៨. តោទេយ្យត្ថេរអបទានំ

២២៤. ‘‘រាជា អជិតញ្ជយោ [រាជាសិ វិជយោ (សី. អដ្ឋ.), រាជា វិជិតជយោ (ស្យា.)] នាម, កេតុមតីបុរុត្តមេ;

សូរោ វិក្កមសម្បន្នោ, បុរមជ្ឈាវសី តទា.

២២៥. ‘‘តស្ស រញ្ញោ បមត្តស្ស, អដវិយោ សមុដ្ឋហុំ;

ឱតារា [ឧត្តរា (ស្យា.), ឱចរា (បី.)] តុណ្ឌិកា ចេវ, រដ្ឋំ វិទ្ធំសយុំ តទា.

២២៦. ‘‘បច្ចន្តេ កុបិតេ ខិប្បំ, សន្និបាតេសិរិន្ទមោ;

ភដេ ចេវ ពលត្ថេ ច, អរិំ និគ្គាហយិ តទា.

២២៧. ‘‘ហត្ថារោហា អនីកដ្ឋា, សូរា ច ចម្មយោធិនោ;

ធនុគ្គហា ច ឧគ្គា ច, សព្ពេ សន្និបតុំ តទា.

២២៨. ‘‘អាឡារិកា ច កប្បកា, ន្ហាបកា មាលការកា;

សូរា វិជិតសង្គាមា, សព្ពេ សន្និបតុំ តទា.

២២៩. ‘‘ខគ្គហត្ថា ច បុរិសា, ចាបហត្ថា ច វម្មិនោ;

លុទ្ទា វិជិតសង្គាមា, សព្ពេ សន្និបតុំ តទា.

២៣០. ‘‘តិធាបភិន្នា មាតង្គា, កុញ្ជរា សដ្ឋិហាយនា;

សុវណ្ណកច្ឆាលង្ការា, សព្ពេ សន្និបតុំ តទា.

២៣១. ‘‘ខមា សីតស្ស ឧណ្ហស្ស, ឧក្ការុហរណស្ស ច;

យោធាជីវា កតកម្មា, សព្ពេ សន្និបតុំ តទា.

២៣២. ‘‘សង្ខសទ្ទំ ភេរិសទ្ទំ, អថោ ឧតុជ [ឧទ្ធវ (សី.), ឧទ្ទដ (ស្យា.)] សទ្ទកំ;

ឯតេហិ តេ ហាសយន្តា, សព្ពេ សន្និបតុំ តទា.

២៣៣. ‘‘តិសូលកោន្តិមន្តេហិ [តិសូលកោន្តមន្តេហិ (សី.), កវចេហិ តោមរេហិ (សី.), ធនូហិ តោមរេហិ (ស្យា.)] ច;

កោដ្ដេន្តានំ និបាតេន្តា [កោដ្ដយន្តា និវត្តេន្តា (ស្យា.)], សព្ពេ សន្និបតុំ តទា.

២៣៤. ‘‘កិមេវាតិនិសាមេត្វា [កវចានិវាសេត្វា (ស្យា.)], សរាជា អជិតញ្ជយោ [អជិនំ ជិនោ (សី.), អជិតញ្ជិនោ (ស្យា.)];

សដ្ឋិ បាណសហស្សានិ, សូលេ ឧត្តាសយិំ តទា.

២៣៥. ‘‘សទ្ទំ មានុសកាកំសុ, អហោ រាជា អធម្មិកោ;

និរយេ បច្ចមានស្ស, កទា អន្តោ ភវិស្សតិ.

២៣៦. ‘‘សយនេហំ តុវដ្ដេន្តោ, បស្សាមិ និរយេ តទា;

ន សុបាមិ ទិវារត្តិំ, សូលេន តជ្ជយន្តិ មំ.

២៣៧. ‘‘កិំ បមាទេន រជ្ជេន, វាហនេន ពលេន ច;

ន តេ បហោន្តិ ធារេតុំ, តាបយន្តិ [តាសយន្តិ (សី. ស្យា.)] មមំ សទា.

២៣៨. ‘‘កិំ មេ បុត្តេហិ ទារេហិ, រជ្ជេន សកលេន ច;

យំនូន បព្ពជេយ្យាហំ, គតិមគ្គំ វិសោធយេ.

២៣៩. ‘‘សដ្ឋិ នាគសហស្សានិ, សព្ពាលង្ការភូសិតេ;

សុវណ្ណកច្ឆេ មាតង្គេ, ហេមកប្បនវាសសេ.

២៤០. ‘‘អារូឡ្ហេ គាមណីយេហិ, តោមរង្កុសបាណិភិ;

សង្គាមាវចរេ ឋានេ, អនបេក្ខោ វិហាយហំ;

សកកម្មេន សន្តត្តោ, និក្ខមិំ អនគារិយំ.

២៤១. ‘‘សដ្ឋិ អស្សសហស្សានិ, សព្ពាលង្ការភូសិតេ;

អាជានីយេវ ជាតិយា, សិន្ធវេ សីឃវាហនេ.

២៤២. ‘‘អារូឡ្ហេ គាមណីយេហិ, ចាបហត្ថេហិ វម្មិភិ;

បហារេត្វាន [បហាយិត្វាន (សី. បី.), ឆឌ្ឌយិត្វាន (ស្យា.)] តេ សព្ពេ, និក្ខមិំ អនគារិយំ.

២៤៣. ‘‘សដ្ឋិ រថសហស្សានិ, សព្ពាលង្ការភូសិតេ;

ទីបេ អថោបិ វេយគ្ឃេ, សន្នទ្ធេ ឧស្សិតទ្ធជេ;

តេ សព្ពេ បរិហារេត្វា [បរិវជ្ជេត្វា (ស្យា.), បរិហាយិត្វា (បី.)], បព្ពជិំ អនគារិយំ.

២៤៤. ‘‘សដ្ឋិ ធេនុសហស្សានិ, សព្ពា កំសូបធារណា;

តាយោបិ [គាវិយោ (ស្យា.), ធេនុយោ (ក.)] ឆឌ្ឌយិត្វាន, បព្ពជិំ អនគារិយំ.

២៤៥. ‘‘សដ្ឋិ ឥត្ថិសហស្សានិ, សព្ពាលង្ការភូសិតា;

វិចិត្តវត្ថាភរណា, អាមុក្កមណិកុណ្ឌលា.

២៤៦. ‘‘អឡារបម្ហា ហសុលា, សុសញ្ញា តនុមជ្ឈិមា;

តា ហិត្វា កន្ទមានាយោ, បព្ពជិំ អនគារិយំ.

២៤៧. ‘‘សដ្ឋិ គាមសហស្សានិ, បរិបុណ្ណានិ សព្ពសោ;

ឆឌ្ឌយិត្វាន តំ រជ្ជំ, បព្ពជិំ អនគារិយំ.

២៤៨. ‘‘នគរា និក្ខមិត្វាន, ហិមវន្តមុបាគមិំ;

ភាគីរថីនទីតីរេ, អស្សមំ មាបយិំ អហំ.

២៤៩. ‘‘បណ្ណសាលំ ករិត្វាន, អគ្យាគារំ អកាសហំ;

អារទ្ធវីរិយោ បហិតត្តោ, វសាមិ អស្សមេ អហំ.

២៥០. ‘‘មណ្ឌបេ រុក្ខមូលេ វា, សុញ្ញាគារេ ច ឈាយតោ;

ន តុ វិជ្ជតិ តាសោ មេ, ន បស្សេ ភយភេរវំ.

២៥១. ‘‘សុមេធោ នាម សម្ពុទ្ធោ, អគ្គោ ការុណិកោ មុនិ;

ញាណាលោកេន ជោតន្តោ, លោកេ ឧប្បជ្ជិ តាវទេ.

២៥២. ‘‘មម អស្សមសាមន្តា, យក្ខោ អាសិ មហិទ្ធិកោ;

ពុទ្ធសេដ្ឋម្ហិ ឧប្បន្នេ, អារោចេសិ មមំ តទា.

២៥៣. ‘‘ពុទ្ធោ លោកេ សមុប្បន្នោ, សុមេធោ នាម ចក្ខុមា;

តារេតិ ជនតំ សព្ពំ, តម្បិ សោ តារយិស្សតិ.

២៥៤. ‘‘យក្ខស្ស វចនំ សុត្វា, សំវិគ្គោ អាសិ តាវទេ;

ពុទ្ធោ ពុទ្ធោតិ ចិន្តេន្តោ, អស្សមំ បដិសាមយិំ.

២៥៥. ‘‘អគ្គិទារុញ្ច ឆឌ្ឌេត្វា, សំសាមេត្វាន សន្ថតំ;

អស្សមំ អភិវន្ទិត្វា, និក្ខមិំ វិបិនា អហំ.

២៥៦. ‘‘តតោ ចន្ទនមាទាយ, គាមា គាមំ បុរា បុរំ;

ទេវទេវំ គវេសន្តោ, ឧបគច្ឆិំ វិនាយកំ.

២៥៧. ‘‘ភគវា តម្ហិ សមយេ, សុមេធោ លោកនាយកោ;

ចតុសច្ចំ បកាសេន្តោ, ពោធេតិ ជនតំ ពហុំ.

២៥៨. ‘‘អញ្ជលិំ បគ្គហេត្វាន, សីសេ កត្វាន ចន្ទនំ;

សម្ពុទ្ធំ អភិវាទេត្វា, ឥមា គាថា អភាសហំ.

២៥៩. ‘‘‘វស្សិកេ បុប្ផមានម្ហិ, សន្តិកេ ឧបវាយតិ;

ត្វំ វីរ គុណគន្ធេន, ទិសា សព្ពា បវាយសិ.

២៦០. ‘‘‘ចម្បកេ នាគវនិកេ, អតិមុត្តកកេតកេ;

សាលេសុ បុប្ផមានេសុ, អនុវាតំ បវាយតិ.

២៦១. ‘‘‘តវ គន្ធំ សុណិត្វាន, ហិមវន្តា ឥធាគមិំ;

បូជេមិ តំ មហាវីរ, លោកជេដ្ឋ មហាយស’.

២៦២. ‘‘វរចន្ទនេនានុលិម្បិំ, សុមេធំ លោកនាយកំ;

សកំ ចិត្តំ បសាទេត្វា, តុណ្ហី អដ្ឋាសិ តាវទេ.

២៦៣. ‘‘សុមេធោ នាម ភគវា, លោកជេដ្ឋោ នរាសភោ;

ភិក្ខុសង្ឃេ និសីទិត្វា, ឥមា គាថា អភាសថ.

២៦៤. ‘‘‘យោ មេ គុណេ បកិត្តេសិ, ចន្ទនញ្ច អបូជយិ;

តមហំ កិត្តយិស្សាមិ, សុណាថ មម ភាសតោ.

២៦៥. ‘‘‘អាទេយ្យវាក្យវចនោ, ព្រហ្មា ឧជុ បតាបវា;

បញ្ចវីសតិកប្បានិ, សប្បភាសោ ភវិស្សតិ.

២៦៦. ‘‘‘ឆព្ពីសតិកប្បសតេ, ទេវលោកេ រមិស្សតិ;

សហស្សក្ខត្តុំ រាជា ច, ចក្កវត្តី ភវិស្សតិ.

២៦៧. ‘‘‘តេត្តិំសក្ខត្តុំ ទេវិន្ទោ, ទេវរជ្ជំ ករិស្សតិ;

បទេសរជ្ជំ វិបុលំ, គណនាតោ អសង្ខិយំ.

២៦៨. ‘‘‘តតោ ចុតោយំ មនុជោ, មនុស្សត្តំ គមិស្សតិ;

បុញ្ញកម្មេន សំយុត្តោ, ព្រហ្មពន្ធុ ភវិស្សតិ.

២៦៩. ‘‘‘អជ្ឈាយកោ មន្តធរោ, តិណ្ណំ វេទាន បារគូ;

តិលក្ខណេន សម្បន្នោ, ពាវរី នាម ព្រាហ្មណោ.

២៧០. ‘‘‘តស្ស សិស្សោ ភវិត្វាន, ហេស្សតិ មន្តបារគូ;

ឧបគន្ត្វាន សម្ពុទ្ធំ, គោតមំ សក្យបុង្គវំ.

២៧១. ‘‘‘បុច្ឆិត្វា និបុណេ បញ្ហេ, ភាវយិត្វាន អញ្ជសំ [ហាសយិត្វាន មានសំ (ស្យា.), ភាវយិត្វាន សញ្ចយំ (ក.)];

សព្ពាសវេ បរិញ្ញាយ, វិហរិស្សតិនាសវោ’.

២៧២. ‘‘តិវិធគ្គិ និព្ពុតា មយ្ហំ, ភវា សព្ពេ សមូហតា;

សព្ពាសវេ បរិញ្ញាយ, វិហរាមិ អនាសវោ.

២៧៣. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

២៧៤. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

២៧៥. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា តោទេយ្យោ ថេរោ ឥមា គាថាយោ អភាសិត្ថាតិ.

តោទេយ្យត្ថេរស្សាបទានំ អដ្ឋមំ.