៧. គិរិមានន្ទត្ថេរអបទានំ

៤១៩. ‘‘ភរិយា មេ កាលង្កតា, បុត្តោ សីវថិកំ គតោ;

មាតា បិតា មតា ភាតា, ឯកចិតម្ហិ [មាតា បិតា ច ភាតា ច, ឯកចិតកម្ហិ (សី. ស្យា.)] ឌយ្ហរេ.

៤២០. ‘‘តេន សោកេន សន្តត្តោ, កិសោ បណ្ឌុ អហោសហំ;

ចិត្តក្ខេបោ ច មេ អាសិ, តេន សោកេន អដ្ដិតោ.

៤២១. ‘‘សោកសល្លបរេតោហំ, វនន្តមុបសង្កមិំ;

បវត្តផលំ ភុញ្ជិត្វា, រុក្ខមូលេ វសាមហំ.

៤២២. ‘‘សុមេធោ នាម សម្ពុទ្ធោ, ទុក្ខស្សន្តករោ ជិនោ;

មមុទ្ធរិតុកាមោ សោ, អាគញ្ឆិ មម សន្តិកំ.

៤២៣. ‘‘បទសទ្ទំ សុណិត្វាន, សុមេធស្ស មហេសិនោ;

បគ្គហេត្វានហំ សីសំ, ឧល្លោកេសិំ មហាមុនិំ.

៤២៤. ‘‘ឧបាគតេ មហាវីរេ, បីតិ មេ ឧទបជ្ជថ;

តទាសិមេកគ្គមនោ, ទិស្វា តំ លោកនាយកំ.

៤២៥. ‘‘សតិំ បដិលភិត្វាន, បណ្ណមុដ្ឋិមទាសហំ;

និសីទិ ភគវា តត្ថ, អនុកម្បាយ ចក្ខុមា.

៤២៦. ‘‘និសជ្ជ តត្ថ ភគវា, សុមេធោ លោកនាយកោ;

ធម្មំ មេ កថយី ពុទ្ធោ, សោកសល្លវិនោទនំ.

៤២៧. ‘‘‘អនវ្ហិតា តតោ អាគុំ, អននុញ្ញាតា ឥតោ គតា;

យថាគតា តថា គតា, តត្ថ កា បរិទេវនា.

៤២៨. ‘‘‘យថាបិ បថិកា សត្តា, វស្សមានាយ វុដ្ឋិយា;

សភណ្ឌា ឧបគច្ឆន្តិ, វស្សស្សាបតនាយ តេ.

៤២៩. ‘‘‘វស្សេ ច តេ ឱរមិតេ, សម្បយន្តិ យទិច្ឆកំ;

ឯវំ មាតា បិតា តុយ្ហំ, តត្ថ កា បរិទេវនា.

៤៣០. ‘‘‘អាគន្តុកា បាហុនកា, ចលិតេរិតកម្បិតា;

ឯវំ មាតា បិតា តុយ្ហំ, តត្ថ កា បរិទេវនា.

៤៣១. ‘‘‘យថាបិ ឧរគោ ជិណ្ណំ, ហិត្វា គច្ឆតិ សំ តចំ [សំតនុំ (ស្យា. ក.)];

ឯវំ មាតា បិតា តុយ្ហំ, សំ តនុំ ឥធ ហីយរេ’.

៤៣២. ‘‘ពុទ្ធស្ស គិរមញ្ញាយ, សោកសល្លំ វិវជ្ជយិំ;

បាមោជ្ជំ ជនយិត្វាន, ពុទ្ធសេដ្ឋំ អវន្ទហំ.

៤៣៣. ‘‘វន្ទិត្វាន មហានាគំ, បូជយិំ គិរិមញ្ជរិំ [គិរិមញ្ជរិមបូជយិំ (សី. ស្យា.)];

ទិព្ពគន្ធំ សម្បវន្តំ [ទិព្ពគន្ធេន សម្បន្នំ (សី. ស្យា.)], សុមេធំ លោកនាយកំ.

៤៣៤. ‘‘បូជយិត្វាន សម្ពុទ្ធំ, សិរេ កត្វាន អញ្ជលិំ;

អនុស្សរំ គុណគ្គានិ, សន្ថវិំ លោកនាយកំ.

៤៣៥. ‘‘និត្តិណ្ណោសិ [និត្តណ្ហោសិ (សី.), វិតិណ្ណោសិ (ស្យា.)] មហាវីរ, សព្ពញ្ញុ លោកនាយក;

សព្ពេ សត្តេ ឧទ្ធរសិ, ញាណេន ត្វំ មហាមុនេ.

៤៣៦. ‘‘វិមតិំ ទ្វេឡ្ហកំ វាបិ, សញ្ឆិន្ទសិ មហាមុនេ;

បដិបាទេសិ មេ មគ្គំ, តវ ញាណេន ចក្ខុម.

៤៣៧. ‘‘អរហា វសិបត្តា [សិទ្ធិបត្តា (សី. ស្យា.)] ច, ឆឡភិញ្ញា មហិទ្ធិកា;

អន្តលិក្ខចរា ធីរា, បរិវារេន្តិ តាវទេ.

៤៣៨. ‘‘បដិបន្នា ច សេខា ច, ផលដ្ឋា សន្តិ សាវកា;

សូរោទយេវ បទុមា, បុប្ផន្តិ តវ សាវកា.

៤៣៩. ‘‘មហាសមុទ្ទោវក្ខោភោ, អតុលោបិ [យថា សមុទ្ទោ អក្ខោភោ, អតុលោ ច (សី.)] ទុរុត្តរោ;

ឯវំ ញាណេន សម្បន្នោ, អប្បមេយ្យោសិ ចក្ខុម.

៤៤០. ‘‘វន្ទិត្វាហំ លោកជិនំ, ចក្ខុមន្តំ មហាយសំ;

បុថុ ទិសា នមស្សន្តោ, បដិកុដិកោ អគញ្ឆហំ.

៤៤១. ‘‘ទេវលោកា ចវិត្វាន, សម្បជានោ បតិស្សតោ;

ឱក្កមិំ មាតុយា កុច្ឆិំ, សន្ធាវន្តោ ភវាភវេ.

៤៤២. ‘‘អគារា អភិនិក្ខម្ម, បព្ពជិំ អនគារិយំ;

អាតាបី និបកោ ឈាយី, បដិសល្លានគោចរោ.

៤៤៣. ‘‘បធានំ បទហិត្វាន, តោសយិត្វា មហាមុនិំ;

ចន្ទោវព្ភឃនា មុត្តោ, វិចរាមិ អហំ សទា.

៤៤៤. ‘‘វិវេកមនុយុត្តោម្ហិ, ឧបសន្តោ និរូបធិ;

សព្ពាសវេ បរិញ្ញាយ, វិហរាមិ អនាសវោ.

៤៤៥. ‘‘តិំសកប្បសហស្សម្ហិ, យំ ពុទ្ធមភិបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

៤៤៦. ‘‘កិលេសា ឈាបិតា មយ្ហំ, ភវា សព្ពេ សមូហតា;

សព្ពាសវា បរិក្ខីណា, នត្ថិ ទានិ បុនព្ភវោ.

៤៤៧. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៤៤៨. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា គិរិមានន្ទោ ថេរោ ឥមា គាថាយោ អភាសិត្ថាតិ.

គិរិមានន្ទត្ថេរស្សាបទានំ សត្តមំ.