៨. យាគុទាយកត្ថេរអបទានំ

១៤៩. ‘‘អតិថិំ [អតីតំ (ក.)] មេ គហេត្វាន, អគច្ឆិំ គាមកំ តទា;

សម្បុណ្ណនទិកំ ទិស្វា, សង្ឃារាមំ ឧបាគមិំ.

១៥០. ‘‘អារញ្ញកា ធុតធរា, ឈាយិនោ លូខចីវរា;

វិវេកាភិរតា ធីរា, សង្ឃារាមេ វសន្តិ តេ.

១៥១. ‘‘គតិ តេសំ ឧបច្ឆិន្នា, សុវិមុត្តាន តាទិនំ;

បិណ្ឌាយ តេ ន គច្ឆន្តិ, ឱរុទ្ធនទិតាយ ហិ [ឱរុទ្ធនទិកាយតិំ (ស្យា.)].

១៥២. ‘‘បសន្នចិត្តោ សុមនោ, វេទជាតោ កតញ្ជលី;

តណ្ឌុលំ មេ គហេត្វាន, យាគុទានំ អទាសហំ.

១៥៣. ‘‘បញ្ចន្នំ យាគុំ ទត្វាន, បសន្នោ សេហិ បាណិភិ;

សកកម្មាភិរទ្ធោហំ, តាវតិំសមគច្ឆហំ.

១៥៤. ‘‘មណិមយញ្ច មេ ព្យម្ហំ, និព្ពត្តិ តិទសេ គណេ;

នារីគណេហិ សហិតោ, មោទាមិ ព្យម្ហមុត្តមេ.

១៥៥. ‘‘តេត្តិំសក្ខត្តុំ ទេវិន្ទោ, ទេវរជ្ជមការយិំ;

តិំសក្ខត្តុំ ចក្កវត្តី, មហារជ្ជមការយិំ.

១៥៦. ‘‘បទេសរជ្ជំ វិបុលំ, គណនាតោ អសង្ខិយំ;

ទេវលោកេ មនុស្សេ វា, អនុភោត្វា សយំ [យសំ (ស្យា.)] អហំ.

១៥៧. ‘‘បច្ឆិមេ ភវេ សម្បត្តេ, បព្ពជិំ អនគារិយំ;

សហ ឱរោបិតេ កេសេ, សព្ពំ សម្បដិវិជ្ឈហំ.

១៥៨. ‘‘ខយតោ វយតោ ចាបិ, សម្មសន្តោ កឡេវរំ;

បុរេ សិក្ខាបទាទានា, អរហត្តមបាបុណិំ.

១៥៩. ‘‘សុទិន្នំ មេ ទានវរំ, វាណិជ្ជំ សម្បយោជិតំ;

តេនេវ យាគុទានេន, បត្តោម្ហិ អចលំ បទំ.

១៦០. ‘‘សោកំ បរិទ្ទវំ ព្យាធិំ, ទរថំ ចិត្តតាបនំ;

នាភិជានាមិ ឧប្បន្នំ, យាគុទានស្សិទំ ផលំ.

១៦១. ‘‘យាគុំ សង្ឃស្ស ទត្វាន, បុញ្ញក្ខេត្តេ អនុត្តរេ;

បញ្ចានិសំសេ អនុភោមិ, អហោ យាគុសុយិដ្ឋតា.

១៦២. ‘‘អព្យាធិតា រូបវតា, ខិប្បំ ធម្មនិសន្តិតា [និពុជ្ឈិតា (ស្យា.)];

លាភិតា អន្នបានស្ស, អាយុ បញ្ចមកំ មម.

១៦៣. ‘‘យោ កោចិ វេទំ ជនយំ, សង្ឃេ យាគុំ ទទេយ្យ សោ;

ឥមានិ បញ្ច ឋានានិ, បដិគណ្ហេយ្យ បណ្ឌិតោ.

១៦៤. ‘‘ករណីយំ កតំ សព្ពំ, ភវា ឧគ្ឃាដិតា មយា;

សព្ពាសវា បរិក្ខីណា, នត្ថិ ទានិ បុនព្ភវោ.

១៦៥. ‘‘សោ អហំ វិចរិស្សាមិ, គាមា គាមំ បុរា បុរំ;

នមស្សមានោ សម្ពុទ្ធំ, ធម្មស្ស ច សុធម្មតំ.

១៦៦. ‘‘តិំសកប្បសហស្សម្ហិ, យំ ទានមទទិំ តទា;

ទុគ្គតិំ នាភិជានាមិ, យាគុទានស្សិទំ ផលំ.

១៦៧. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

១៦៨. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

១៦៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា យាគុទាយកោ ថេរោ ឥមា គាថាយោ អភាសិត្ថាតិ.

យាគុទាយកត្ថេរស្សាបទានំ អដ្ឋមំ.