២. ពុទ្ធសញ្ញកត្ថេរអបទានំ

៩. ‘‘អជ្ឈាយកោ មន្តធរោ, តិណ្ណំ វេទាន បារគូ;

លក្ខណេ ឥតិហាសេ ច, សនិឃណ្ឌុសកេដុភេ.

១០. ‘‘នទីសោតបដិភាគា, សិស្សា អាយន្តិ មេ តទា;

តេសាហំ មន្តេ [មន្តំ (ស្យា. ក.)] វាចេមិ, រត្តិន្ទិវមតន្ទិតោ.

១១. ‘‘សិទ្ធត្ថោ នាម សម្ពុទ្ធោ, លោកេ ឧប្បជ្ជិ តាវទេ;

តមន្ធការំ នាសេត្វា, ញាណាលោកំ បវត្តយិ.

១២. ‘‘មម អញ្ញតរោ សិស្សោ, សិស្សានំ សោ កថេសិ មេ;

សុត្វាន តេ ឯតមត្ថំ, អារោចេសុំ មមំ តទា.

១៣. ‘‘ពុទ្ធោ លោកេ សមុប្បន្នោ, សព្ពញ្ញូ លោកនាយកោ;

តស្សានុវត្តតិ ជនោ, លាភោ អម្ហំ ន វិជ្ជតិ [ន ហេស្សតិ (សី. បី.)].

១៤. ‘‘អធិច្ចុប្បត្តិកា ពុទ្ធា, ចក្ខុមន្តោ មហាយសា;

យំនូនាហំ ពុទ្ធសេដ្ឋំ, បស្សេយ្យំ លោកនាយកំ.

១៥. ‘‘អជិនំ មេ គហេត្វាន, វាកចីរំ កមណ្ឌលុំ;

អស្សមា អភិនិក្ខម្ម, សិស្សេ អាមន្តយិំ អហំ.

១៦. ‘‘ឱទុម្ពរិកបុប្ផំវ, ចន្ទម្ហិ សសកំ យថា;

វាយសានំ យថា ខីរំ, ទុល្លភោ លោកនាយកោ [ទុល្លភា លោកនាយកា (សី.), ទុល្លភំ លោកនាយកំ (ស្យា. បី. ក.)].

១៧. ‘‘ពុទ្ធោ លោកម្ហិ ឧប្បន្នោ, មនុស្សត្តម្បិ ទុល្លភំ;

ឧភោសុ វិជ្ជមានេសុ, សវនញ្ច សុទុល្លភំ.

១៨. ‘‘ពុទ្ធោ លោកេ សមុប្បន្នោ, ចក្ខុំ លច្ឆាម នោ ភវំ;

ឯថ សព្ពេ គមិស្សាម, សម្មាសម្ពុទ្ធសន្តិកំ.

១៩. ‘‘កមណ្ឌលុធរា សព្ពេ, ខរាជិននិវាសិនោ;

តេ ជដា ភារភរិតា, និក្ខមុំ វិបិនា តទា.

២០. ‘‘យុគមត្តំ បេក្ខមានា, ឧត្តមត្ថំ គវេសិនោ;

អាសត្តិទោសរហិតា, អសម្ភីតាវ កេសរី.

២១. ‘‘អប្បកិច្ចា អលោលុប្បា, និបកា សន្តវុត្តិនោ;

ឧញ្ឆាយ ចរមានា តេ, ពុទ្ធសេដ្ឋមុបាគមុំ.

២២. ‘‘ទិយឌ្ឍយោជនេ សេសេ, ព្យាធិ មេ ឧបបជ្ជថ;

ពុទ្ធសេដ្ឋំ សរិត្វាន, តត្ថ កាលង្កតោ អហំ.

២៣. ‘‘ចតុន្នវុតិតោ កប្បេ, យំ សញ្ញមលភិំ តទា;

ទុគ្គតិំ នាភិជានាមិ, ពុទ្ធសញ្ញាយិទំ ផលំ.

២៤. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

២៥. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

២៦. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ពុទ្ធសញ្ញកោ ថេរោ ឥមា គាថាយោ

អភាសិត្ថាតិ.

ពុទ្ធសញ្ញកត្ថេរស្សាបទានំ ទុតិយំ.