៨. សឡលមណ្ឌបិយត្ថេរអបទានំ

៤៤៩. ‘‘និព្ពុតេ កកុសន្ធម្ហិ, ព្រាហ្មណម្ហិ វុសីមតិ;

គហេត្វា សឡលំ មាលំ, មណ្ឌបំ ការយិំ អហំ.

៤៥០. ‘‘តាវតិំសគតោ សន្តោ, លភាមិ ព្យម្ហមុត្តមំ;

អញ្ញេ ទេវេតិរោចាមិ, បុញ្ញកម្មស្សិទំ ផលំ.

៤៥១. ‘‘ទិវា វា យទិ វា រត្តិំ, ចង្កមន្តោ ឋិតោ ចហំ;

ឆន្នោ សឡលបុប្ផេហិ, បុញ្ញកម្មស្សិទំ ផលំ.

៤៥២. ‘‘ឥមស្មិំយេវ កប្បម្ហិ, យំ ពុទ្ធមភិបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

៤៥៣. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៤៥៤. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៤៥៥. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សឡលមណ្ឌបិយោ ថេរោ ឥមា គាថាយោ អភាសិត្ថាតិ.

សឡលមណ្ឌបិយត្ថេរស្សាបទានំ អដ្ឋមំ.