៧. ឧច្ឆង្គបុប្ផិយត្ថេរអបទានំ

១៤២. ‘‘នគរេ ពន្ធុមតិយា, អហោសិំ មាលិកោ តទា;

ឧច្ឆង្គំ បូរយិត្វាន, អគមំ អន្តរាបណំ.

១៤៣. ‘‘ភគវា តម្ហិ សមយេ, ភិក្ខុសង្ឃបុរក្ខតោ;

មហតា អានុភាវេន, និយ្យាតិ លោកនាយកោ.

១៤៤. ‘‘ទិស្វាន លោកបជ្ជោតំ, វិបស្សិំ លោកតារណំ;

បុប្ផំ បគ្គយ្ហ ឧច្ឆង្គា, ពុទ្ធសេដ្ឋំ អបូជយិំ.

១៤៥. ‘‘ឯកនវុតិតោ កប្បេ, យំ បុប្ផមភិបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

១៤៦. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

១៤៧. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

១៤៨. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ឧច្ឆង្គបុប្ផិយោ ថេរោ ឥមា គាថាយោ អភាសិត្ថាតិ.

ឧច្ឆង្គបុប្ផិយត្ថេរស្សាបទានំ សត្តមំ.