៦. ឯកទីបិយត្ថេរអបទានំ

១២៤. ‘‘បរិនិព្ពុតេ សុគតេ, សិទ្ធត្ថេ លោកនាយកេ;

សទេវមានុសា សព្ពេ, បូជេន្តិ ទ្វិបទុត្តមំ.

១២៥. ‘‘អារោបិតេ ច ចិតកេ, សិទ្ធត្ថេ លោកនាយកេ;

យថាសកេន ថាមេន, ចិតំ បូជេន្តិ សត្ថុនោ.

១២៦. ‘‘អវិទូរេ ចិតកស្ស, ទីបំ ឧជ្ជាលយិំ អហំ;

យាវ ឧទេតិ សូរិយោ, ទីបំ មេ តាវ ឧជ្ជលិ.

១២៧. ‘‘តេន កម្មេន សុកតេន, ចេតនាបណិធីហិ ច;

ជហិត្វា មានុសំ ទេហំ, តាវតិំសមគច្ឆហំ.

១២៨. ‘‘តត្ថ មេ សុកតំ ព្យម្ហំ, ឯកទីបីតិ ញាយតិ;

ទីបសតសហស្សានិ, ព្យម្ហេ បជ្ជលរេ មម.

១២៩. ‘‘ឧទយន្តោវ សូរិយោ, ទេហោ មេ ជោតតេ សទា;

សប្បភាហិ សរីរស្ស, អាលោកោ ហោតិ មេ សទា.

១៣០. ‘‘តិរោកុដ្ដំ [តិរោកុឌ្ឌំ (សី. ស្យា. ក.)] តិរោសេលំ, សមតិគ្គយ្ហ [សព្ពត្ថបិ ឯវមេវ ទិស្សតិ] បព្ពតំ;

សមន្តា យោជនសតំ, បស្សាមិ ចក្ខុនា អហំ.

១៣១. ‘‘សត្តសត្តតិក្ខត្តុញ្ច, ទេវលោកេ រមិំ អហំ;

ឯកតិំសតិក្ខត្តុញ្ច, ទេវរជ្ជមការយិំ.

១៣២. ‘‘អដ្ឋវីសតិក្ខត្តុញ្ច, ចក្កវត្តី អហោសហំ;

បទេសរជ្ជំ វិបុលំ, គណនាតោ អសង្ខិយំ.

១៣៣. ‘‘ទេវលោកា ចវិត្វាន, និព្ពត្តិំ មាតុកុច្ឆិយំ;

មាតុកុច្ឆិគតស្សាបិ, អក្ខិ មេ ន និមីលតិ.

១៣៤. ‘‘ជាតិយា ចតុវស្សោហំ, បព្ពជិំ អនគារិយំ;

អឌ្ឍមាសេ អសម្បត្តេ, អរហត្តមបាបុណិំ.

១៣៥. ‘‘ទិព្ពចក្ខុំ វិសោធេសិំ, ភវា សព្ពេ សមូហតា;

សព្ពេ កិលេសា សញ្ឆិន្នា, ឯកទីបស្សិទំ ផលំ.

១៣៦. ‘‘តិរោកុដ្ដំ តិរោសេលំ, បព្ពតញ្ចាបិ កេវលំ;

សមតិក្កម្ម [សព្ពត្ថបី ឯវមេវ ទិស្សតិ] បស្សាមិ, ឯកទីបស្សិទំ ផលំ.

១៣៧. ‘‘វិសមា មេ សមា ហោន្តិ, អន្ធការោ ន វិជ្ជតិ;

នាហំ បស្សាមិ តិមិរំ, ឯកទីបស្សិទំ ផលំ.

១៣៨. ‘‘ចតុន្នវុតិតោ កប្បេ, យំ ទីបមទទិំ តទា;

ទុគ្គតិំ នាភិជានាមិ, ឯកទីបស្សិទំ ផលំ.

១៣៩. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

១៤០. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

១៤១. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ឯកទីបិយោ ថេរោ ឥមា គាថាយោ អភាសិត្ថាតិ.

ឯកទីបិយត្ថេរស្សាបទានំ ឆដ្ឋំ.