៩. សព្ពទាយកត្ថេរអបទានំ

៤៥៦. ‘‘មហាសមុទ្ទំ ឱគយ្ហ, ភវនំ មេ សុនិម្មិតំ;

សុនិម្មិតា បោក្ខរណី, ចក្កវាកបកូជិតា.

៤៥៧. ‘‘មន្ទាលកេហិ សញ្ឆន្នា, បទុមុប្បលកេហិ ច;

នទី ច សន្ទតេ តត្ថ, សុបតិត្ថា មនោរមា.

៤៥៨. ‘‘មច្ឆកច្ឆបសញ្ឆន្នា, នានាទិជសមោត្ថតា;

មយូរកោញ្ចាភិរុទា, កោកិលាទីហិ វគ្គុហិ.

៤៥៩. ‘‘បារេវតា រវិហំសា ច, ចក្កវាកា នទីចរា;

ទិន្ទិភា សាឡិកា ចេត្ថ, បម្មកា [បម្បកា (សី.), ចប្បកា (ស្យា.)] ជីវជីវកា.

៤៦០. ‘‘ហំសា កោញ្ចាបិ នទិតា [កោញ្ចាភិនទិតា (សី. ស្យា.)], កោសិយា បិង្គលា ពហូ;

សត្តរតនសម្បន្នា, មណិមុត្តិកវាលុកា.

៤៦១. ‘‘សព្ពសោណ្ណមយា រុក្ខា, នានាគន្ធសមេរិតា;

ឧជ្ជោតេន្តិ ទិវារត្តិំ, ភវនំ សព្ពកាលិកំ.

៤៦២. ‘‘សដ្ឋិ តូរិយសហស្សានិ, សាយំ បាតោ បវជ្ជរេ;

សោឡសិត្ថិសហស្សានិ, បរិវារេន្តិ មំ សទា.

៤៦៣. ‘‘អភិនិក្ខម្ម ភវនា, សុមេធំ លោកនាយកំ;

បសន្នចិត្តោ សុមនោ, វន្ទយិំ តំ មហាយសំ.

៤៦៤. ‘‘សម្ពុទ្ធំ អភិវាទេត្វា, សសង្ឃំ តំ និមន្តយិំ;

អធិវាសេសិ សោ ធីរោ, សុមេធោ លោកនាយកោ.

៤៦៥. ‘‘មម ធម្មកថំ កត្វា, ឧយ្យោជេសិ មហាមុនិ;

សម្ពុទ្ធំ អភិវាទេត្វា, ភវនំ មេ ឧបាគមិំ.

៤៦៦. ‘‘អាមន្តយិំ បរិជនំ, សព្ពេ សន្និបតាថ [សន្និបតត្ថ (ក.)] វោ;

បុព្ពណ្ហសមយំ ពុទ្ធោ, ភវនំ អាគមិស្សតិ.

៤៦៧. ‘‘លាភា អម្ហំ សុលទ្ធំ នោ, យេ វសាម តវន្តិកេ;

មយម្បិ ពុទ្ធសេដ្ឋស្ស, បូជំ កស្សាម សត្ថុនោ.

៤៦៨. ‘‘អន្នបនំ បដ្ឋបេត្វា, កាលំ អារោចយិំ អហំ;

វសីសតសហស្សេហិ, ឧបេសិ លោកនាយកោ.

៤៦៩. ‘‘បញ្ចង្គិកេហិ តូរិយេហិ, បច្ចុគ្គមនមកាសហំ;

សព្ពសោណ្ណមយេ បីឋេ, និសីទិ បុរិសុត្តមោ.

៤៧០. ‘‘ឧបរិច្ឆទនំ អាសិ, សព្ពសោណ្ណមយំ តទា;

ពីជនិយោ បវាយន្តិ, ភិក្ខុសង្ឃស្ស អន្តរេ.

៤៧១. ‘‘បហូតេនន្នបានេន, ភិក្ខុសង្ឃមតប្បយិំ;

បច្ចេកទុស្សយុគឡេ, ភិក្ខុសង្ឃស្សទាសហំ.

៤៧២. ‘‘យំ វទន្តិ សុមេធោតិ, លោកាហុតិបដិគ្គហំ;

ភិក្ខុសង្ឃេ និសីទិត្វា, ឥមា គាថា អភាសថ.

៤៧៣. ‘‘យោ មេ អន្នេន បានេន, សព្ពេ ឥមេ ច តប្បយិំ;

តមហំ កិត្តយិស្សាមិ, សុណាថ មម ភាសតោ.

៤៧៤. ‘‘អដ្ឋារសេ កប្បសតេ, ទេវលោកេ រមិស្សតិ;

សហស្សក្ខត្តុំ រាជា ច, ចក្កវត្តី ភវិស្សតិ.

៤៧៥. ‘‘ឧប្បជ្ជតិ [ឧបគច្ឆតិ (សី.)] យំ យោនិំ, ទេវត្តំ អថ មានុសំ;

សព្ពទា សព្ពសោវណ្ណំ, ឆទនំ ធារយិស្សតិ.

៤៧៦. ‘‘តិំសកប្បសហស្សម្ហិ, ឱក្កាកកុសលសម្ភវោ;

គោតមោ នាម គោត្តេន, សត្ថា លោកេ ភវិស្សតិ.

៤៧៧. ‘‘តស្ស ធម្មេសុ ទាយាទោ, ឱរសោ ធម្មនិម្មិតោ;

សព្ពាសវេ បរិញ្ញាយ, និព្ពាយិស្សតិនាសវោ.

៤៧៨. ‘‘‘ភិក្ខុសង្ឃេ និសីទិត្វា, សីហនាទំ នទិស្សតិ;

ចិតកេ ឆត្តំ ធារេន្តិ, ហេដ្ឋា ឆត្តម្ហិ ឌយ្ហថ’.

៤៧៩. ‘‘សាមញ្ញំ មេ អនុប្បត្តំ, កិលេសា ឈាបិតា មយា;

មណ្ឌបេ រុក្ខមូលេ វា, សន្តាបោ មេ ន វិជ្ជតិ.

៤៨០. ‘‘តិំសកប្បសហស្សម្ហិ, យំ ទានមទទិំ តទា;

ទុគ្គតិំ នាភិជានាមិ, សព្ពទានស្សិទំ ផលំ.

៤៨១. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៤៨២. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៤៨៣. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សព្ពទាយកោ ថេរោ ឥមា គាថាយោ អភាសិត្ថាតិ.

សព្ពទាយកត្ថេរស្សាបទានំ នវមំ.