៣. តិណសូលកឆាទនិយត្ថេរអបទានំ

៧៩. ‘‘ជាតិំ ជរញ្ច មរណំ, បច្ចវេក្ខិំ អហំ តទា;

ឯកកោ អភិនិក្ខម្ម, បព្ពជិំ អនគារិយំ.

៨០. ‘‘ចរមានោនុបុព្ពេន, គង្គាតីរំ ឧបាគមិំ;

តត្ថទ្ទសាសិំ បថវិំ, គង្គាតីរេ សមុន្នតំ.

៨១. ‘‘អស្សមំ តត្ថ មាបេត្វា, វសាមិ អស្សមេ អហំ;

សុកតោ ចង្កមោ មយ្ហំ, នានាទិជគណាយុតោ.

៨២. ‘‘មមុបេន្តិ ច វិស្សត្ថា, កូជន្តិ ច មនោហរំ;

រមមានោ សហ តេហិ, វសាមិ អស្សមេ អហំ.

៨៣. ‘‘មម អស្សមសាមន្តា, មិគរាជា ចតុក្កមោ;

អាសយា អភិនិក្ខម្ម, គជ្ជិ សោ អសនី វិយ.

៨៤. ‘‘នទិតេ មិគរាជេ ច, ហាសោ មេ ឧទបជ្ជថ;

មិគរាជំ គវេសន្តោ, អទ្ទសំ លោកនាយកំ.

៨៥. ‘‘ទិស្វានាហំ ទេវទេវំ, តិស្សំ លោកគ្គនាយកំ;

ហដ្ឋោ ហដ្ឋេន ចិត្តេន, បូជយិំ នាគកេសរំ.

៨៦. ‘‘ឧគ្គច្ឆន្តំវ សូរិយំ, សាលរាជំវ បុប្ផិតំ;

ឱសធិំវ វិរោចន្តំ, សន្ថវិំ លោកនាយកំ.

៨៧. ‘‘‘តវ ញាណេន សព្ពញ្ញុ, មោចេសិមំ សទេវកំ;

តវំ អារាធយិត្វាន, ជាតិយា បរិមុច្ចរេ.

៨៨. ‘‘‘អទស្សនេន សព្ពញ្ញុ, ពុទ្ធានំ សព្ពទស្សិនំ;

បតន្តិវីចិនិរយំ, រាគទោសេហិ ឱផុដា [ឱត្ថដា (ស្យា.)].

៨៩. ‘‘‘តវ ទស្សនមាគម្ម, សព្ពញ្ញុ លោកនាយក;

បមុច្ចន្តិ ភវា សព្ពា, ផុសន្តិ អមតំ បទំ.

៩០. ‘‘‘យទា ពុទ្ធា ចក្ខុមន្តោ, ឧប្បជ្ជន្តិ បភង្ករា;

កិលេសេ ឈាបយិត្វាន, អាលោកំ ទស្សយន្តិ តេ’.

៩១. ‘‘កិត្តយិត្វាន សម្ពុទ្ធំ, តិស្សំ លោកគ្គនាយកំ;

ហដ្ឋោ ហដ្ឋេន ចិត្តេន, តិណសូលំ អបូជយិំ.

៩២. ‘‘មម សង្កប្បមញ្ញាយ, តិស្សោ លោកគ្គនាយកោ;

សកាសនេ និសីទិត្វា, ឥមា គាថា អភាសថ.

៩៣. ‘‘‘យោ មំ បុប្ផេហិ ឆាទេសិ, បសន្នោ សេហិ បាណិភិ;

តមហំ កិត្តយិស្សាមិ, សុណាថ មម ភាសតោ.

៩៤. ‘‘‘បញ្ចវីសតិក្ខត្តុំ សោ, ទេវរជ្ជំ ករិស្សតិ;

បញ្ចសត្តតិក្ខត្តុញ្ច, ចក្កវត្តី ភវិស្សតិ.

៩៥. ‘‘‘បទេសរជ្ជំ វិបុលំ, គណនាតោ អសង្ខិយំ;

តស្ស កម្មនិស្សន្ទេន [កម្មស្ស និស្សន្ទោ (សី. ស្យា. បី.)], បុប្ផានំ បូជនាយ ច [សោ (ស្យា. បី.)].

៩៦. ‘‘‘សីសំន្ហាតោ ចយំ បោសោ, បុប្ផមាកង្ខតេ យទិ [សាយំ បាតោ ចយំ បោសោ, បុប្ផេហិ មំ អឆាទយិ (ស្យា.)];

បុញ្ញកម្មេន សំយុត្តំ [សំយុត្តោ (សី. ស្យា. បី.)], បុរតោ បាតុភវិស្សតិ.

៩៧. ‘‘‘យំ យំ ឥច្ឆតិ កាមេហិ, តំ តំ បាតុភវិស្សតិ;

សង្កប្បំ បរិបូរេត្វា, និព្ពាយិស្សតិនាសវោ’.

អដ្ឋារសមំ ភាណវារំ.

៩៨. ‘‘កិលេសេ ឈាបយិត្វាន, សម្បជានោ បតិស្សតោ;

ឯកាសនេ និសីទិត្វា, អរហត្តមបាបុណិំ.

៩៩. ‘‘ចង្កមន្តោ និបជ្ជន្តោ, និសិន្នោ ឧទ វា ឋិតោ;

ពុទ្ធសេដ្ឋំ សរិត្វាន, វិហរាមិ អហំ សទា.

១០០. ‘‘ចីវរេ បិណ្ឌបាតេ ច, បច្ចយេ សយនាសនេ;

តត្ថ មេ ឩនតា នត្ថិ, ពុទ្ធបូជាយិទំ ផលំ.

១០១. ‘‘សោ ទានិ បត្តោ អមតំ, សន្តំ បទមនុត្តរំ;

សព្ពាសវេ បរិញ្ញាយ, វិហរាមិ អនាសវោ.

១០២. ‘‘ទ្វេនវុតេ ឥតោ កប្បេ, យំ បុប្ផមភិបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

១០៣. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

១០៤. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

១០៥. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា តិណសូលកឆាទនិយោ [តិណសូលិកឆាទនិយោ (ក.)] ថេរោ ឥមា គាថាយោ អភាសិត្ថាតិ.

តិណសូលកឆាទនិយត្ថេរស្សាបទានំ តតិយំ.