១០. អម្ពផលិយត្ថេរអបទានំ

៨១. ‘‘បទុមុត្តរពុទ្ធស្ស, លោកជេដ្ឋស្ស តាទិនោ;

បិណ្ឌាយ វិចរន្តស្ស, ធារតោ ឧត្តមំ យសំ.

៨២. ‘‘អគ្គផលំ គហេត្វាន, វិប្បសន្នេន ចេតសា;

ទក្ខិណេយ្យស្ស វីរស្ស, អទាសិំ សត្ថុនោ អហំ.

៨៣. ‘‘តេន កម្មេន ទ្វិបទិន្ទ [ទិបទិន្ទ (សី. ស្យា. បី.)], លោកជេដ្ឋ នរាសភ;

បត្តោម្ហិ អចលំ ឋានំ, ហិត្វា ជយបរាជយំ.

៨៤. ‘‘សតសហស្សិតោ កប្បេ, យំ ទានមទទិំ តទា;

ទុគ្គតិំ នាភិជានាមិ, អគ្គទានស្សិទំ ផលំ.

៨៥. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៨៦. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៨៧. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា អម្ពផលិយោ ថេរោ ឥមា គាថាយោ អភាសិត្ថាតិ;

អម្ពផលិយត្ថេរស្សាបទានំ ទសមំ.

ឯកវិហារិវគ្គោ ចតុចត្តាលីសមោ.