១០. ពោធិឃរទាយកត្ថេរអបទានំ

៦៩. ‘‘សិទ្ធត្ថស្ស ភគវតោ, ទ្វិបទិន្ទស្ស តាទិនោ;

បសន្នចិត្តោ សុមនោ, ពោធិឃរមការយិំ.

៧០. ‘‘តុសិតំ ឧបបន្នោម្ហិ, វសាមិ រតនេ ឃរេ;

ន មេ សីតំ វា ឧណ្ហំ វា, វាតោ គត្តេ ន សម្ផុសេ.

៧១. ‘‘បញ្ចសដ្ឋិម្ហិតោ កប្បេ, ចក្កវត្តី អហោសហំ;

កាសិកំ នាម នគរំ, វិស្សកម្មេន [វិសុកម្មេន (ស្យា. ក.)] មាបិតំ.

៧២. ‘‘ទសយោជនអាយាមំ, អដ្ឋយោជនវិត្ថតំ;

ន តម្ហិ នគរេ អត្ថិ, កដ្ឋំ វល្លី ច មត្តិកា.

៧៣. ‘‘តិរិយំ យោជនំ អាសិ, អទ្ធយោជនវិត្ថតំ;

មង្គលោ នាម បាសាទោ, វិស្សកម្មេន មាបិតោ.

៧៤. ‘‘ចុល្លាសីតិសហស្សានិ, ថម្ភា សោណ្ណមយា អហុំ;

មណិមយា ច និយ្យូហា, ឆទនំ រូបិយំ អហុ.

៧៥. ‘‘សព្ពសោណ្ណមយំ ឃរំ, វិស្សកម្មេន មាបិតំ;

អជ្ឈាវុត្ថំ មយា ឯតំ, ឃរទានស្សិទំ ផលំ.

៧៦. ‘‘តេ សព្ពេ អនុភោត្វាន, ទេវមានុសកេ ភវេ;

អជ្ឈបត្តោម្ហិ និព្ពានំ, សន្តិបទមនុត្តរំ.

៧៧. ‘‘តិំសកប្បសហស្សម្ហិ, ពោធិឃរមការយិំ;

ទុគ្គតិំ នាភិជានាមិ, ឃរទានស្សិទំ ផលំ.

៧៨. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៧៩. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៨០. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ពោធិឃរទាយកោ ថេរោ ឥមា គាថាយោ

អភាសិត្ថាតិ.

ពោធិឃរទាយកត្ថេរស្សាបទានំ ទសមំ.

វិភីតកវគ្គោ បញ្ចចត្តាលីសមោ.