១០. អជិតត្ថេរអបទានំ

៤៨៤. ‘‘បទុមុត្តរោ នាម ជិនោ, សព្ពធម្មាន បារគូ;

អជ្ឈោគាហេត្វា ហិមវន្តំ, និសីទិ លោកនាយកោ.

៤៨៥. ‘‘នាហំ អទ្ទក្ខិំ [បស្សាមិ (?)] សម្ពុទ្ធំ, នបិ សទ្ទំ សុណោមហំ;

មម ភក្ខំ គវេសន្តោ, អាហិណ្ឌាមិ វនេ អហំ [តទា (សី.)].

៤៨៦. ‘‘តត្ថទ្ទស្សាសិំ សម្ពុទ្ធំ, ទ្វត្តិំសវរលក្ខណំ;

ទិស្វាន វិត្តិមាបជ្ជិំ [ចិត្តមាបជ្ជិ (សី.), ចិត្តមាបជ្ជិំ (ស្យា.)], សត្តោ កោ នាមយំ ភវេ.

៤៨៧. ‘‘លក្ខណានិ វិលោកេត្វា, មម វិជ្ជំ អនុស្សរិំ;

សុតញ្ហិ មេតំ វុឌ្ឍានំ, បណ្ឌិតានំ សុភាសិតំ.

៤៨៨. ‘‘តេសំ យថា តំ វចនំ, អយំ ពុទ្ធោ ភវិស្សតិ;

យំនូនាហំ សក្ករេយ្យំ, គតិំ មេ សោធយិស្សតិ.

៤៨៩. ‘‘ខិប្បំ អស្សមមាគន្ត្វា, មធុតេលំ គហិំ អហំ;

កោលម្ពកំ គហេត្វាន, ឧបគច្ឆិំ វិនាយកំ [នរាសភំ (សី.)].

៤៩០. ‘‘តិទណ្ឌកេ គហេត្វាន, អព្ភោកាសេ ឋបេសហំ;

បទីបំ បជ្ជលិត្វាន, អដ្ឋក្ខត្តុំ អវន្ទហំ.

៤៩១. ‘‘សត្តរត្តិន្ទិវំ ពុទ្ធោ, និសីទិ បុរិសុត្តមោ;

តតោ រត្យា វិវសានេ, វុដ្ឋាសិ លោកនាយកោ.

៤៩២. ‘‘បសន្នចិត្តោ សុមនោ, សព្ពរត្តិន្ទិវំ អហំ;

ទីបំ ពុទ្ធស្ស បាទាសិំ, បសន្នោ សេហិ បាណិភិ.

៤៩៣. ‘‘សព្ពេ វនា គន្ធមយា, បព្ពតេ គន្ធមាទនេ;

ពុទ្ធស្ស អានុភាវេន, អាគច្ឆុំ ពុទ្ធសន្តិកំ [ឧបគច្ឆុំ តទា ជិនំ (សី.)].

៤៩៤. ‘‘យេ កេចិ បុប្ផគន្ធាសេ, បុប្ផិតា ធរណីរុហា;

ពុទ្ធស្ស អានុភាវេន, សព្ពេ សន្និបតុំ តទា.

៤៩៥. ‘‘យាវតា ហិមវន្តម្ហិ, នាគា ច គរុឡា ឧភោ;

ធម្មញ្ច សោតុកាមា តេ, អាគច្ឆុំ ពុទ្ធសន្តិកំ.

៤៩៦. ‘‘ទេវលោ នាម សមណោ, ពុទ្ធស្ស អគ្គសាវកោ;

វសីសតសហស្សេហិ, ពុទ្ធសន្តិកុបាគមិ.

៤៩៧. ‘‘បទុមុត្តរោ លោកវិទូ, អាហុតីនំ បដិគ្គហោ;

ភិក្ខុសង្ឃេ និសីទិត្វា, ឥមា គាថា អភាសថ.

៤៩៨. ‘‘‘យោ មេ ទីបំ បទីបេសិ, បសន្នោ សេហិ បាណិភិ;

តមហំ កិត្តយិស្សាមិ, សុណាថ មម ភាសតោ.

៤៩៩. ‘‘‘សដ្ឋិ កប្បសហស្សានិ, ទេវលោកេ រមិស្សតិ;

សហស្សក្ខត្តុំ រាជា ច, ចក្កវត្តី ភវិស្សតិ.

សោឡសមំ ភាណវារំ.

៥០០. ‘‘‘ឆត្តិសក្ខត្តុំ ទេវិន្ទោ, ទេវរជ្ជំ ករិស្សតិ;

បថវិយំ សត្តសតំ, វិបុលំ រជ្ជំ ករិស្សតិ.

៥០១. ‘‘‘បទេសរជ្ជំ វិបុលំ, គណនាតោ អសង្ខិយំ;

ឥមិនា ទីបទានេន, ទិព្ពចក្ខុ ភវិស្សតិ.

៥០២. ‘‘‘សមន្តតោ អដ្ឋកោសំ [អឌ្ឍកោសំ (សី. ស្យា.)], បស្សិស្សតិ អយំ សទា;

ទេវលោកា ចវន្តស្ស, និព្ពត្តន្តស្ស ជន្តុនោ.

៥០៣. ‘‘‘ទិវា វា យទិ វា រត្តិំ, បទីបំ ធារយិស្សតិ;

ជាយមានស្ស សត្តស្ស, បុញ្ញកម្មសមង្គិនោ.

៥០៤. ‘‘‘យាវតា នគរំ អាសិ, តាវតា ជោតយិស្សតិ;

ឧបបជ្ជតិ យំ យោនិំ, ទេវត្តំ អថ មានុសំ.

៥០៥. ‘‘‘អស្សេវ ទីបទានស្ស, [អដ្ឋទីបផលេន ហិ; ឧបដ្ឋិស្សន្តិមំ ជន្តុំ (ស្យា.), អដ្ឋ ទីបា ផលេន ហិ; ន ជហិស្សន្តិ’មំ ជន្តុំ (?)] អដ្ឋទីបផលេន ហិ;

ន ជយិស្សន្តិមំ ជន្តូ [អដ្ឋទីបផលេន ហិ; ឧបដ្ឋិស្សន្តិមំ ជន្តុំ (ស្យា.), អដ្ឋ ទីបា ផលេន ហិ; ន ជហិស្សន្តិ’មំ ជន្តុំ (?)], ទីបទានស្សិទំ ផលំ.

៥០៦. ‘‘‘កប្បសតសហស្សម្ហិ, ឱក្កាកកុលសម្ភវោ;

គោតមោ នាម គោត្តេន, សត្ថា លោកេ ភវិស្សតិ.

៥០៧. ‘‘‘តស្ស ធម្មេសុ ទាយាទោ, ឱរសោ ធម្មនិម្មិតោ;

សព្ពាសវេ បរិញ្ញាយ, និព្ពាយិស្សតិនាសវោ.

៥០៨. ‘‘‘តោសយិត្វាន សម្ពុទ្ធំ, គោតមំ សក្យបុង្គវំ;

អជិតោ នាម នាមេន, ហេស្សតិ សត្ថុ សាវកោ’.

៥០៩. ‘‘សដ្ឋិ កប្បសហស្សានិ, ទេវលោកេ រមិំ អហំ;

តត្រាបិ មេ ទីបសតំ, ជោតតេ និច្ចកាលិកំ [សព្ពកាលិកំ (សី.)].

៥១០. ‘‘ទេវលោកេ មនុស្សេ វា, និទ្ធាវន្តិ បភា មម;

ពុទ្ធសេដ្ឋំ សរិត្វាន, ភិយ្យោ ហាសំ ជនេសហំ.

៥១១. ‘‘តុសិតាហំ ចវិត្វាន, ឱក្កមិំ មាតុកុច្ឆិយំ;

ជាយមានស្ស សន្តស្ស, អាលោកោ វិបុលោ អហុ.

៥១២. ‘‘អគារា អភិនិក្ខម្ម, បព្ពជិំ អនគារិយំ;

ពាវរិំ ឧបសង្កម្ម, សិស្សត្តំ អជ្ឈុបាគមិំ.

៥១៣. ‘‘ហិមវន្តេ វសន្តោហំ, អស្សោសិំ លោកនាយកំ;

ឧត្តមត្ថំ គវេសន្តោ, ឧបគច្ឆិំ វិនាយកំ.

៥១៤. ‘‘ទន្តោ ពុទ្ធោ ទមេតាវី, ឱឃតិណ្ណោ និរូបធិ;

និព្ពានំ កថយី ពុទ្ធោ, សព្ពទុក្ខប្បមោចនំ.

៥១៥. ‘‘តំ មេ អាគមនំ សិទ្ធំ, តោសិតោហំ មហាមុនិំ;

តិស្សោ វិជ្ជា អនុប្បត្តា, កតំ ពុទ្ធស្ស សាសនំ.

៥១៦. ‘‘សតសហស្សិតោ កប្បេ, យំ ទីបមទទិំ តទា;

ទុគ្គតិំ នាភិជានាមិ, ទីបទានស្សិទំ ផលំ.

៥១៧. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៥១៨. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៥១៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា អជិតោ ថេរោ ឥមា គាថាយោ អភាសិត្ថាតិ.

អជិតត្ថេរស្សាបទានំ ទសមំ.

បិលិន្ទវច្ឆវគ្គោ ចត្តាលីសមោ.

តស្សុទ្ទានំ –

បិលិន្ទវច្ឆោ សេលោ ច, សព្ពកិត្តី មធុំទទោ;

កូដាគារី ពាកុលោ ច, គិរិ សឡលសវ្ហយោ.

សព្ពទោ អជិតោ ចេវ, គាថាយោ គណិតា ឥហ;

សតានិ បញ្ច គាថានំ, វីសតិ ច តទុត្តរីតិ.

អថ វគ្គុទ្ទានំ –

បទុមារក្ខទោ ចេវ, ឧមា គន្ធោទកេន ច;

ឯកបទ្ម សទ្ទសញ្ញី, មន្ទារំ ពោធិវន្ទកោ.

អវដញ្ច បិលិន្ទិ [ឯវមេវ ទិស្សតិ] ច, គាថាយោ គណិតា ឥហ;

ចតុសត្តតិ គាថាយោ, ឯកាទស សតានិ ច.

បទុមវគ្គទសកំ.