១០. សោណ្ណកោន្តរិកត្ថេរអបទានំ

១៥៧. ‘‘មនោភាវនិយំ ពុទ្ធំ, អត្តទន្តំ សមាហិតំ;

ឥរិយមានំ ព្រហ្មបថេ, ចិត្តវូបសមេ រតំ.

១៥៨. ‘‘និត្តិណ្ណឱឃំ សម្ពុទ្ធំ, ឈាយិំ ឈានរតំ មុនិំ;

ឧបតិត្ថំ សមាបន្នំ, ឥន្ទិវរទលប្បភំ.

១៥៩. ‘‘អលាពុនោទកំ គយ្ហ, ពុទ្ធសេដ្ឋំ ឧបាគមិំ;

ពុទ្ធស្ស បាទេ ធោវិត្វា, អលាពុកមទាសហំ.

១៦០. ‘‘អាណាបេសិ ច សម្ពុទ្ធោ, បទុមុត្តរនាមកោ;

‘ឥមិនា ទកមាហត្វា, បាទមូលេ ឋបេហិ មេ’.

១៦១. ‘‘សាធូតិហំ បដិស្សុត្វា, សត្ថុគារវតាយ ច;

ទកំ អលាពុនាហត្វា, ពុទ្ធសេដ្ឋំ ឧបាគមិំ.

១៦២. ‘‘អនុមោទិ មហាវីរោ, ចិត្តំ និព្ពាបយំ មម;

‘ឥមិនាលាពុទានេន, សង្កប្បោ តេ សមិជ្ឈតុ’.

១៦៣. ‘‘បន្នរសេសុ កប្បេសុ, ទេវលោកេ រមិំ អហំ;

តិំសតិក្ខត្តុំ រាជា ច, ចក្កវត្តី អហោសហំ.

១៦៤. ‘‘ទិវា វា យទិ វា រត្តិំ, ចង្កមន្តស្ស តិដ្ឋតោ;

សោវណ្ណំ កោន្តរំ គយ្ហ, តិដ្ឋតេ បុរតោ មម.

១៦៥. ‘‘ពុទ្ធស្ស ទត្វានលាពុំ, លភាមិ សោណ្ណកោន្តរំ;

អប្បកម្បិ កតំ ការំ, វិបុលំ ហោតិ តាទិសុ.

១៦៦. ‘‘សតសហស្សិតោ កប្បេ, យំលាពុមទទិំ តទា;

ទុគ្គតិំ នាភិជានាមិ, អលាពុស្ស ឥទំ ផលំ.

១៦៧. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

១៦៨. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

១៦៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សោណ្ណកោន្តរិកោ ថេរោ ឥមា

គាថាយោ អភាសិត្ថាតិ.

សោណ្ណកោន្តរិកត្ថេរស្សាបទានំ ទសមំ.

សកិំសម្មជ្ជកវគ្គោ តេចត្តាលីសមោ.