៦. ឃតមណ្ឌទាយកត្ថេរអបទានំ

៧៨. ‘‘សុចិន្តិតំ ភគវន្តំ, លោកជេដ្ឋំ នរាសភំ;

ឧបវិដ្ឋំ មហារញ្ញំ, វាតាពាធេន បីឡិតំ.

៧៩. ‘‘ទិស្វា ចិត្តំ បសាទេត្វា, ឃតមណ្ឌមុបានយិំ;

កតត្តា អាចិតត្តា ច, គង្គា ភាគីរថី អយំ.

៨០. ‘‘មហាសមុទ្ទា ចត្តារោ, ឃតំ សម្បជ្ជរេ មម;

អយញ្ច បថវី ឃោរា, អប្បមាណា អសង្ខិយា.

៨១. ‘‘មម សង្កប្បមញ្ញាយ, ភវតេ មធុសក្ករា;

ចាតុទ្ទីបា [ចតុទ្ទិសា (ស្យា.)] ឥមេ រុក្ខា, បាទបា ធរណីរុហា.

៨២. ‘‘មម សង្កប្បមញ្ញាយ, កប្បរុក្ខា ភវន្តិ តេ;

បញ្ញាសក្ខត្តុំ ទេវិន្ទោ, ទេវរជ្ជមការយិំ.

៨៣. ‘‘ឯកបញ្ញាសក្ខត្តុញ្ច, ចក្កវត្តី អហោសហំ;

បទេសរជ្ជំ វិបុលំ, គណនាតោ អសង្ខិយំ.

៨៤. ‘‘ចតុន្នវុតិតោ កប្បេ, យំ ទានមទទិំ តទា;

ទុគ្គតិំ នាភិជានាមិ, ឃតមណ្ឌស្សិទំ ផលំ.

៨៥. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៨៦. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៨៧. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ឃតមណ្ឌទាយកោ ថេរោ ឥមា គាថាយោ

អភាសិត្ថាតិ.

ឃតមណ្ឌទាយកត្ថេរស្សាបទានំ ឆដ្ឋំ.