៥. នាគបល្លវត្ថេរអបទានំ

១១៨. ‘‘នគរេ ពន្ធុមតិយា, រាជុយ្យានេ វសាមហំ;

មម អស្សមសាមន្តា, និសីទិ លោកនាយកោ.

១១៩. ‘‘នាគបល្លវមាទាយ, ពុទ្ធស្ស អភិរោបយិំ;

បសន្នចិត្តោ សុមនោ, សុគតំ អភិវាទយិំ.

១២០. ‘‘ឯកនវុតិតោ កប្បេ, យំ បល្លវមបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

១២១. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

១២២. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

១២៣. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា នាគបល្លវោ ថេរោ ឥមា គាថាយោ អភាសិត្ថាតិ.

នាគបល្លវត្ថេរស្សាបទានំ បញ្ចមំ.