៤៤. ឯកវិហារិវគ្គោ

១. ឯកវិហារិកត្ថេរអបទានំ

១. ‘‘ឥមម្ហិ ភទ្ទកេ កប្បេ, ព្រហ្មពន្ធុ មហាយសោ;

កស្សបោ នាម គោត្តេន, ឧប្បជ្ជិ វទតំ វរោ.

២. ‘‘និប្បបញ្ចោ និរាលម្ពោ, អាកាសសមមានសោ;

សុញ្ញតាពហុលោ តាទី, អនិមិត្តរតោ វសី.

៣. ‘‘អសង្គចិត្តោ និក្លេសោ [និល្លេបោ (ស្យា. ក.)], អសំសដ្ឋោ កុលេ គណេ;

មហាការុណិកោ វីរោ, វិនយោបាយកោវិទោ.

៤. ‘‘ឧយ្យុត្តោ បរកិច្ចេសុ, វិនយន្តោ សទេវកេ;

និព្ពានគមនំ មគ្គំ, គតិំ បង្កវិសោសនំ.

៥. ‘‘អមតំ បរមស្សាទំ, ជរាមច្ចុនិវារណំ;

មហាបរិសមជ្ឈេ សោ, និសិន្នោ លោកតារកោ.

៦. ‘‘ករវីករុតោ [ករវីករុទោ (ស្យា. បី. ក.)] នាថោ, ព្រហ្មឃោសោ តថាគតោ;

ឧទ្ធរន្តោ មហាទុគ្គា, វិប្បនដ្ឋេ អនាយកេ.

៧. ‘‘ទេសេន្តោ វិរជំ ធម្មំ, ទិដ្ឋោ មេ លោកនាយកោ;

តស្ស ធម្មំ សុណិត្វាន, បព្ពជិំ អនគារិយំ.

៨. ‘‘បព្ពជិត្វា តទាបាហំ, ចិន្តេន្តោ ជិនសាសនំ;

ឯកកោវ វនេ រម្មេ, វសិំ សំសគ្គបីឡិតោ.

៩. ‘‘សក្កាយវូបកាសោ មេ, ហេតុភូតោ មមាភវី [មមាគមី (ស្យា. បី.)];

មនសោ វូបកាសស្ស, សំសគ្គភយទស្សិនោ.

១០. ‘‘កិលេសា ឈាបិតា មយ្ហំ, ភវា សព្ពេ សមូហតា;

នាគោវ ពន្ធនំ ឆេត្វា, វិហរាមិ អនាសវោ.

១១. ‘‘ស្វាគតំ វត មេ អាសិ, មម ពុទ្ធស្ស សន្តិកេ;

តិស្សោ វិជ្ជា អនុប្បត្តា, កតំ ពុទ្ធស្ស សាសនំ.

១២. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា ឯកវិហារិកោ ថេរោ ឥមា គាថាយោ

អភាសិត្ថាតិ.

ឯកវិហារិកត្ថេរស្សាបទានំ បឋមំ.

២. ឯកសង្ខិយត្ថេរអបទានំ

១៣. ‘‘វិបស្សិនោ ភគវតោ, មហាពោធិមហោ អហុ;

មហាជនា សមាគម្ម, បូជេន្តិ ពោធិមុត្តមំ.

១៤. ‘‘ន ហិ តំ ឱរកំ មញ្ញេ, ពុទ្ធសេដ្ឋោ ភវិស្សតិ;

យស្សាយំ ឦទិសា ពោធិ, បូជនីយា [ឦទិសោ ពោធិ, បូជនីយោ (ស្យា.)] ច សត្ថុនោ.

១៥. ‘‘តតោ សង្ខំ គហេត្វាន, ពោធិរុក្ខមុបដ្ឋហិំ;

ធមន្តោ សព្ពទិវសំ, អវន្ទិំ ពោធិមុត្តមំ.

១៦. ‘‘អាសន្នកេ កតំ កម្មំ, ទេវលោកំ អបាបយី;

កឡេវរំ មេ បតិតំ, ទេវលោកេ រមាមហំ.

១៧. ‘‘សដ្ឋិតុរិយសហស្សានិ, តុដ្ឋហដ្ឋា បមោទិតា;

សទា មយ្ហំ ឧបដ្ឋន្តិ, ពុទ្ធបូជាយិទំ ផលំ.

១៨. ‘‘ឯកសត្តតិមេ កប្បេ, រាជា អាសិំ សុទស្សនោ;

ចាតុរន្តោ វិជិតាវី, ជម្ពុមណ្ឌស្ស ឥស្សរោ.

១៩. ‘‘តតោ អង្គសតា តុរិយា [តូរា (សី. ក.)], បរិវារេន្តិ មំ សទា;

អនុភោមិ សកំ កម្មំ, ឧបដ្ឋានស្សិទំ ផលំ.

២០. ‘‘យំ យំ យោនុបបជ្ជាមិ, ទេវត្តំ អថ មានុសំ;

មាតុកុច្ឆិគតស្សាបិ, វជ្ជរេ ភេរិយោ សទា.

២១. ‘‘ឧបដ្ឋិត្វាន សម្ពុទ្ធំ, អនុភុត្វាន សម្បទា;

សិវំ សុខេមំ អមតំ, បត្តោម្ហិ អចលំ បទំ.

២២. ‘‘ឯកនវុតិតោ កប្បេ, យំ កម្មមករិំ តទា;

ទុគ្គតិំ នាភិជានាមិ, ពុទ្ធបូជាយិទំ ផលំ.

២៣. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

២៤. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

២៥. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ឯកសង្ខិយោ ថេរោ ឥមា គាថាយោ

អភាសិត្ថាតិ.

ឯកសង្ខិយត្ថេរស្សាបទានំ ទុតិយំ.

៣. បាដិហីរសញ្ញកត្ថេរអបទានំ

២៦. ‘‘បទុមុត្តរោ នាម ជិនោ, អាហុតីនំ បដិគ្គហោ;

វសីសតសហស្សេហិ, នគរំ បាវិសី តទា.

២៧. ‘‘នគរំ បវិសន្តស្ស, ឧបសន្តស្ស តាទិនោ;

រតនានិ បជ្ជោតិំសុ [បនាទិំសុ (បី.)], និគ្ឃោសោ អាសិ តាវទេ.

២៨. ‘‘ពុទ្ធស្ស អានុភាវេន, ភេរី វជ្ជុមឃដ្ដិតា;

សយំ វីណា បវជ្ជន្តិ, ពុទ្ធស្ស បវិសតោ បុរំ.

២៩. ‘‘ពុទ្ធសេដ្ឋំ នមស្សាមិ [ន បស្សាមិ (សី.)], បទុមុត្តរមហាមុនិំ;

បាដិហីរញ្ច បស្សិត្វា, តត្ថ ចិត្តំ បសាទយិំ.

៣០. ‘‘អហោ ពុទ្ធោ អហោ ធម្មោ, អហោ នោ សត្ថុសម្បទា;

អចេតនាបិ តុរិយា, សយមេវ បវជ្ជរេ.

៣១. ‘‘សតសហស្សិតោ កប្បេ, យំ សញ្ញមលភិំ តទា;

ទុគ្គតិំ នាភិជានាមិ, ពុទ្ធសញ្ញាយិទំ ផលំ.

៣២. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៣៣. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៣៤. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បាដិហីរសញ្ញកោ ថេរោ ឥមា គាថាយោ

អភាសិត្ថាតិ.

បាដិហីរសញ្ញកត្ថេរស្សាបទានំ តតិយំ.

៤. ញាណត្ថវិកត្ថេរអបទានំ

៣៥. ‘‘កណិការំវ ជលិតំ, ទីបរុក្ខំវ ជោតិតំ;

កញ្ចនំវ វិរោចន្តំ, អទ្ទសំ ទ្វិបទុត្តមំ.

៣៦. ‘‘កមណ្ឌលុំ ឋបេត្វាន, វាកចីរញ្ច កុណ្ឌិកំ;

ឯកំសំ អជិនំ កត្វា, ពុទ្ធសេដ្ឋំ ថវិំ អហំ.

៣៧. ‘‘‘តមន្ធការំ វិធមំ, មោហជាលសមាកុលំ;

ញាណាលោកំ ទស្សេត្វាន, និត្តិណ្ណោសិ មហាមុនិ.

៣៨. ‘‘‘សមុទ្ធរសិមំ លោកំ, សព្ពាវន្តមនុត្តរំ;

ញាណេ តេ ឧបមា នត្ថិ, យាវតាជគតោគតិ [យាវតា ច គតោគតិ (បី. ក.)].

៣៩. ‘‘‘តេន ញាណេន សព្ពញ្ញូ, ឥតិ ពុទ្ធោ បវុច្ចតិ;

វន្ទាមិ តំ មហាវីរំ, សព្ពញ្ញុតមនាវរំ’.

៤០. ‘‘សតសហស្សិតោ កប្បេ, ពុទ្ធសេដ្ឋំ ថវិំ អហំ;

ទុគ្គតិំ នាភិជានាមិ, ញាណត្ថវាយិទំ ផលំ;

៤១. ‘‘កិលេសា ឈាបិតា មយ្ហំ…បេ… វិហរាមិ អនាសវោ;

៤២. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៤៣. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ញាណត្ថវិកោ ថេរោ ឥមា គាថាយោ

អភាសិត្ថាតិ.

ញាណត្ថវិកត្ថេរស្សាបទានំ ចតុត្ថំ.

៥. ឧច្ឆុខណ្ឌិកត្ថេរអបទានំ

៤៤. ‘‘នគរេ ពន្ធុមតិយា, ទ្វារបាលោ អហោសហំ;

អទ្ទសំ វិរជំ ពុទ្ធំ, សព្ពធម្មាន បារគុំ.

៤៥. ‘‘ឧច្ឆុខណ្ឌិកមាទាយ, ពុទ្ធសេដ្ឋស្សទាសហំ;

បសន្នចិត្តោ សុមនោ, វិបស្សិស្ស មហេសិនោ.

៤៦. ‘‘ឯកនវុតិតោ កប្បេ, យំ ឧច្ឆុមទទិំ តទា;

ទុគ្គតិំ នាភិជានាមិ, ឧច្ឆុខណ្ឌស្សិទំ ផលំ.

៤៧. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៤៨. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៤៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ឧច្ឆុខណ្ឌិកោ ថេរោ ឥមា គាថាយោ

អភាសិត្ថាតិ.

ឧច្ឆុខណ្ឌិកត្ថេរស្សាបទានំ បញ្ចមំ.

៦. កឡម្ពទាយកត្ថេរអបទានំ

៥០. ‘‘រោមសោ នាម សម្ពុទ្ធោ, វសតេ បព្ពតន្តរេ;

កឡម្ពំ តស្ស បាទាសិំ, បសន្នោ សេហិ បាណិភិ.

៥១. ‘‘ចតុន្នវុតិតោ កប្បេ, យំ ទានមទទិំ តទា;

ទុគ្គតិំ នាភិជានាមិ, កឡម្ពស្ស ឥទំ ផលំ.

៥២. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៥៣. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៥៤. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា កឡម្ពទាយកោ ថេរោ ឥមា គាថាយោ

អភាសិត្ថាតិ.

កឡម្ពទាយកត្ថេរស្សាបទានំ ឆដ្ឋំ.

៧. អម្ពាដកទាយកត្ថេរអបទានំ

៥៥. ‘‘វិបិនេ ពុទ្ធំ ទិស្វាន, សយម្ភុំ អបរាជិតំ;

អម្ពាដកំ គហេត្វាន, សយម្ភុស្ស អទាសហំ.

៥៦. ‘‘ឯកតិំសេ ឥតោ កប្បេ, យំ ផលមទទិំ តទា;

ទុគ្គតិំ នាភិជានាមិ, ផលទានស្សិទំ ផលំ.

៥៧. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៥៨. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៥៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា អម្ពាដកទាយកោ ថេរោ ឥមា គាថាយោ

អភាសិត្ថាតិ.

អម្ពាដកទាយកត្ថេរស្សាបទានំ សត្តមំ.

៨. ហរីតកទាយកត្ថេរអបទានំ

៦០. ‘‘ហរីតកំ អាមលកំ, អម្ពជម្ពុវិភីតកំ;

កោលំ ភល្លាតកំ ពិល្លំ, សយមេវ ហរាមហំ.

៦១. ‘‘ទិស្វាន បព្ភារគតំ, ឈាយិំ ឈានរតំ មុនិំ;

អាពាធេន អាបីឡេន្តំ, អទុតីយំ មហាមុនិំ.

៦២. ‘‘ហរីតកំ គហេត្វាន, សយម្ភុស្ស អទាសហំ;

ខាទមត្តម្ហិ ភេសជ្ជេ, ព្យាធិ បស្សម្ភិ [បស្សទ្ធិ (ក.)] តាវទេ.

៦៣. ‘‘បហីនទរថោ ពុទ្ធោ, អនុមោទមកាសិ មេ;

‘ភេសជ្ជទានេនិមិនា, ព្យាធិវូបសមេន ច.

៦៤. ‘‘‘ទេវភូតោ មនុស្សោ វា, ជាតោ វា អញ្ញជាតិយា;

សព្ពត្ថ សុខិតោ ហោតុ, មា ច តេ ព្យាធិមាគមា’.

៦៥. ‘‘ឥទំ វត្វាន សម្ពុទ្ធោ, សយម្ភូ អបរាជិតោ;

នភំ អព្ភុគ្គមី ធីរោ, ហំសរាជាវ អម្ពរេ.

៦៦. ‘‘យតោ ហរីតកំ ទិន្នំ, សយម្ភុស្ស មហេសិនោ;

ឥមំ ជាតិំ ឧបាទាយ, ព្យាធិ មេ នុបបជ្ជថ.

៦៧. ‘‘អយំ បច្ឆិមកោ មយ្ហំ, ចរិមោ វត្តតេ ភវោ;

តិស្សោ វិជ្ជា សច្ឆិកតា, កតំ ពុទ្ធស្ស សាសនំ.

៦៨. ‘‘ចតុន្នវុតិតោ កប្បេ, ភេសជ្ជមទទិំ តទា;

ទុគ្គតិំ នាភិជានាមិ, ភេសជ្ជស្ស ឥទំ ផលំ.

៦៩. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៧០. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.