៩. បត្ថោទនទាយកត្ថេរអបទានំ

១៧០. ‘‘វនចារី បុរេ អាសិំ, សតតំ វនកម្មិកោ;

បត្ថោទនំ គហេត្វាន, កម្មន្តំ អគមាសហំ.

១៧១. ‘‘តត្ថទ្ទសាសិំ សម្ពុទ្ធំ, សយម្ភុំ អបរាជិតំ;

វនា បិណ្ឌាយ និក្ខន្តំ, ទិស្វា ចិត្តំ បសាទយិំ.

១៧២. ‘‘បរកម្មាយនេ [វយកម្មាយនេ (ក.)] យុត្តោ, បុញ្ញញ្ច មេ ន វិជ្ជតិ;

អយំ បត្ថោទនោ អត្ថិ, ភោជយិស្សាមហំ [ភោជយិស្សាមិ មំ (ស្យា.)] មុនិំ.

១៧៣. ‘‘បត្ថោទនំ គហេត្វាន, សយម្ភុស្ស អទាសហំ;

មម និជ្ឈាយមានស្ស, បរិភុញ្ជិ តទា មុនិ.

១៧៤. ‘‘តេន កម្មេន សុកតេន, ចេតនាបណិធីហិ ច;

ជហិត្វា មានុសំ ទេហំ, តាវតិំសមគច្ឆហំ.

១៧៥. ‘‘ឆត្តិំសក្ខត្តុំ ទេវិន្ទោ, ទេវរជ្ជមការយិំ;

តេត្តិំសក្ខត្តុំ រាជា ច, ចក្កវត្តី អហោសហំ.

១៧៦. ‘‘បទេសរជ្ជំ វិបុលំ, គណនាតោ អសង្ខិយំ;

សុខិតោ យសវា ហោមិ, បត្ថោទនស្សិទំ ផលំ.

១៧៧. ‘‘ភវាភវេ សំសរន្តោ, លភាមិ អមិតំ ធនំ;

ភោគេ មេ ឩនតា នត្ថិ, បត្ថោទនស្សិទំ ផលំ.

១៧៨. ‘‘នទីសោតបដិភាគា, ភោគា និព្ពត្តរេ មម;

បរិមេតុំ ន សក្កោមិ, បត្ថោទនស្សិទំ ផលំ.

១៧៩. ‘‘ឥមំ ខាទ ឥមំ ភុញ្ជ, ឥមម្ហិ សយនេ សយ;

តេនាហំ សុខិតោ ហោមិ, បត្ថោទនស្សិទំ ផលំ.

១៨០. ‘‘ចតុន្នវុតិតោ កប្បេ, យំ ទានមទទិំ តទា;

ទុគ្គតិំ នាភិជានាមិ, បត្ថោទនស្សិទំ ផលំ.

១៨១. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

១៨២. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

១៨៣. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បត្ថោទនទាយកោ ថេរោ ឥមា គាថាយោ អភាសិត្ថាតិ.

បត្ថោទនទាយកត្ថេរស្សាបទានំ នវមំ.