៩. អម្ពបិណ្ឌិយត្ថេរអបទានំ

៧២. ‘‘ហត្ថិរាជា តទា អាសិំ, ឦសាទន្តោ ឧរុឡ្ហវា;

វិចរន្តោ ព្រហារញ្ញេ, អទ្ទសំ លោកនាយកំ.

៧៣. ‘‘អម្ពបិណ្ឌំ គហេត្វាន, អទាសិំ សត្ថុនោ អហំ;

បដិគ្គណ្ហិ មហាវីរោ, សិទ្ធត្ថោ លោកនាយកោ.

៧៤. ‘‘មម និជ្ឈាយមានស្ស, បរិភុញ្ជិ តទា ជិនោ;

តត្ថ ចិត្តំ បសាទេត្វា, តុសិតំ ឧបបជ្ជហំ.

៧៥. ‘‘តតោ អហំ ចវិត្វាន, ចក្កវត្តី អហោសហំ;

ឯតេនេវ ឧបាយេន, អនុភុត្វាន សម្បទា.

៧៦. ‘‘បធានបហិតត្តោហំ, ឧបសន្តោ និរូបធិ;

សព្ពាសវេ បរិញ្ញាយ, វិហរាមិ អនាសវោ.

៧៧. ‘‘ចតុន្នវុតិតោ កប្បេ, យំ ផលមទទិំ តទា;

ទុគ្គតិំ នាភិជានាមិ, ផលទានស្សិទំ ផលំ.

៧៨. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៧៩. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៨០. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា អម្ពបិណ្ឌិយោ ថេរោ ឥមា គាថាយោ

អភាសិត្ថាតិ.

អម្ពបិណ្ឌិយត្ថេរស្សាបទានំ នវមំ.