១. សាលកុសុមិយត្ថេរអបទានំ

១. ‘‘បរិនិព្ពុតេ ភគវតិ, ជលជុត្តមនាមកេ;

អារោបិតម្ហិ ចិតកេ, សាលបុប្ផមបូជយិំ.

២. ‘‘សតសហស្សិតោ កប្បេ, យំ បុប្ផមភិរោបយិំ [បុប្ផមភិបុជយិំ (ស្យា.)];

ទុគ្គតិំ នាភិជានាមិ, ចិតបូជាយិទំ [ពុទ្ធបូជាយិទំ (ស្យា.)] ផលំ.

៣. ‘‘កិលេសា ឈាបិតា មយ្ហំ, ភវា សព្ពេ សមូហតា;

នាគោវ ពន្ធនំ ឆេត្វា, វិហរាមិ អនាសវោ.

៤. ‘‘ស្វាគតំ វត មេ អាសិ, មម ពុទ្ធស្ស សន្តិកេ;

តិស្សោ វិជ្ជា អនុប្បត្តា, កតំ ពុទ្ធស្ស សាសនំ.

៥. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា សាលកុសុមិយោ ថេរោ ឥមា គាថាយោ

អភាសិត្ថាតិ.

សាលកុសុមិយត្ថេរស្សាបទានំ បឋមំ.