១. បំសុកូលសញ្ញកត្ថេរអបទានំ

១. ‘‘តិស្សោ នាមាសិ ភគវា, សយម្ភូ អគ្គបុគ្គលោ;

បំសុកូលំ ឋបេត្វាន, វិហារំ បាវិសី ជិនោ.

២. ‘‘វិនតំ [សជ្ជិតំ (ស្យា.), តិយន្តំ (បី.)] ធនុមាទាយ, ភក្ខត្ថាយ ចរិំ អហំ;

មណ្ឌលគ្គំ គហេត្វាន, កាននំ បាវិសិំ អហំ.

៣. ‘‘តត្ថទ្ទសំ បំសុកូលំ, ទុមគ្គេ លគ្គិតំ តទា;

ចាបំ តត្ថេវ និក្ខិប្ប, សិរេ កត្វាន អញ្ជលិំ.

៤. ‘‘បសន្នចិត្តោ សុមនោ, វិបុលាយ ច បីតិយា;

ពុទ្ធសេដ្ឋំ សរិត្វាន, បំសុកូលំ អវន្ទហំ.

៥. ‘‘ទ្វេនវុតេ ឥតោ កប្បេ, បំសុកូលមវន្ទហំ;

ទុគ្គតិំ នាភិជានាមិ, វន្ទនាយ ឥទំ ផលំ.

៦. ‘‘កិលេសា ឈាបិតា មយ្ហំ, ភវា សព្ពេ សមូហតា;

នាគោវ ពន្ធនំ ឆេត្វា, វិហរាមិ អនាសវោ.

៧. ‘‘ស្វាគតំ វត មេ អាសិ, មម ពុទ្ធស្ស សន្តិកេ;

តិស្សោ វិជ្ជា អនុប្បត្តា, កតំ ពុទ្ធស្ស សាសនំ.

៨. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា បំសុកូលសញ្ញកោ ថេរោ ឥមា គាថាយោ

អភាសិត្ថាតិ.

បំសុកូលសញ្ញកត្ថេរស្សាបទានំ បឋមំ.