៦. នន្ទកត្ថេរអបទានំ

១៦១. ‘‘មិគលុទ្ទោ បុរេ អាសិំ, អរញ្ញេ កាននេ អហំ;

បសទំ មិគមេសន្តោ, សយម្ភុំ អទ្ទសំ អហំ [ជិនំ (សី.)].

១៦២. ‘‘អនុរុទ្ធោ នាម សម្ពុទ្ធោ, សយម្ភូ អបរាជិតោ;

វិវេកកាមោ សោ ធីរោ, វនមជ្ឈោគហី តទា.

១៦៣. ‘‘ចតុទណ្ឌេ គហេត្វាន, ចតុដ្ឋានេ ឋបេសហំ;

មណ្ឌបំ សុកតំ កត្វា, បទ្មបុប្ផេហិ ឆាទយិំ.

១៦៤. ‘‘មណ្ឌបំ ឆាទយិត្វាន, សយម្ភុំ អភិវាទយិំ;

ធនុំ តត្ថេវ និក្ខិប្ប, បព្ពជិំ អនគារិយំ.

១៦៥. ‘‘នចិរំ បព្ពជិតស្ស [បព្ពជិតស្ស អចិរំ (សី.)], ព្យាធិ មេ ឧទបជ្ជថ;

បុព្ពកម្មំ សរិត្វាន, តត្ថ កាលង្កតោ អហំ.

១៦៦. ‘‘បុព្ពកម្មេន សំយុត្តោ, តុសិតំ អគមាសហំ;

តត្ថ សោណ្ណមយំ ព្យម្ហំ, និព្ពត្តតិ យទិច្ឆកំ.

១៦៧. ‘‘សហស្សយុត្តំ ហយវាហិំ, ទិព្ពយានមធិដ្ឋិតោ;

អារុហិត្វាន តំ យានំ, គច្ឆាមហំ យទិច្ឆកំ.

១៦៨. ‘‘តតោ មេ និយ្យមានស្ស, ទេវភូតស្ស មេ សតោ;

សមន្តា យោជនសតំ, មណ្ឌបោ មេ ធរីយតិ.

១៦៩. ‘‘សយនេហំ តុវដ្ដាមិ, អច្ឆន្នេ [អច្ចន្តំ (សី.), អច្ចន្ត (បី.)] បុប្ផសន្ថតេ;

អន្តលិក្ខា ច បទុមា, វស្សន្តេ និច្ចកាលិកំ.

១៧០. ‘‘មរីចិកេ ផន្ទមានេ, តប្បមានេ ច អាតបេ;

ន មំ តាបេតិ អាតាបោ, មណ្ឌបស្ស ឥទំ ផលំ.

១៧១. ‘‘ទុគ្គតិំ សមតិក្កន្តោ, អបាយា បិហិតា មម;

មណ្ឌបេ រុក្ខមូលេ វា, សន្តាបោ មេ ន វិជ្ជតិ.

១៧២. ‘‘មហីសញ្ញំ អធិដ្ឋាយ, លោណតោយំ តរាមហំ;

តស្ស មេ សុកតំ កម្មំ, ពុទ្ធបូជាយិទំ ផលំ.

១៧៣. ‘‘អបថម្បិ [អព្ភម្ហិ (ស្យា. ក.)] បថំ កត្វា, គច្ឆាមិ អនិលញ្ជសេ;

អហោ មេ សុកតំ កម្មំ, ពុទ្ធបូជាយិទំ ផលំ.

១៧៤. ‘‘បុព្ពេនិវាសំ ជានាមិ, ទិព្ពចក្ខុ វិសោធិតំ;

អាសវា មេ បរិក្ខីណា, ពុទ្ធបូជាយិទំ ផលំ.

១៧៥. ‘‘ជហិតា បុរិមា ជាតិ, ពុទ្ធស្ស ឱរសោ អហំ;

ទាយាទោម្ហិ ច សទ្ធម្មេ, ពុទ្ធបូជាយិទំ ផលំ.

១៧៦. ‘‘អារាធិតោម្ហិ សុគតំ, គោតមំ សក្យបុង្គវំ;

ធម្មធជោ ធម្មទាយាទោ [ធម្មាទាសោ (ក.)], ពុទ្ធបូជាយិទំ ផលំ.

១៧៧. ‘‘ឧបដ្ឋិត្វាន សម្ពុទ្ធំ, គោតមំ សក្យបុង្គវំ;

បារង្គមនិយំ មគ្គំ, អបុច្ឆិំ លោកនាយកំ.

១៧៨. ‘‘អជ្ឈិដ្ឋោ កថយី ពុទ្ធោ, គម្ភីរំ និបុណំ បទំ;

តស្សាហំ ធម្មំ សុត្វាន, បត្តោម្ហិ អាសវក្ខយំ.

១៧៩. ‘‘អហោ មេ សុកតំ កម្មំ, បរិមុត្តោម្ហិ ជាតិយា;

សព្ពាសវបរិក្ខីណោ, នត្ថិ ទានិ បុនព្ភវោ.

១៨០. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

១៨១. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

១៨២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា នន្ទកោ ថេរោ ឥមា គាថាយោ អភាសិត្ថាតិ.

នន្ទកត្ថេរស្សាបទានំ ឆដ្ឋំ.