៨. សុចិន្តិតត្ថេរអបទានំ

១០៧. ‘‘នគរេ ហំសវតិយា, អហោសិំ កស្សកោ តទា;

កសិកម្មេន ជីវាមិ, តេន បោសេមិ ទារកេ.

១០៨. ‘‘សុសម្បន្នំ តទា ខេត្តំ, ធញ្ញំ មេ ផលិនំ [ផលិតំ (សី. បី.)] អហុ;

បាកកាលេ ច សម្បត្តេ, ឯវំ ចិន្តេសហំ តទា.

១០៩. ‘‘នច្ឆន្នំ នប្បតិរូបំ, ជានន្តស្ស គុណាគុណំ;

យោហំ សង្ឃេ អទត្វាន, អគ្គំ ភុញ្ជេយ្យ ចេ តទា [មត្តនា (ស្យា.)].

១១០. ‘‘អយំ ពុទ្ធោ អសមសមោ, ទ្វត្តិំសវរលក្ខណោ;

តតោ បភាវិតោ សង្ឃោ, បុញ្ញក្ខេត្តោ អនុត្តរោ.

១១១. ‘‘តត្ថ ទស្សាមហំ ទានំ, នវសស្សំ បុរេ បុរេ;

ឯវាហំ ចិន្តយិត្វាន, ហដ្ឋោ បីណិតមានសោ [បីតិក… (ស្យា.)].

១១២. ‘‘ខេត្តតោ ធញ្ញមាហត្វា, សម្ពុទ្ធំ ឧបសង្កមិំ;

ឧបសង្កម្ម សម្ពុទ្ធំ, លោកជេដ្ឋំ នរាសភំ;

វន្ទិត្វា សត្ថុនោ បាទេ, ឥទំ វចនមព្រវិំ.

១១៣. ‘‘‘នវសស្សញ្ច សម្បន្នំ, អាយាគោសិ [ឥធ ហោសិ (ស្យា.)] ច ត្វំ មុនេ;

អនុកម្បមុបាទាយ, អធិវាសេហិ ចក្ខុម’.

១១៤. ‘‘បទុមុត្តរោ លោកវិទូ, អាហុតីនំ បដិគ្គហោ;

មម សង្កប្បមញ្ញាយ, ឥទំ វចនមព្រវិ.

១១៥. ‘‘‘ចត្តារោ ច បដិបន្នា, ចត្តារោ ច ផលេ ឋិតា;

ឯស សង្ឃោ ឧជុភូតោ, បញ្ញាសីលសមាហិតោ;

យជន្តានំ មនុស្សានំ, បុញ្ញបេក្ខាន បាណិនំ.

១១៦. ‘‘‘ករោតោបធិកំ បុញ្ញំ, សង្ឃេ ទិន្នំ មហប្ផលំ;

តស្មិំ សង្ឃេវ [សំឃេ ច (ស្យា. បី.)] ទាតព្ពំ, តវ សស្សំ តថេតរំ.

១១៧. ‘‘‘សង្ឃតោ ឧទ្ទិសិត្វាន, ភិក្ខូ នេត្វាន សំឃរំ;

បដិយត្តំ ឃរេ សន្តំ, ភិក្ខុសង្ឃស្ស ទេហិ ត្វំ’.

១១៨. ‘‘សង្ឃតោ ឧទ្ទិសិត្វាន, ភិក្ខូ នេត្វាន សំឃរំ;

យំ ឃរេ បដិយត្តំ មេ, ភិក្ខុសង្ឃស្សទាសហំ.

១១៩. ‘‘តេន កម្មេន សុកតេន, ចេតនាបណិធីហិ ច;

ជហិត្វា មានុសំ ទេហំ, តាវតិំសមគច្ឆហំ.

១២០. ‘‘តត្ថ មេ សុកតំ ព្យម្ហំ, សោវណ្ណំ សប្បភស្សរំ;

សដ្ឋិយោជនមុព្ពេធំ, តិំសយោជនវិត្ថតំ.

ឯកូនវីសតិមំ ភាណវារំ.

១២១. ‘‘អាកិណ្ណំ ភវនំ មយ្ហំ, នារីគណសមាកុលំ;

តត្ថ ភុត្វា បិវិត្វា ច, វសាមិ តិទសេ អហំ.

១២២. ‘‘សតានំ តីណិក្ខត្តុញ្ច, ទេវរជ្ជមការយិំ;

សតានំ បញ្ចក្ខត្តុញ្ច, ចក្កវត្តី អហោសហំ;

បទេសរជ្ជំ វិបុលំ, គណនាតោ អសង្ខិយំ.

១២៣. ‘‘ភវាភវេ សំសរន្តោ, លភាមិ អមិតំ ធនំ;

ភោគេ មេ ឩនតា នត្ថិ, នវសស្សស្សិទំ ផលំ.

១២៤. ‘‘ហត្ថិយានំ អស្សយានំ, សិវិកំ សន្ទមានិកំ;

លភាមិ សព្ពមេវេតំ [សព្ពមេតម្បិ (ក.)], នវសស្សស្សិទំ ផលំ.

១២៥. ‘‘នវវត្ថំ នវផលំ, នវគ្គរសភោជនំ;

លភាមិ សព្ពមេវេតំ, នវសស្សស្សិទំ ផលំ.

១២៦. ‘‘កោសេយ្យកម្ពលិយានិ, ខោមកប្បាសិកានិ ច;

លភាមិ សព្ពមេវេតំ, នវសស្សស្សិទំ ផលំ.

១២៧. ‘‘ទាសីគណំ ទាសគណំ, នារិយោ ច អលង្កតា;

លភាមិ សព្ពមេវេតំ, នវសស្សស្សិទំ ផលំ.

១២៨. ‘‘ន មំ សីតំ វា ឧណ្ហំ វា, បរិឡាហោ ន វិជ្ជតិ;

អថោ ចេតសិកំ ទុក្ខំ, ហទយេ មេ ន វិជ្ជតិ.

១២៩. ‘‘ឥទំ ខាទ ឥទំ ភុញ្ជ, ឥមម្ហិ សយនេ សយ;

លភាមិ សព្ពមេវេតំ, នវសស្សស្សិទំ ផលំ.

១៣០. ‘‘អយំ បច្ឆិមកោ ទានិ, ចរិមោ វត្តតេ ភវោ;

អជ្ជាបិ ទេយ្យធម្មោ មេ, ផលំ តោសេសិ សព្ពទា.

១៣១. ‘‘នវសស្សំ ទទិត្វាន, សង្ឃេ គណវរុត្តមេ;

អដ្ឋានិសំសេ អនុភោមិ, កម្មានុច្ឆវិកេ មម.

១៣២. ‘‘វណ្ណវា យសវា ហោមិ, មហាភោគោ អនីតិកោ;

មហាបក្ខោ [មហាភក្ខោ (ស្យា. ក.)] សទា ហោមិ, អភេជ្ជបរិសោ សទា.

១៣៣. ‘‘សព្ពេ មំ អបចាយន្តិ, យេ កេចិ បថវិស្សិតា;

ទេយ្យធម្មា ច យេ កេចិ, បុរេ បុរេ លភាមហំ.

១៣៤. ‘‘ភិក្ខុសង្ឃស្ស វា មជ្ឈេ, ពុទ្ធសេដ្ឋស្ស សម្មុខា;

សព្ពេបិ សមតិក្កម្ម, ទេន្តិ មមេវ ទាយកា.

១៣៥. ‘‘បឋមំ នវសស្សញ្ហិ, ទត្វា សង្ឃេ គណុត្តមេ;

ឥមានិសំសេ អនុភោមិ, នវសស្សស្សិទំ ផលំ.

១៣៦. ‘‘សតសហស្សិតោ កប្បេ, យំ ទានមទទិំ តទា;

ទុគ្គតិំ នាភិជានាមិ, នវសស្សស្សិទំ ផលំ.

១៣៧. ‘‘កិលេសា ឈាបិតា មយ្ហំ…បេ… វិហរាមិ អនាសវោ;

១៣៨. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

១៣៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សុចិន្តិតោ ថេរោ ឥមា គាថាយោ

អភាសិត្ថាតិ.

សុចិន្តិតត្ថេរស្សាបទានំ អដ្ឋមំ.