៣. ភិសទាយកត្ថេរអបទានំ

២៧. ‘‘ឱគយ្ហ យំ [ឱគយ្ហាហំ (សី. ស្យា. បី.)] បោក្ខរណិំ, នានាកុញ្ជរសេវិតំ;

ឧទ្ធរាមិ ភិសំ តត្ថ, ឃាសហេតុ [អសនហេតុ (ស្យា.)] អហំ តទា.

២៨. ‘‘ភគវា តម្ហិ សមយេ, បទុមុត្តរសវ្ហយោ;

រត្តម្ពរធរោ [រត្តកម្ពលធរោ (ស្យា.)] ពុទ្ធោ, គច្ឆតិ អនិលញ្ជសេ.

២៩. ‘‘ធុនន្តោ បំសុកូលានិ, សទ្ទមស្សោសហំ តទា;

ឧទ្ធំ និជ្ឈាយមានោហំ, អទ្ទសំ លោកនាយកំ.

៣០. ‘‘តត្ថេវ ឋិតកោ សន្តោ, អាយាចិំ លោកនាយកំ;

មធុំ ភិសេហិ សវតិ, ខីរំ សប្បិំ មុឡាលិភិ.

៣១. ‘‘បដិគ្គណ្ហាតុ មេ ពុទ្ធោ, អនុកម្បាយ ចក្ខុមា;

តតោ ការុណិកោ សត្ថា, ឱរុហិត្វា មហាយសោ.

៣២. ‘‘បដិគ្គណ្ហិ មមំ ភិក្ខំ, អនុកម្បាយ ចក្ខុមា;

បដិគ្គហេត្វា សម្ពុទ្ធោ, អកា មេ អនុមោទនំ.

៣៣. ‘‘‘សុខី ហោតុ [ហោហិ (សី. ស្យា. បី. ក.)] មហាបុញ្ញ, គតិ តុយ្ហំ សមិជ្ឈតុ;

ឥមិនា ភិសទានេន, លភស្សុ វិបុលំ សុខំ’.

៣៤. ‘‘ឥទំ វត្វាន សម្ពុទ្ធោ, ជលជុត្តមនាមកោ;

ភិក្ខមាទាយ សម្ពុទ្ធោ, អម្ពរេនាគមា ជិនោ.

៣៥. ‘‘តតោ ភិសំ គហេត្វាន, អាគច្ឆិំ មម អស្សមំ;

ភិសំ រុក្ខេ លគេត្វាន [លគ្គិត្វាន (ស្យា. ក.)], មម ទានមនុស្សរិំ.

៣៦. ‘‘មហាវាតោ វុដ្ឋហិត្វា, សញ្ចាលេសិ វនំ តទា;

អាកាសោ អភិនាទិត្ថ, អសនិយា ផលន្តិយា.

៣៧. ‘‘តតោ មេ អសនិបាតោ, មត្ថកេ និបតី តទា;

សោហំ និសិន្នកោ សន្តោ, តត្ថ កាលង្កតោ អហុំ.

៣៨. ‘‘បុញ្ញកម្មេន សំយុត្តោ, តុសិតំ ឧបបជ្ជហំ;

កឡេវរំ មេ បតិតំ, ទេវលោកេ រមិំ អហំ.

៣៩. ‘‘ឆឡសីតិសហស្សានិ, នារិយោ សមលង្កតា;

សាយបាតំ [សាយំ បាតំ (ស្យា. ក.)] ឧបដ្ឋន្តិ, ភិសទានស្សិទំ ផលំ.

៤០. ‘‘មនុស្សយោនិមាគន្ត្វា, សុខិតោ ហោមហំ សទា;

ភោគេ មេ ឩនតា នត្ថិ, ភិសទានស្សិទំ ផលំ.

៤១. ‘‘អនុកម្បិតកោ តេន, ទេវទេវេន តាទិនា;

សព្ពាសវា បរិក្ខីណា, នត្ថិ ទានិ បុនព្ភវោ.

៤២. ‘‘សតសហស្សិតោ កប្បេ, យំ ភិសំ [ភិក្ខំ (សព្ពត្ថ)] អទទិំ តទា;

ទុគ្គតិំ នាភិជានាមិ, ភិសទានស្សិទំ ផលំ.

៤៣. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៤៤. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៤៥. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ភិសទាយកោ ថេរោ ឥមា គាថាយោ

អភាសិត្ថាតិ.

ភិសទាយកត្ថេរស្សាបទានំ តតិយំ.