១០. ឧទេនត្ថេរអបទានំ

៣៣០. ‘‘ហិមវន្តស្សាវិទូរេ, បទុមោ នាម បព្ពតោ;

អស្សមោ សុកតោ មយ្ហំ, បណ្ណសាលា សុមាបិតា.

៣៣១. ‘‘នទិយោ សន្ទរេ តត្ថ, សុបតិត្ថា មនោរមា;

អច្ឆោទកា សីតជលា, សន្ទរេ នទិយោ សទា.

៣៣២. ‘‘បាឋីនា បាវុសា មច្ឆា, ពលជា មុញ្ជរោហិតា;

សោភេន្តា នទិយោ ឯតេ, វសន្តិ នទិយា សទា.

៣៣៣. ‘‘អម្ពជម្ពូហិ សញ្ឆន្នា, ករេរិតិលកា តថា;

ឧទ្ទាលកា បាដលិយោ, សោភេន្តិ មម អស្សមំ.

៣៣៤. ‘‘អង្កោលកា ពិម្ពិជាលា, មាយាការី ច បុប្ផិតា;

គន្ធេន ឧបវាយន្តា, សោភេន្តិ មម អស្សមំ.

៣៣៥. ‘‘អតិមុត្តា សត្តលិកា, នាគា សាលា ច បុប្ផិតា;

ទិព្ពគន្ធំ សម្បវន្តា, សោភេន្តិ មម អស្សមំ.

៣៣៦. ‘‘កោសម្ពា សឡលា នីបា, អដ្ឋង្គាបិ ច បុប្ផិតា [អដ្ឋង្គា ច សុបុប្ផិតា (សី.), កដ្ឋង្គា ច សុបុប្ផិតា (បី.)];

ទិព្ពគន្ធំ សម្បវន្តា, សោភេន្តិ មម អស្សមំ.

៣៣៧. ‘‘ហរីតកា អាមលកា, អម្ពជម្ពុវិភីតកា;

កោលា ភល្លាតកា ពិល្លា, ផលានិ ពហុ អស្សមេ.

៣៣៨. ‘‘កលម្ពា កន្ទលី តត្ថ, បុប្ផន្តិ មម អស្សមេ;

ទិព្ពគន្ធំ [ទិព្ពគន្ធា (សី. ស្យា. បី.) ឯវំ បរត្ថបិ] សម្បវន្តា, សោភេន្តិ មម អស្សមំ.

៣៣៩. ‘‘អសោកបិណ្ឌិវារី ច [អសោកបិណ្ឌី ច វរី (សី. ស្យា.), អសោកបិណ្ឌី ច វារី (បី.)], និម្ពរុក្ខា ច បុប្ផិតា;

ទិព្ពគន្ធំ សម្បវន្តា, សោភេន្តិ មម អស្សមំ.

៣៤០. ‘‘បុន្នាគា គិរិបុន្នាគា, តិមិរា តត្ថ បុប្ផិតា;

ទិព្ពគន្ធំ សម្បវន្តា, សោភេន្តិ មម អស្សមំ.

៣៤១. ‘‘និគ្គុណ្ឌី សិរិនិគ្គុណ្ឌី, ចម្បរុក្ខេត្ថ បុប្ផិតា;

ទិព្ពគន្ធំ សម្បវន្តា, សោភេន្តិ មម អស្សមំ.

៣៤២. ‘‘អវិទូរេ បោក្ខរណី, ចក្កវាកូបកូជិតា;

មន្ទាលកេហិ សញ្ឆន្នា, បទុមុប្បលកេហិ ច.

៣៤៣. ‘‘អច្ឆោទកា សីតជលា, សុបតិត្ថា មនោរមា;

អច្ឆា ផលិកសមានា, សោភេន្តិ មម អស្សមំ.

៣៤៤. ‘‘បទុមា បុប្ផរេ តត្ថ, បុណ្ឌរីកា ច ឧប្បលា;

មន្ទាលកេហិ សញ្ឆន្នា, សោភេន្តិ មម អស្សមំ.

៣៤៥. ‘‘បាឋីនា បាវុសា មច្ឆា, ពលជា មុញ្ជរោហិតា;

វិចរន្តាវ តេ តត្ថ, សោភេន្តិ មម អស្សមំ.

៣៤៦. ‘‘កុម្ភីលា សុសុមារា ច, កច្ឆបា ច គហា ពហូ;

ឱគហា អជគរា ច, សោភេន្តិ មម អស្សមំ.

៣៤៧. ‘‘បារេវតា រវិហំសា, ចក្កវាកា នទីចរា;

ទិន្ទិភា សាឡិកា ចេត្ថ, សោភេន្តិ មម អស្សមំ.

៣៤៨. ‘‘នយិតា អម្ពគន្ធី ច, កេតកា តត្ថ បុប្ផិតា;

ទិព្ពគន្ធំ សម្បវន្តា, សោភេន្តិ មម អស្សមំ.

៣៤៩. ‘‘សីហា ព្យគ្ឃា ច ទីបី ច, អច្ឆកោកតរច្ឆកា;

អនុសញ្ចរន្តា បវនេ, សោភេន្តិ មម អស្សមំ.

៣៥០. ‘‘ជដាភារេន ភរិតា, អជិនុត្តរវាសនា;

អនុសញ្ចរន្តា បវនេ, សោភេន្តិ មម អស្សមំ.

៣៥១. ‘‘អជិនានិធរា ឯតេ, និបកា សន្តវុត្តិនោ;

អប្បាហារាវ តេ សព្ពេ, សោភេន្តិ មម អស្សមំ.

៣៥២. ‘‘ខារិភារំ គហេត្វាន, អជ្ឈោគយ្ហ វនំ តទា;

មូលផលានិ ភុញ្ជន្តា, វសន្តិ អស្សមេ តទា.

៣៥៣. ‘‘ន តេ ទារុំ អាហរន្តិ, ឧទកំ បាទធោវនំ;

សព្ពេសំ អានុភាវេន, សយមេវាហរីយតិ.

៣៥៤. ‘‘ចុល្លាសីតិសហស្សានិ, ឥសយេត្ថ សមាគតា;

សព្ពេវ ឈាយិនោ ឯតេ, ឧត្តមត្ថគវេសកា.

៣៥៥. ‘‘តបស្សិនោ ព្រហ្មចារី, ចោទេន្តា អប្បនាវ តេ;

អម្ពរាវចរា សព្ពេ, វសន្តិ អស្សមេ តទា.

៣៥៦. ‘‘បញ្ចាហំ សន្និបតន្តិ, ឯកគ្គា សន្តវុត្តិនោ;

អញ្ញោញ្ញំ អភិវាទេត្វា, បក្កមន្តិ ទិសាមុខា.

៣៥៧. ‘‘បទុមុត្តរោ នាម ជិនោ, សព្ពធម្មាន បារគូ;

តមន្ធការំ វិធមំ, ឧប្បជ្ជិ តាវទេ ជិនោ.

៣៥៨. ‘‘មម អស្សមសាមន្តា, យក្ខោ អាសិ មហិទ្ធិកោ;

សោ មេ សំសិត្ថ សម្ពុទ្ធំ, ជលជុត្តមនាយកំ.

៣៥៩. ‘‘ឯស ពុទ្ធោ សមុប្បន្នោ, បទុមុត្តរោ មហាមុនិ;

ខិប្បំ គន្ត្វាន សម្ពុទ្ធំ, បយិរូបាស មារិស.

៣៦០. ‘‘យក្ខស្ស វចនំ សុត្វា, វិប្បសន្នេន ចេតសា;

អស្សមំ សំសាមេត្វាន, និក្ខមិំ វិបិនា តទា.

៣៦១. ‘‘ចេឡេវ ឌយ្ហមានម្ហិ, និក្ខមិត្វាន អស្សមា;

ឯករត្តិំ និវាសេត្វា [និវសិត្វា (សី.), និវាសេន (?)], ឧបគច្ឆិំ វិនាយកំ.

៣៦២. ‘‘បទុមុត្តរោ លោកវិទូ, អាហុតីនំ បដិគ្គហោ;

ចតុសច្ចំ បកាសេន្តោ, ទេសេសិ អមតំ បទំ.

៣៦៣. ‘‘សុផុល្លំ បទុមំ គយ្ហ, ឧបគន្ត្វា មហេសិនោ;

បសន្នចិត្តោ សុមនោ, ពុទ្ធស្ស អភិរោបយិំ.

៣៦៤. ‘‘បូជយិត្វាន សម្ពុទ្ធំ, ជលជុត្តមនាយកំ;

ឯកំសំ អជិនំ កត្វា, សន្ថវិំ លោកនាយកំ.

៣៦៥. ‘‘យេន ញាណេន សម្ពុទ្ធោ, វសតីហ អនាសវោ;

តំ ញាណំ កិត្តយិស្សាមិ, សុណាថ មម ភាសតោ.

៣៦៦. ‘‘‘សំសារសោតំ ឆិន្ទិត្វា, តារេសិ សព្ពបាណិនំ;

តវ ធម្មំ សុណិត្វាន, តណ្ហាសោតំ តរន្តិ តេ.

៣៦៧. ‘‘‘តុវំ សត្ថា ច កេតុ ច, ធជោ យូបោ ច បាណិនំ;

បរាយណោ បតិដ្ឋា ច, ទីបោ ច ទ្វិបទុត្តម [ទិបទុត្តម (សី. ស្យា. បី.)].

៣៦៨. ‘‘‘យាវតា គណិនោ លោកេ, សត្ថវាហា បវុច្ចរេ;

តុវំ អគ្គោសិ សព្ពញ្ញុ, តវ អន្តោគធាវ តេ.

៣៦៩. ‘‘‘តវ ញាណេន សព្ពញ្ញុ, តារេសិ ជនតំ ពហុំ;

តវ ទស្សនមាគម្ម, ទុក្ខស្សន្តំ ករិស្សរេ.

៣៧០. ‘‘‘យេ កេចិមេ គន្ធជាតា, លោកេ វាយន្តិ ចក្ខុម;

តវ គន្ធសមោ នត្ថិ, បុញ្ញក្ខេត្តេ មហាមុនេ’.

៣៧១. ‘‘‘តិរច្ឆានយោនិំ និរយំ, បរិមោចេសិ [បរិមោចេហិ (ស្យា. ក.)] ចក្ខុម;

អសង្ខតំ បទំ សន្តំ, ទេសេសិ [ទេសេហិ (ស្យា. ក.)] ត្វំ មហាមុនេ’.

៣៧២. ‘‘បទុមុត្តរោ លោកវិទូ, អាហុតីនំ បដិគ្គហោ;

ភិក្ខុសង្ឃេ និសីទិត្វា, ឥមា គាថា អភាសថ.

៣៧៣. ‘‘‘យោ មេ ញាណំ អបូជេសិ, បសន្នោ សេហិ បាណិភិ;

តមហំ កិត្តយិស្សាមិ, សុណាថ មម ភាសតោ.

៣៧៤. ‘‘‘តិំសកប្បសហស្សានិ, ទេវលោកេ រមិស្សតិ;

សហស្សក្ខត្តុំ រាជា ច, ចក្កវត្តី ភវិស្សតិ’.

៣៧៥. ‘‘សុលទ្ធលាភំ លទ្ធោម្ហិ, តោសយិត្វាន សុព្ពតំ;

សព្ពាសវេ បរិញ្ញាយ, វិហរាមិ អនាសវោ.

៣៧៦. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៣៧៧. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៣៧៨. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ឧទេនោ ថេរោ ឥមា គាថាយោ អភាសិត្ថាតិ.

ឧទេនត្ថេរស្សាបទានំ ទសមំ.

មេត្តេយ្យវគ្គោ ឯកចត្តាលីសមោ.