៤. មធុមំសទាយកត្ថេរអបទានំ

១០៦. ‘‘នគរេ ពន្ធុមតិយា, សូករិកោ អហោសហំ;

ឧក្កោដំ រន្ធយិត្វាន [ឧក្កោដកំ រន្ធយិត្វា (សី. ស្យា.)], មធុមំសម្ហិ [មធុសប្បិម្ហិ (បី.), មធុំ មំសម្ហិ (ក.)] ឱកិរិំ.

១០៧. ‘‘សន្និបាតំ អហំ គន្ត្វា, ឯកំ បត្តំ គហេសហំ;

បូរយិត្វាន តំ បត្តំ, ភិក្ខុសង្ឃស្សទាសហំ.

១០៨. ‘‘យោត្ថ ថេរតរោ ភិក្ខុ, និយ្យាទេសិ មមំ តទា;

ឥមិនា បត្តបូរេន, លភស្សុ វិបុលំ សុខំ.

១០៩. ‘‘ទុវេ សម្បត្តិយោ ភុត្វា, សុក្កមូលេន ចោទិតោ;

បច្ឆិមេ វត្តមានម្ហិ, កិលេសេ ឈាបយិស្សតិ.

១១០. ‘‘តត្ថ ចិត្តំ បសាទេត្វា, តាវតិំសមគច្ឆហំ;

តត្ថ ភុត្វា បិវិត្វា ច, លភាមិ វិបុលំ សុខំ.

១១១. ‘‘មណ្ឌបេ រុក្ខមូលេ វា, បុព្ពកម្មំ អនុស្សរិំ;

អន្នបានាភិវស្សោ មេ, អភិវស្សតិ តាវទេ.

១១២. ‘‘ឥទំ បច្ឆិមកំ មយ្ហំ, ចរិមោ វត្តតេ ភវោ;

ឥធាបិ អន្នបានំ មេ, វស្សតេ សព្ពកាលិកំ.

១១៣. ‘‘តេនេវ មធុទានេន [មំសទានេន (សី. បី.)], សន្ធាវិត្វា ភវេ អហំ;

សព្ពាសវេ បរិញ្ញាយ, វិហរាមិ អនាសវោ.

១១៤. ‘‘ឯកនវុតិតោ កប្បេ, យំ ទានមទទិំ តទា;

ទុគ្គតិំ នាភិជានាមិ, មធុទានស្សិទំ ផលំ.

១១៥. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

១១៦. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

១១៧. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា មធុមំសទាយកោ ថេរោ ឥមា គាថាយោ អភាសិត្ថាតិ.

មធុមំសទាយកត្ថេរស្សាបទានំ ចតុត្ថំ.