៨. បាទបីឋិយត្ថេរអបទានំ

៥០. ‘‘សុមេធោ នាម សម្ពុទ្ធោ, អគ្គោ ការុណិកោ មុនិ;

តារយិត្វា ពហូ សត្តេ, និព្ពុតោ សោ មហាយសោ.

៥១. ‘‘សីហាសនស្ស សាមន្តា, សុមេធស្ស មហេសិនោ;

បសន្នចិត្តោ សុមនោ, បាទបីឋមការយិំ.

៥២. ‘‘កត្វាន កុសលំ កម្មំ, សុខបាកំ សុខុទ្រយំ;

បុញ្ញកម្មេន សំយុត្តោ, តាវតិំសមគច្ឆហំ.

៥៣. ‘‘តត្ថ មេ វសមានស្ស, បុញ្ញកម្មសមង្គិនោ;

បទានិ ឧទ្ធរន្តស្ស, សោណ្ណបីឋា ភវន្តិ មេ.

៥៤. ‘‘លាភា តេសំ សុលទ្ធំ វោ, យេ លភន្តិ ឧបស្សុតិំ;

និព្ពុតេ ការំ កត្វាន, លភន្តិ វិបុលំ សុខំ.

៥៥. ‘‘មយាបិ សុកតំ កម្មំ, វាណិជ្ជំ សុប្បយោជិតំ;

បាទបីឋំ ករិត្វាន, សោណ្ណបីឋំ លភាមហំ.

៥៦. ‘‘យំ យំ ទិសំ បក្កមាមិ, កេនចិ កិច្ចយេនហំ [បច្ចយេនហំ (សី. បី.)];

សោណ្ណបីឋេ អក្កមាមិ [សោណ្ណបីឋេន កមាមិ (ក.)], បុញ្ញកម្មស្សិទំ ផលំ.

៥៧. ‘‘តិំសកប្បសហស្សម្ហិ, យំ កម្មមករិំ តទា;

ទុគ្គតិំ នាភិជានាមិ, បាទបីឋស្សិទំ ផលំ.

៥៨. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៥៩. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៦០. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បាទបីឋិយោ ថេរោ ឥមា គាថាយោ

អភាសិត្ថាតិ.

បាទបីឋិយត្ថេរស្សាបទានំ អដ្ឋមំ.