៤. ធោតកត្ថេរអបទានំ

៧២. ‘‘គង្គា ភាគីរថី នាម, ហិមវន្តា បភាវិតា [ហិមវន្តប្បភាវិតា (សី.)];

ហំសវតិយា ទ្វារេន, អនុសន្ទតិ តាវទេ.

៧៣. ‘‘សោភិតោ នាម អារាមោ, គង្គាកូលេ សុមាបិតោ;

តត្ថ បទុមុត្តរោ ពុទ្ធោ, វសតេ លោកនាយកោ.

៧៤. ‘‘តិទសេហិ យថា ឥន្ទោ, មនុជេហិ បុរក្ខតោ;

និសីទិ តត្ថ ភគវា, អសម្ភីតោវ កេសរី.

៧៥. ‘‘នគរេ ហំសវតិយា, វសាមិ [អហោសិំ (ស្យា.)] ព្រាហ្មណោ អហំ;

ឆឡង្គោ នាម នាមេន, ឯវំនាមោ មហាមុនិ.

៧៦. ‘‘អដ្ឋារស សិស្សសតា, បរិវារេន្តិ មំ តទា;

តេហិ សិស្សេហិ សមិតោ, គង្គាតីរំ ឧបាគមិំ.

៧៧. ‘‘តត្ថទ្ទសាសិំ សមណេ, និក្កុហេ ធោតបាបកេ;

ភាគីរថិំ តរន្តេហំ [តរន្តោហំ (ស្យា. បី.)], ឯវំ ចិន្តេសិ តាវទេ.

៧៨. ‘‘សាយំ បាតំ [សាយបាតំ (បី.)] តរន្តាមេ, ពុទ្ធបុត្តា មហាយសា;

វិហេសយន្តិ អត្តានំ, តេសំ អត្តា វិហញ្ញតិ.

៧៩. ‘‘សទេវកស្ស លោកស្ស, ពុទ្ធោ អគ្គោ បវុច្ចតិ;

នត្ថិ មេ ទក្ខិណេ ការំ, គតិមគ្គវិសោធនំ.

៨០. ‘‘យំនូន ពុទ្ធសេដ្ឋស្ស, សេតុំ គង្គាយ ការយេ;

ការាបេត្វា ឥមំ កម្មំ [សេតុំ (ស្យា.)], សន្តរាមិ ឥមំ ភវំ.

៨១. ‘‘សតសហស្សំ ទត្វាន, សេតុំ ការាបយិំ អហំ;

សទ្ទហន្តោ កតំ ការំ, វិបុលំ មេ ភវិស្សតិ.

៨២. ‘‘ការាបេត្វាន តំ សេតុំ, ឧបេសិំ លោកនាយកំ;

សិរសិ អញ្ជលិំ កត្វា, ឥមំ វចនមព្រវិំ.

៨៣. ‘‘‘សតសហស្សស្ស វយំ [វយំ សតសហស្សំវ (ក.)], ទត្វា [កត្វា (សី. បី.)] ការាបិតោ មយា;

តវត្ថាយ មហាសេតុ, បដិគ្គណ្ហ មហាមុនេ.

៨៤. ‘‘‘បទុមុត្តរោ លោកវិទូ, អាហុតីនំ បដិគ្គហោ;

ភិក្ខុសង្ឃេ និសីទិត្វា, ឥមា គាថា អភាសថ.

៨៥. ‘‘‘យោ មេ សេតុំ អការេសិ, បសន្នោ សេហិ បាណិភិ;

តមហំ កិត្តយិស្សាមិ, សុណាថ មម ភាសតោ.

(សេតុទានអានិសំសោ)

៨៦. ‘‘‘ទរិតោ បព្ពតតោ វា, រុក្ខតោ បតិតោបិយំ;

ចុតោបិ លច្ឆតី ឋានំ, សេតុទានស្សិទំ ផលំ.

៨៧. ‘‘‘វិរូឡ្ហមូលសន្តានំ, និគ្រោធមិវ មាលុតោ;

អមិត្តា នប្បសហន្តិ, សេតុទានស្សិទំ ផលំ.

៨៨. ‘‘‘នាស្ស ចោរា បសហន្តិ, នាតិមញ្ញន្តិ ខត្តិយា;

សព្ពេ តរិស្សតាមិត្តេ, សេតុទានស្សិទំ ផលំ.

៨៩. ‘‘‘អព្ភោកាសគតំ សន្តំ, កឋិនាតបតាបិតំ;

បុញ្ញកម្មេន សំយុត្តំ, ន ភវិស្សតិ វេទនា [តាវទេ (ក.)].

៩០. ‘‘‘ទេវលោកេ មនុស្សេ វា, ហត្ថិយានំ សុនិម្មិតំ;

តស្ស សង្កប្បមញ្ញាយ, និព្ពត្តិស្សតិ តាវទេ.

៩១. ‘‘‘សហស្សស្សា វាតជវា, សិន្ធវា សីឃវាហនា;

សាយំ បាតំ ឧបេស្សន្តិ, សេតុទានស្សិទំ ផលំ.

៩២. ‘‘‘អាគន្ត្វាន មនុស្សត្តំ, សុខិតោយំ ភវិស្សតិ;

វេហាសំ [ឥហាបិ (សី. ស្យា. បី.)] មនុជស្សេវ, ហត្ថិយានំ ភវិស្សតិ.

៩៣. ‘‘‘កប្បសតសហស្សម្ហិ, ឱក្កាកកុលសម្ភវោ;

គោតមោ នាម គោត្តេន, សត្ថា លោកេ ភវិស្សតិ.

៩៤. ‘‘‘តស្ស ធម្មេសុ ទាយាទោ, ឱរសោ ធម្មនិម្មិតោ;

សព្ពាសវេ បរិញ្ញាយ, និព្ពាយិស្សតិនាសវោ’.

៩៥. ‘‘អហោ មេ សុកតំ កម្មំ, ជលជុត្តមនាមកេ;

តត្ថ ការំ ករិត្វាន, បត្តោហំ អាសវក្ខយំ.

៩៦. ‘‘បធានំ បហិតត្តោម្ហិ, ឧបសន្តោ និរូបធិ;

នាគោវ ពន្ធនំ ឆេត្វា, វិហរាមិ អនាសវោ.

៩៧. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៩៨. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៩៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ធោតកោ ថេរោ ឥមា គាថាយោ អភាសិត្ថាតិ.

ធោតកត្ថេរស្សាបទានំ ចតុត្ថំ.