៧. សីហាសនិកត្ថេរអបទានំ

៤២. ‘‘បទុមុត្តរស្ស ភគវតោ, សព្ពភូតហិតេសិនោ;

បសន្នចិត្តោ សុមនោ, សីហាសនមទាសហំ.

៤៣. ‘‘ទេវលោកេ មនុស្សេ វា, យត្ថ យត្ថ វសាមហំ;

លភាមិ វិបុលំ ព្យម្ហំ, សីហាសនស្សិទំ ផលំ.

៤៤. ‘‘សោណ្ណមយា រូបិមយា, លោហិតង្គមយា [លោហិតង្កមយា (សី. ស្យា. បី.)] ពហូ;

មណិមយា ច បល្លង្កា, និព្ពត្តន្តិ មមំ សទា.

៤៥. ‘‘ពោធិយា អាសនំ កត្វា, ជលជុត្តមនាមិនោ;

ឧច្ចេ កុលេ បជាយាមិ, អហោ ធម្មសុធម្មតា.

៤៦. ‘‘សតសហស្សិតោ កប្បេ, សីហាសនមកាសហំ;

ទុគ្គតិំ នាភិជានាមិ, សីហាសនស្សិទំ ផលំ.

៤៧. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៤៨. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៤៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សីហាសនិកោ ថេរោ ឥមា គាថាយោ

អភាសិត្ថាតិ.

សីហាសនិកត្ថេរស្សាបទានំ សត្តមំ.