៤. ញាណថវិកត្ថេរអបទានំ

៤៦. ‘‘ទក្ខិណេ ហិមវន្តស្ស, សុកតោ អស្សមោ មម;

ឧត្តមត្ថំ គវេសន្តោ, វសាមិ វិបិនេ តទា.

៤៧. ‘‘លាភាលាភេន សន្តុដ្ឋោ, មូលេន ច ផលេន ច;

អន្វេសន្តោ អាចរិយំ, វសាមិ ឯកកោ អហំ.

៤៨. ‘‘សុមេធោ នាម សម្ពុទ្ធោ, លោកេ ឧប្បជ្ជិ តាវទេ;

ចតុសច្ចំ បកាសេតិ, ឧទ្ធរន្តោ មហាជនំ.

៤៩. ‘‘នាហំ សុណោមិ សម្ពុទ្ធំ, នបិ មេ កោចិ សំសតិ [ភាសតិ (សី.), សាសតិ (ស្យា. បី.)];

អដ្ឋវស្សេ អតិក្កន្តេ, អស្សោសិំ លោកនាយកំ.

៥០. ‘‘អគ្គិទារុំ នីហរិត្វា, សម្មជ្ជិត្វាន អស្សមំ;

ខារិភារំ គហេត្វាន, និក្ខមិំ វិបិនា អហំ.

៥១. ‘‘ឯករត្តិំ វសន្តោហំ, គាមេសុ និគមេសុ ច;

អនុបុព្ពេន ចន្ទវតិំ, តទាហំ ឧបសង្កមិំ.

៥២. ‘‘ភគវា តម្ហិ សមយេ, សុមេធោ លោកនាយកោ;

ឧទ្ធរន្តោ ពហូ សត្តេ, ទេសេតិ អមតំ បទំ.

៥៣. ‘‘ជនកាយមតិក្កម្ម, វន្ទិត្វា ជិនសាគរំ;

ឯកំសំ អជិនំ កត្វា, សន្ថវិំ លោកនាយកំ.

៥៤. ‘‘‘តុវំ សត្ថា ច កេតុ ច, ធជោ យូបោ ច បាណិនំ;

បរាយនោ [បរាយណោ (សី. បី.)] បតិដ្ឋា ច, ទីបោ ច ទ្វិបទុត្តមោ.

ឯកវីសតិមំ ភាណវារំ.

៥៥. ‘‘‘នេបុញ្ញោ ទស្សនេ វីរោ, តារេសិ ជនតំ តុវំ;

នត្ថញ្ញោ តារកោ លោកេ, តវុត្តរិតរោ មុនេ.

៥៦. ‘‘‘សក្កា ថេវេ [ហវេ (សី. បី.) ភវេ (ស្យា. ក.)] កុសគ្គេន, បមេតុំ សាគរុត្តមេ [សាគរុត្តមោ (សី. ស្យា. បី.)];

នត្វេវ តវ សព្ពញ្ញុ, ញាណំ សក្កា បមេតវេ.

៥៧. ‘‘‘តុលទណ្ឌេ [តុលមណ្ឌលេ (សី. បី.)] ឋបេត្វាន, មហិំ [មហី (ស្យា. បី.)] សក្កា ធរេតវេ;

នត្វេវ តវ បញ្ញាយ, បមាណមត្ថិ ចក្ខុម.

៥៨. ‘‘‘អាកាសោ មិនិតុំ សក្កា, រជ្ជុយា អង្គុលេន វា;

នត្វេវ តវ សព្ពញ្ញុ, សីលំ សក្កា បមេតវេ.

៥៩. ‘‘‘មហាសមុទ្ទេ ឧទកំ, អាកាសោ ច វសុន្ធរា;

បរិមេយ្យានិ ឯតានិ, អប្បមេយ្យោសិ ចក្ខុម’.

៦០. ‘‘ឆហិ គាថាហិ សព្ពញ្ញុំ, កិត្តយិត្វា មហាយសំ;

អញ្ជលិំ បគ្គហេត្វាន, តុណ្ហី អដ្ឋាសហំ តទា.

៦១. ‘‘យំ វទន្តិ សុមេធោតិ, ភូរិបញ្ញំ សុមេធសំ;

ភិក្ខុសង្ឃេ និសីទិត្វា, ឥមា គាថា អភាសថ.

៦២. ‘‘‘យោ មេ ញាណំ បកិត្តេសិ, វិប្បសន្នេន ចេតសា;

តមហំ កិត្តយិស្សាមិ, សុណាថ មម ភាសតោ.

៦៣. ‘‘‘សត្តសត្តតិ កប្បានិ, ទេវលោកេ រមិស្សតិ;

សហស្សក្ខត្តុំ ទេវិន្ទោ, ទេវរជ្ជំ ករិស្សតិ.

៦៤. ‘‘‘អនេកសតក្ខត្តុញ្ច, ចក្កវត្តី ភវិស្សតិ;

បទេសរជ្ជំ វិបុលំ, គណនាតោ អសង្ខិយំ.

៦៥. ‘‘‘ទេវភូតោ មនុស្សោ វា, បុញ្ញកម្មសមាហិតោ;

អនូនមនសង្កប្បោ, តិក្ខបញ្ញោ ភវិស្សតិ’.

៦៦. ‘‘តិំសកប្បសហស្សម្ហិ, ឱក្កាកកុលសម្ភវោ;

គោតមោ នាម គោត្តេន, សត្ថា លោកេ ភវិស្សតិ.

៦៧. ‘‘អគារា អភិនិក្ខម្ម, បព្ពជិស្សតិ កិញ្ចនោ;

ជាតិយា សត្តវស្សេន, អរហត្តំ ផុសិស្សតិ.

៦៨. ‘‘យតោ សរាមិ អត្តានំ, យតោ បត្តោស្មិ សាសនំ;

ឯត្ថន្តរេ ន ជានាមិ, ចេតនំ អមនោរមំ.

៦៩. ‘‘សំសរិត្វា ភវេ សព្ពេ, សម្បត្តានុភវិំ អហំ;

ភោគេ មេ ឩនតា នត្ថិ, ផលំ ញាណស្ស ថោមនេ.

៧០. ‘‘តិយគ្គី និព្ពុតា មយ្ហំ, ភវា សព្ពេ សមូហតា;

សព្ពាសវា បរិក្ខីណា, នត្ថិ ទានិ បុនព្ភវោ.

៧១. ‘‘តិំសកប្បសហស្សម្ហិ, យំ ញាណមថវិំ អហំ [មភិថោមយិំ (សី. បី.), មភិថោមហំ (ស្យា.)];

ទុគ្គតិំ នាភិជានាមិ, ផលំ ញាណស្ស ថោមនេ.

៧២. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៧៣. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៧៤. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ញាណថវិកោ ថេរោ ឥមា គាថាយោ

អភាសិត្ថាតិ.

ញាណថវិកត្ថេរស្សាបទានំ ចតុត្ថំ.