤. ‘‘‘ឧប្បជ្ជន្តា ច សម្ពុទ្ធា, អាលោកំ ទស្សយន្តិ តេ;

ឆប្បការំ បកម្បេន្តិ, កេវលំ វសុធំ ឥមំ.

១២៥. ‘‘‘បស្សន្តិ និរយញ្ចេតេ, និព្ពាតិ និរយោ តទា;

បវស្សតិ មហាមេឃោ, ពុទ្ធានំ ឯស ធម្មតា.

១២៦. ‘‘‘ឦទិសា តេ មហានាគា, អតុលា ច [តេ (ស្យា. ក.)] មហាយសា;

វណ្ណតោ អនតិក្កន្តា, អប្បមេយ្យា តថាគតា’.

១២៧. ‘‘‘អនុមោទិំសុ មេ វាក្យំ, សព្ពេ សិស្សា សគារវា;

តថា ច បដិបជ្ជិំសុ, យថាសត្តិ យថាពលំ’.

១២៨. ‘‘បដិបូជេន្តិ បុលិនំ, សកកម្មាភិលាសិនោ;

សទ្ទហន្តា មម វាក្យំ, ពុទ្ធសក្កតមានសា [ពុទ្ធត្តគតមានសា (សី. ស្យា. បី.)].

១២៩. ‘‘តទា ចវិត្វា តុសិតា, ទេវបុត្តោ មហាយសោ;

ឧប្បជ្ជិ មាតុកុច្ឆិម្ហិ, ទសសហស្សិ កម្បថ.

១៣០. ‘‘អស្សមស្សាវិទូរម្ហិ, ចង្កមម្ហិ ឋិតោ អហំ;

សព្ពេ សិស្សា សមាគន្ត្វា, អាគច្ឆុំ មម សន្តិកេ.

១៣១. ‘‘ឧសភោវ មហី នទតិ, មិគរាជាវ កូជតិ;

សុសុមារោវ [សុំសុមារោវ (សី. ស្យា. បី.)] សឡតិ, កិំ វិបាកោ ភវិស្សតិ.

១៣២. ‘‘យំ បកិត្តេមិ សម្ពុទ្ធំ, សិកតាថូបសន្តិកេ;

សោ ទានិ ភគវា សត្ថា, មាតុកុច្ឆិមុបាគមិ.

១៣៣. ‘‘តេសំ ធម្មកថំ វត្វា, កិត្តយិត្វា មហាមុនិំ;

ឧយ្យោជេត្វា សកេ សិស្សេ, បល្លង្កមាភុជិំ អហំ.

១៣៤. ‘‘ពលញ្ច វត មេ ខីណំ, ព្យាធិនា [ព្យាធិតោ (សី. ស្យា. បី. ក.)] បរមេន តំ;

ពុទ្ធសេដ្ឋំ សរិត្វាន, តត្ថ កាលង្កតោ [កាលកតោ (សី. បី.)] អហំ.

១៣៥. ‘‘សព្ពេ សិស្សា សមាគន្ត្វា, អកំសុ ចិតកំ តទា;

កឡេវរញ្ច មេ គយ្ហ, ចិតកំ អភិរោបយុំ.

១៣៦. ‘‘ចិតកំ បរិវារេត្វា, សីសេ កត្វាន អញ្ជលិំ;

សោកសល្លបរេតា តេ, វិក្កន្ទិំសុ សមាគតា.

១៣៧. ‘‘តេសំ លាលប្បមានានំ, អគមំ ចិតកំ តទា;

‘អហំ អាចរិយោ តុម្ហំ, មា សោចិត្ថ សុមេធសា.

១៣៨. ‘‘‘សទត្ថេ វាយមេយ្យាថ, រត្តិន្ទិវមតន្ទិតា;

មា វោ បមត្តា អហុត្ថ [អហុវត្ថ (សី.)], ខណោ វោ បដិបាទិតោ’.

១៣៩. ‘‘សកេ សិស្សេនុសាសិត្វា, ទេវលោកំ បុនាគមិំ;

អដ្ឋារស ច កប្បានិ, ទេវលោកេ រមាមហំ.

១៤០. ‘‘សតានំ បញ្ចក្ខត្តុញ្ច, ចក្កវត្តី អហោសហំ;

អនេកសតក្ខត្តុញ្ច, ទេវរជ្ជមការយិំ.

១៤១. ‘‘អវសេសេសុ កប្បេសុ, វោកិណ្ណោ [វោកិណ្ណំ (សី. ស្យា. ក.)] សំសរិំ អហំ;

ទុគ្គតិំ នាភិជានាមិ, ឧប្បាទស្ស ឥទំ ផលំ [បុលិនបូជាយិទំ ផលំ (សី.)].

១៤២. ‘‘យថា កោមុទិកេ មាសេ, ពហូ បុប្ផន្តិ បាទបា;

តថេវាហម្បិ សមយេ, បុប្ផិតោម្ហិ មហេសិនា.

១៤៣. ‘‘វីរិយំ មេ ធុរធោរយ្ហំ, យោគក្ខេមាធិវាហនំ;

នាគោវ ពន្ធនំ ឆេត្វា, វិហរាមិ អនាសវោ.

១៤៤. ‘‘សតសហស្សិតោ កប្បេ, យំ ពុទ្ធមភិកិត្តយិំ;

ទុគ្គតិំ នាភិជានាមិ, កិត្តនាយ ឥទំ ផលំ.

១៤៥. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

១៤៦. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

១៤៧. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បុលិនុប្បាទកោ ថេរោ ឥមា គាថាយោ

អភាសិត្ថាតិ.

បុលិនុប្បាទកត្ថេរស្សាបទានំ សត្តមំ.