៩. ជតុកណ្ណិត្ថេរអបទានំ

២៧៦. ‘‘នគរេ ហំសវតិយា, សេដ្ឋិបុត្តោ អហោសហំ;

សមប្បិតោ កាមគុណេ, បរិចារេមហំ តទា.

២៧៧. ‘‘តតោ [តយោ (សី.)] បាសាទមារុយ្ហ, មហាភោគេ វលញ្ជកោ [ឧព្ពិទ្ធា គេហលុញ្ជកា (ក.), ឧព្ពិទ្ធាគេហលញ្ឆកា (សី.)];

តត្ថ នច្ចេហិ គីតេហិ, បរិចារេមហំ តទា.

២៧៨. ‘‘តូរិយា អាហតា មយ្ហំ, សម្មតាឡសមាហិតា;

នច្ចន្តា [រញ្ជន្តី (ស្យា.), រជ្ជន្តា (ក.)] ឥត្ថិយោ សព្ពា, ហរន្តិយេវ មេ មនោ.

២៧៩. ‘‘ចេលាបិកា [ចេលាវកា (ស្យា.), វេលាមិកា (បី.)] លាមណិកា [វាមនិកា (ស្យា. បី.)], កុញ្ជវាសី តិមជ្ឈិកា [កុញ្ជវា សីហិមជ្ឈិតា (ស្យា.), កុជ្ជា វា សីហិមជ្ឈិកា (បី.)];

លង្ឃិកា សោកជ្ឈាយី ច, បរិវារេន្តិ មំ សទា.

២៨០. ‘‘វេតាឡិនោ កុម្ភថូនី, នដា ច នច្ចកា ពហូ;

នដកា នាដកា ចេវ, បរិវារេន្តិ មំ សទា.

២៨១. ‘‘កប្បកា ន្ហាបកា សូទា, មាលាការា សុបាសកា [សុមាបកា (សី. ស្យា.)];

ជល្លា មល្លា ច តេ សព្ពេ, បរិវារេន្តិ មំ សទា.

២៨២. ‘‘ឯតេសុ កីឡមានេសុ, សិក្ខិតេ កតុបាសនេ;

រត្តិន្ទិវំ ន ជានាមិ, ឥន្ទោវ តិទសង្គណេ.

២៨៣. ‘‘អទ្ធិកា បថិកា សព្ពេ, យាចកា វរកា ពហូ;

ឧបគច្ឆន្តិ តេ និច្ចំ, ភិក្ខយន្តា មមំ ឃរំ.

២៨៤. ‘‘សមណា ព្រាហ្មណា ចេវ, បុញ្ញក្ខេត្តា អនុត្តរា;

វឌ្ឍយន្តា មមំ បុញ្ញំ, អាគច្ឆន្តិ មមំ ឃរំ.

២៨៥. ‘‘បដគា [បដកា (សី. ស្យា.), បទកា (បី.)] លដុកា [លដកា (សី.)] សព្ពេ, និគណ្ឋា បុប្ផសាដកា;

តេទណ្ឌិកា ឯកសិខា, អាគច្ឆន្តិ មមំ ឃរំ.

២៨៦. ‘‘អាជីវកា វិលុត្តាវី, គោធម្មា ទេវធម្មិកា;

រជោជល្លធរា ឯតេ, អាគច្ឆន្តិ មមំ ឃរំ.

២៨៧. ‘‘បរិត្តកា សន្តិបត្តា [បរិវត្តកា សិទ្ធិបត្តា (សី. ស្យា. បី.)], កោធបុគ្គនិកា [កោណ្ឌបុគ្គណិកា (សី.), កោណ្ឌបុគ្គលិកា (បី.)] ពហូ;

តបស្សី វនចារី ច, អាគច្ឆន្តិ មមំ ឃរំ.

២៨៨. ‘‘ឱឌ្ឌកា ទមិឡា ចេវ, សាកុឡា មលវាឡកា [មលយាលកា (សី. ស្យា. បី.)];

សវរា យោនកា ចេវ, អាគច្ឆន្តិ មមំ ឃរំ.

២៨៩. ‘‘អន្ធកា មុណ្ឌកា សព្ពេ, កោដលា ហនុវិន្ទកា [កោលកា សានុវិន្ទកា (សី. បី.)];

អារាវចីនរដ្ឋា ច, អាគច្ឆន្តិ មមំ ឃរំ.

២៩០. ‘‘អលសន្ទកា [អលសន្តា (ក.)] បល្លវកា, ធម្មរា និគ្គមានុសា [ពព្ពរា ភគ្គការុសា (សី.)];

គេហិកា [រោហិតា (សី.), ពាហិកា (បី.)] ចេតបុត្តា ច, អាគច្ឆន្តិ មមំ ឃរំ.

២៩១. ‘‘មាធុរកា កោសលកា, កលិង្គា [កាសិកា (សី.)] ហត្ថិបោរិកា;

ឥសិណ្ឌា មក្កលា ចេវ, អាគច្ឆន្តិ មមំ ឃរំ.

២៩២. ‘‘ចេលាវកា អារព្ភា [អរម្មា (សី. បី.)] ច, ឱឃុឡ្ហា [ឱក្កលា (សី.)] មេឃលា ពហូ;

ខុទ្ទកា សុទ្ទកា ចេវ, អាគច្ឆន្តិ មមំ ឃរំ.

២៩៣. ‘‘រោហណា សិន្ធវា ចេវ, ចិតកា ឯកកណ្ណិកា;

សុរដ្ឋា អបរន្តា ច, អាគច្ឆន្តិ មមំ ឃរំ.

២៩៤. ‘‘សុប្បារកា កុមារា [កិកុមារា (សី. បី.)] ច, មល្លសោវណ្ណភូមិកា [មលយា សោណ្ណភូមិកា (សី. ស្យា. បី.)];

វជ្ជីតង្គា [វជ្ជី តារា (សី.), វជ្ជីហារា (ស្យា. បី.)] ច តេ សព្ពេ, អាគច្ឆន្តិ មមំ ឃរំ.

២៩៥. ‘‘នឡការា បេសការា, ចម្មការា ច តច្ឆកា;

កម្មារា កុម្ភការា ច, អាគច្ឆន្តិ មមំ ឃរំ.

២៩៦. ‘‘មណិការា លោហការា, សោណ្ណការា ច ទុស្សិកា;

តិបុការា ច តេ សព្ពេ, អាគច្ឆន្តិ មមំ ឃរំ.

២៩៧. ‘‘ឧសុការា ភមការា, បេសការា ច គន្ធិកា;

រជកា តុន្នវាយា ច, អាគច្ឆន្តិ មមំ ឃរំ.

២៩៨. ‘‘តេលិកា កដ្ឋហារា ច, ឧទហារា ច បេស្សិកា;

សូបិកា សូបរក្ខា ច, អាគច្ឆន្តិ មមំ ឃរំ.

២៩៩. ‘‘ទោវារិកា អនីកដ្ឋា, ពន្ធិកា [វន្ទិកា (សី.), គន្ថិកា (ស្យា.), សន្ទិកា (បី.)] បុប្ផឆឌ្ឌកា;

ហត្ថារុហា ហត្ថិបាលា, អាគច្ឆន្តិ មមំ ឃរំ.

៣០០. ‘‘អានន្ទស្ស មហារញ្ញោ [អានន្ទស្ស នាម រញ្ញោ (ស្យា.), អរិន្ទមនាម រញ្ញោ (បី.)], មមត្ថស្ស [បមត្តស្ស (សី. បី.), សមគ្គស្ស (ស្យា.)] អទាសហំ;

សត្តវណ្ណេន រតនេន, ឩនត្ថំ [ឩនត្តំ (សី. ស្យា. បី.)] បូរយាមហំ.

៣០១. ‘‘យេ មយា កិត្តិតា សព្ពេ, នានាវណ្ណា ពហូ ជនា;

តេសាហំ ចិត្តមញ្ញាយ, តប្បយិំ រតនេនហំ.

៣០២. ‘‘វគ្គូសុ ភាសមានាសុ, វជ្ជមានាសុ ភេរិសុ;

សង្ខេសុ ធមយន្តេសុ, សកគេហេ រមាមហំ.

៣០៣. ‘‘ភគវា តម្ហិ សមយេ, បទុមុត្តរនាយកោ;

វសីសតសហស្សេហិ, បរិក្ខីណាសវេហិ សោ.

៣០៤. ‘‘ភិក្ខូហិ សហិតោ វីថិំ, បដិបជ្ជិត្ថ ចក្ខុមា;

ឱភាសេន្តោ ទិសា សព្ពា, ទីបរុក្ខោវ ជោតតិ.

៣០៥. ‘‘វជ្ជន្តិ ភេរិយោ សព្ពា, គច្ឆន្តេ លោកនាយកេ;

បភា និទ្ធាវតេ តស្ស, សតរំសីវ ឧគ្គតោ.

៣០៦. ‘‘កវាដន្តរិកាយាបិ, បវិដ្ឋេន ច រស្មិនា;

អន្តោឃរេសុ វិបុលោ, អាលោកោ អាសិ តាវទេ.

៣០៧. ‘‘បភំ ទិស្វាន ពុទ្ធស្ស, បារិសជ្ជេ អវោចហំ;

និស្សំសយំ ពុទ្ធសេដ្ឋោ, ឥមំ វីថិមុបាគតោ.

៣០៨. ‘‘ខិប្បំ ឱរុយ្ហ បាសាទា, អគមិំ អន្តរាបណំ;

សម្ពុទ្ធំ អភិវាទេត្វា, ឥទំ វចនមព្រវិំ.

៣០៩. ‘‘‘អនុកម្បតុ មេ ពុទ្ធោ, ជលជុត្តមនាយកោ;

វសីសតសហស្សេហិ, អធិវាសេសិ សោ មុនិ’.

៣១០. ‘‘និមន្តេត្វាន សម្ពុទ្ធំ, អភិនេសិំ សកំ ឃរំ;

តត្ថ អន្នេន បានេន, សន្តប្បេសិំ មហាមុនិំ.

៣១១. ‘‘ភុត្តាវិំ កាលមញ្ញាយ, ពុទ្ធសេដ្ឋស្ស តាទិនោ;

សតង្គិកេន តូរិយេន, ពុទ្ធសេដ្ឋំ ឧបដ្ឋហិំ.

៣១២. ‘‘បទុមុត្តរោ លោកវិទូ, អាហុតីនំ បដិគ្គហោ;

អន្តោឃរេ និសីទិត្វា, ឥមា គាថា អភាសថ.

៣១៣. ‘‘‘យោ មំ តូរិយេហុបដ្ឋាសិ, អន្នបានញ្ចទាសិ មេ;

តមហំ កិត្តយិស្សាមិ, សុណាថ មម ភាសតោ.

៣១៤. ‘‘‘បហូតភក្ខោ ហុត្វាន, សហិរញ្ញោ សភោជនោ;

ចតុទីបេ ឯករជ្ជំ, ការយិស្សតិយំ នរោ.

៣១៥. ‘‘‘បញ្ចសីលេ សមាទាយ, ទសកម្មបថេ តតោ;

សមាទាយ បវត្តេន្តោ, បរិសំ សិក្ខាបយិស្សតិ.

៣១៦. ‘‘‘តូរិយសតសហស្សានិ, ភេរិយោ សមលង្កតា;

វជ្ជយិស្សន្តិមំ និច្ចំ, ឧបដ្ឋានស្សិទំ ផលំ.

៣១៧. ‘‘‘តិំសកប្បសហស្សានិ, ទេវលោកេ រមិស្សតិ;

ចតុសដ្ឋិក្ខត្តុំ ទេវិន្ទោ, ទេវរជ្ជំ ករិស្សតិ.

៣១៨. ‘‘‘ចតុសដ្ឋិក្ខត្តុំ រាជា, ចក្កវត្តី ភវិស្សតិ;

បទេសរជ្ជំ វិបុលំ, គណនាតោ អសង្ខិយំ.

៣១៩. ‘‘‘កប្បសតសហស្សម្ហិ, ឱក្កាកកុលសម្ភវោ;

គោតមោ នាម គោត្តេន, សត្ថា លោកេ ភវិស្សតិ.

៣២០. ‘‘‘ឧបបជ្ជតិ យំ យោនិំ, ទេវត្តំ អថ មានុសំ;

អនូនភោគោ ហុត្វាន, មនុស្សត្តំ គមិស្សតិ.

៣២១. ‘‘‘អជ្ឈាយកោ ភវិត្វាន, តិណ្ណំ វេទាន បារគូ;

ឧត្តមត្ថំ គវេសន្តោ, ចរិស្សតិ មហិំ ឥមំ.

៣២២. ‘‘‘សោ បច្ឆា បព្ពជិត្វាន, សុក្កមូលេន ចោទិតោ;

គោតមស្ស ភគវតោ, សាសនេភិរមិស្សតិ.

៣២៣. ‘‘‘អារាធយិត្វាន សម្ពុទ្ធំ, គោតមំ សក្យបុង្គវំ;

កិលេសេ ឈាបយិត្វាន, អរហាយំ ភវិស្សតិ’.

៣២៤. ‘‘វិបិនេ ព្យគ្ឃរាជាវ, មិគរាជាវ កេសរី;

អភីតោ វិហរាមជ្ជ, សក្យបុត្តស្ស សាសនេ.

៣២៥. ‘‘ទេវលោកេ មនុស្សេ វា, ទលិទ្ទេ ទុគ្គតិម្ហិ វា;

និព្ពត្តិំ មេ ន បស្សាមិ, ឧបដ្ឋានស្សិទំ ផលំ.

៣២៦. ‘‘វិវេកមនុយុត្តោម្ហិ, ឧបសន្តោ និរូបធិ;

នាគោវ ពន្ធនំ ឆេត្វា, វិហរាមិ អនាសវោ.

៣២៧. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៣២៨. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៣២៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ជតុកណ្ណិត្ថេរោ ឥមា គាថាយោ អភាសិត្ថាតិ.

ជតុកណ្ណិត្ថេរស្សាបទានំ នវមំ.