៧. ហេមកត្ថេរអបទានំ

១៨៣. ‘‘បព្ភារកូដំ និស្សាយ, អនោមោ នាម តាបសោ;

អស្សមំ សុកតំ កត្វា, បណ្ណសាលេ វសី តទា.

១៨៤. ‘‘សិទ្ធំ តស្ស តបោ កម្មំ, សិទ្ធិបត្តោ សកេ ពលេ;

សកសាមញ្ញវិក្កន្តោ, អាតាបី និបកោ មុនិ.

១៨៥. ‘‘វិសារទោ សសមយេ, បរវាទេ ច កោវិទោ;

បដ្ឋោ ភូមន្តលិក្ខម្ហិ, ឧប្បាតម្ហិ ច កោវិទោ.

១៨៦. ‘‘វីតសោកោ និរារម្ភោ, អប្បាហារោ អលោលុបោ;

លាភាលាភេន សន្តុដ្ឋោ, ឈាយី ឈានរតោ មុនិ.

១៨៧. ‘‘បិយទស្សី នាម សម្ពុទ្ធោ, អគ្គោ ការុណិកោ មុនិ;

សត្តេ តារេតុកាមោ សោ, ករុណាយ ផរី តទា.

១៨៨. ‘‘ពោធនេយ្យំ ជនំ ទិស្វា, បិយទស្សី មហាមុនិ;

ចក្កវាឡសហស្សម្បិ, គន្ត្វា ឱវទតេ មុនិ.

១៨៩. ‘‘មមុទ្ធរិតុកាមោ សោ, មមស្សមមុបាគមិ;

ន ទិដ្ឋោ មេ ជិនោ បុព្ពេ, ន សុតោបិ ច កស្សចិ.

១៩០. ‘‘ឧប្បាតា សុបិនា មយ្ហំ, លក្ខណា សុប្បកាសិតា;

បដ្ឋោ ភូមន្តលិក្ខម្ហិ, នក្ខត្តបទកោវិទោ.

១៩១. ‘‘សោហំ ពុទ្ធស្ស សុត្វាន, តត្ថ ចិត្តំ បសាទយិំ;

តិដ្ឋន្តោ [ភុញ្ជន្តោ (សី. បី. ក.)] វា និសិន្នោ វា, សរាមិ និច្ចកាលិកំ.

១៩២. ‘‘មយិ ឯវំ សរន្តម្ហិ, ភគវាបិ អនុស្សរិ;

ពុទ្ធំ អនុស្សរន្តស្ស, បីតិ មេ ហោតិ តាវទេ.

១៩៣. ‘‘កាលញ្ច បុនរាគម្ម, ឧបេសិ មំ មហាមុនិ;

សម្បត្តេបិ ន ជានាមិ, អយំ ពុទ្ធោ មហាមុនិ.

១៩៤. ‘‘អនុកម្បកោ ការុណិកោ, បិយទស្សី មហាមុនិ;

សញ្ជានាបេសិ អត្តានំ, ‘អហំ ពុទ្ធោ សទេវកេ’.

១៩៥. ‘‘សញ្ជានិត្វាន សម្ពុទ្ធំ, បិយទស្សិំ មហាមុនិំ;

សកំ ចិត្តំ បសាទេត្វា, ឥទំ វចនមព្រវិំ.

១៩៦. ‘‘‘អញ្ញេ [សព្ពេ (ស្យា.)] បីឋេ ច បល្លង្កេ, អាសន្ទីសុ និសីទរេ;

តុវម្បិ សព្ពទស្សាវី, និសីទ រតនាសនេ’.

១៩៧. ‘‘សព្ពរតនមយំ បីឋំ, និម្មិនិត្វាន តាវទេ;

បិយទស្សិស្ស មុនិនោ, អទាសិំ ឥទ្ធិនិម្មិតំ.

១៩៨. ‘‘រតនេ ច និសិន្នស្ស, បីឋកេ ឥទ្ធិនិម្មិតេ;

កុម្ភមត្តំ ជម្ពុផលំ, អទាសិំ តាវទេ អហំ.

១៩៩. ‘‘មម ហាសំ ជនេត្វាន, បរិភុញ្ជិ មហាមុនិ;

តទា ចិត្តំ បសាទេត្វា, សត្ថារំ អភិវាទយិំ.

២០០. ‘‘បិយទស្សី តុ ភគវា, លោកជេដ្ឋោ នរាសភោ;

រតនាសនមាសីនោ, ឥមា គាថា អភាសថ.

២០១. ‘‘‘យោ មេ រតនមយំ បីឋំ, អមតញ្ច ផលំ អទា;

តមហំ កិត្តយិស្សាមិ, សុណាថ មម ភាសតោ.

២០២. ‘‘‘សត្តសត្តតិ កប្បានិ, ទេវលោកេ រមិស្សតិ;

បញ្ចសត្តតិក្ខត្តុញ្ច, ចក្កវត្តី ភវិស្សតិ.

២០៣. ‘‘‘ទ្វត្តិំសក្ខត្តុំ ទេវិន្ទោ, ទេវរជ្ជំ ករិស្សតិ;

បទេសរជ្ជំ វិបុលំ, គណនាតោ អសង្ខិយំ.

២០៤. ‘‘‘សោណ្ណមយំ រូបិមយំ, បល្លង្កំ សុកតំ ពហុំ;

លោហិតង្គមយញ្ចេវ, លច្ឆតិ រតនាមយំ.

២០៥. ‘‘‘ចង្កមន្តម្បិ មនុជំ, បុញ្ញកម្មសមង្គិនំ;

បល្លង្កានិ អនេកានិ, បរិវារេស្សរេ តទា.

២០៦. ‘‘‘កូដាគារា ច បាសាទា, សយនញ្ច មហារហំ;

ឥមស្ស ចិត្តមញ្ញាយ, និព្ពត្តិស្សន្តិ តាវទេ.

២០៧. ‘‘‘សដ្ឋិ នាគសហស្សានិ, សព្ពាលង្ការភូសិតា;

សុវណ្ណកច្ឆា មាតង្គា, ហេមកប្បនវាសសា [ហេមកប្បនិវាសនា (សី. ស្យា.), ហេមកប្បនិវាសសា (ក.)].

២០៨. ‘‘‘អារូឡ្ហា គាមណីយេហិ, តោមរង្កុសបាណិភិ;

ឥមំ បរិចរិស្សន្តិ, រត្នបីឋស្សិទំ ផលំ.

២០៩. ‘‘‘សដ្ឋិ អស្សសហស្សានិ, សព្ពាលង្ការភូសិតា;

អាជានីយាវ ជាតិយា, សិន្ធវា សីឃវាហិនោ.

២១០. ‘‘‘អារូឡ្ហា គាមណីយេហិ, ឥល្លិយាចាបធារិភិ;

តេបិមំ បរិចរិស្សន្តិ, រត្នបីឋស្សិទំ ផលំ.

២១១. ‘‘‘សដ្ឋិ រថសហស្សានិ, សព្ពាលង្ការភូសិតា;

ទីបា អថោបិ វេយគ្ឃា, សន្នទ្ធា ឧស្សិតទ្ធជា.

២១២. ‘‘‘អារូឡ្ហា គាមណីយេហិ, ចាបហត្ថេហិ វម្មិភិ;

បរិវារេស្សន្តិមំ និច្ចំ, រត្នបីឋស្សិទំ ផលំ.

២១៣. ‘‘‘សដ្ឋិ ធេនុសហស្សានិ, ទោហញ្ញា បុង្គវូសភេ;

វច្ឆកេ ជនយិស្សន្តិ, រត្នបីឋស្សិទំ ផលំ.

២១៤. ‘‘‘សោឡសិត្ថិសហស្សានិ, សព្ពាលង្ការភូសិតា;

វិចិត្តវត្ថាភរណា, អាមុក្កមណិកុណ្ឌលា.

២១៥. ‘‘‘អឡារបម្ហា ហសុលា, សុសញ្ញា តនុមជ្ឈិមា;

បរិវារេស្សន្តិមំ និច្ចំ, រត្នបីឋស្សិទំ ផលំ.

២១៦. ‘‘‘អដ្ឋារសេ កប្បសតេ, គោតមោ នាម ចក្ខុមា;

តមន្ធការំ វិធមិត្វា, ពុទ្ធោ លោកេ ភវិស្សតិ.

២១៧. ‘‘‘តស្ស ទស្សនមាគម្ម, បព្ពជិស្សតិកិញ្ចនោ;

តោសយិត្វាន សត្ថារំ, សាសនេភិរមិស្សតិ.

២១៨. ‘‘‘តស្ស ធម្មំ សុណិត្វាន, កិលេសេ ឃាតយិស្សតិ;

សព្ពាសវេ បរិញ្ញាយ, និព្ពាយិស្សតិនាសវោ’.

២១៩. ‘‘វីរិយំ មេ ធុរធោរយ្ហំ, យោគក្ខេមាធិវាហនំ;

ឧត្តមត្ថំ បត្ថយន្តោ, សាសនេ វិហរាមហំ.

២២០. ‘‘ឥទំ បច្ឆិមកំ មយ្ហំ, ចរិមោ វត្តតេ ភវោ;

សព្ពាសវា បរិក្ខីណា, នត្ថិ ទានិ បុនព្ភវោ.

២២១. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

២២២. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

២២៣. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ហេមកោ ថេរោ ឥមា គាថាយោ អភាសិត្ថាតិ;

ហេមកត្ថេរស្សាបទានំ សត្តមំ.

សត្តរសមំ ភាណវារំ.