៧. ឯកធម្មស្សវនិយត្ថេរអបទានំ

៨៨. ‘‘បទុមុត្តរោ នាម ជិនោ, សព្ពធម្មាន បារគូ;

ចតុសច្ចំ បកាសេន្តោ, សន្តារេសិ ពហុំ ជនំ.

៨៩. ‘‘អហំ តេន សមយេន, ជដិលោ ឧគ្គតាបនោ;

ធុនន្តោ វាកចីរានិ, គច្ឆាមិ អម្ពរេ តទា.

៩០. ‘‘ពុទ្ធសេដ្ឋស្ស ឧបរិ, គន្តុំ ន វិសហាមហំ;

បក្ខីវ សេលមាសជ្ជ, គមនំ ន លភាមហំ.

៩១. ‘‘ឧទកេ វោក្កមិត្វាន, ឯវំ គច្ឆាមិ អម្ពរេ;

ន មេ ឥទំ ភូតបុព្ពំ, ឥរិយាបថវិកោបនំ.

៩២. ‘‘ហន្ទ មេតំ គវេសិស្សំ, អប្បេវត្ថំ លភេយ្យហំ;

ឱរោហន្តោ អន្តលិក្ខា, សទ្ទមស្សោសិ សត្ថុនោ.

៩៣. ‘‘សរេន រជនីយេន, សវនីយេន វគ្គុនា;

អនិច្ចតំ កថេន្តស្ស, តញ្ញេវ ឧគ្គហិំ តទា;

អនិច្ចសញ្ញមុគ្គយ្ហ, អគមាសិំ មមស្សមំ.

៩៤. ‘‘យាវតាយុំ វសិត្វាន, តត្ថ កាលង្កតោ អហំ;

ចរិមេ វត្តមានម្ហិ, សទ្ធម្មស្សវនំ សរិំ.

៩៥. ‘‘តេន កម្មេន សុកតេន, ចេតនាបណិធីហិ ច;

ជហិត្វា មានុសំ ទេហំ, តាវតិំសមគច្ឆហំ.

៩៦. ‘‘តិំសកប្បសហស្សានិ, ទេវលោកេ រមិំ អហំ;

ឯកបញ្ញាសក្ខត្តុញ្ច, ទេវរជ្ជមការយិំ.

៩៧. ‘‘ឯកវីសតិក្ខត្តុញ្ច [ឯកតិំសតិ… (ស្យា.)], ចក្កវត្តី អហោសហំ;

បទេសរជ្ជំ វិបុលំ, គណនាតោ អសង្ខិយំ.

៩៨. ‘‘អនុភោមិ សកំ បុញ្ញំ, សុខិតោហំ ភវាភវេ;

អនុស្សរាមិ តំ សញ្ញំ, សំសរន្តោ ភវាភវេ;

ន កោដិំ បដិវិជ្ឈាមិ, និព្ពានំ អច្ចុតំ បទំ.

៩៩. ‘‘បិតុគេហេ និសីទិត្វា, សមណោ ភាវិតិន្ទ្រិយោ;

កថំស [កថយំ (សី. បី. ក.)] បរិទីបេន្តោ, អនិច្ចតមុទាហរិ.

១០០. ‘‘‘អនិច្ចា វត សង្ខារា, ឧប្បាទវយធម្មិនោ;

ឧប្បជ្ជិត្វា និរុជ្ឈន្តិ, តេសំ វូបសមោ សុខោ’.

១០១. ‘‘សហ គាថំ សុណិត្វាន, បុព្ពសញ្ញមនុស្សរិំ;

ឯកាសនេ និសីទិត្វា, អរហត្តមបាបុណិំ.

១០២. ‘‘ជាតិយា សត្តវស្សេន, អរហត្តមបាបុណិំ;

ឧបសម្បាទយី ពុទ្ធោ, ធម្មស្សវនស្សិទំ ផលំ.

១០៣. ‘‘សតសហស្សិតោ កប្បេ, យំ ធម្មមសុណិំ តទា;

ទុគ្គតិំ នាភិជានាមិ, ធម្មស្សវនស្សិទំ ផលំ.

១០៤. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

១០៥. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

១០៦. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ឯកធម្មស្សវនិយោ ថេរោ ឥមា

គាថាយោ អភាសិត្ថាតិ.

ឯកធម្មស្សវនិយត្ថេរស្សាបទានំ សត្តមំ.