៩. វេទិការកត្ថេរអបទានំ

៦១. ‘‘បទុមុត្តរស្ស ភគវតោ, ពោធិយា បាទបុត្តមេ;

វេទិកំ សុកតំ កត្វា, សកំ ចិត្តំ បសាទយិំ.

៦២. ‘‘អតោឡារានិ [អថោឡារានិ (សី. បី.), អគ្គោឡារានិ (ស្យា.)] ភណ្ឌានិ, កតានិ អកតានិ ច;

អន្តលិក្ខា បវស្សន្តិ, វេទិកាយ ឥទំ ផលំ.

៦៣. ‘‘ឧភតោ ព្យូឡ្ហសង្គាមេ, បក្ខន្ទន្តោ ភយានកេ;

ភយភេរវំ ន បស្សាមិ, វេទិកាយ ឥទំ ផលំ.

៦៤. ‘‘មម សង្កប្បមញ្ញាយ, ព្យម្ហំ និព្ពត្តតេ សុភំ;

សយនានិ មហគ្ឃានិ, វេទិកាយ ឥទំ ផលំ.

៦៥. ‘‘សតសហស្សិតោ កប្បេ, យំ វេទិកមការយិំ;

ទុគ្គតិំ នាភិជានាមិ, វេទិកាយ ឥទំ ផលំ.

៦៦. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៦៧. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៦៨. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា វេទិការកោ ថេរោ ឥមា គាថាយោ

អភាសិត្ថាតិ.

វេទិការកត្ថេរស្សាបទានំ នវមំ.