៦. ពាកុលត្ថេរអបទានំ

៣៨៦. ‘‘ហិមវន្តស្សាវិទូរេ, សោភិតោ នាម បព្ពតោ;

អស្សមោ សុកតោ មយ្ហំ, សកសិស្សេហិ មាបិតោ.

៣៨៧. ‘‘មណ្ឌបា ច ពហូ តត្ថ, បុប្ផិតា សិន្ទុវារកា;

កបិត្ថា ច ពហូ តត្ថ, បុប្ផិតា ជីវជីវកា [ចម្បកា នាគកេតកា (ស្យា.)].

៣៨៨. ‘‘និគ្គុណ្ឌិយោ ពហូ តត្ថ, ពទរាមលកានិ ច;

ផារុសកា អលាពូ ច, បុណ្ឌរីកា ច បុប្ផិតា.

៣៨៩. ‘‘អាឡកា [អឡក្កា (ស្យា.)] ពេលុវា តត្ថ, កទលី មាតុលុង្គកា;

មហានាមា ពហូ តត្ថ, អជ្ជុនា ច បិយង្គុកា.

៣៩០. ‘‘កោសម្ពា សឡលា និម្ពា [នីបា (សី.)], និគ្រោធា ច កបិត្ថនា;

ឯទិសោ អស្សមោ មយ្ហំ, សសិស្សោហំ តហិំ វសិំ.

៣៩១. ‘‘អនោមទស្សី ភគវា, សយម្ភូ លោកនាយកោ;

គវេសំ បដិសល្លានំ, មមស្សមមុបាគមិ.

៣៩២. ‘‘ឧបេតម្ហិ មហាវីរេ, អនោមទស្សិមហាយសេ;

ខណេន លោកនាថស្ស, វាតាពាធោ សមុដ្ឋហិ.

៣៩៣. ‘‘វិចរន្តោ អរញ្ញម្ហិ, អទ្ទសំ លោកនាយកំ;

ឧបគន្ត្វាន សម្ពុទ្ធំ, ចក្ខុមន្តំ មហាយសំ.

៣៩៤. ‘‘ឥរិយញ្ចាបិ ទិស្វាន, ឧបលក្ខេសហំ តទា;

អសំសយញ្ហិ ពុទ្ធស្ស, ព្យាធិ នោ ឧទបជ្ជថ.

៣៩៥. ‘‘ខិប្បំ អស្សមមាគញ្ឆិំ, មម សិស្សាន សន្តិកេ;

ភេសជ្ជំ កត្តុកាមោហំ, សិស្សេ អាមន្តយិំ តទា.

៣៩៦. ‘‘បដិស្សុណិត្វាន មេ វាក្យំ, សិស្សា សព្ពេ សគារវា;

ឯកជ្ឈំ សន្និបតិំសុ, សត្ថុគារវតា មម.

៣៩៧. ‘‘ខិប្បំ បព្ពតមារុយ្ហ, សព្ពោសធមហាសហំ [មកាសហំ (ស្យា. ក.)];

បានីយយោគំ [បានីយយោគ្គំ (សី.)] កត្វាន, ពុទ្ធសេដ្ឋស្សទាសហំ.

៣៩៨. ‘‘បរិភុត្តេ មហាវីរេ, សព្ពញ្ញុលោកនាយកេ;

ខិប្បំ វាតោ វូបសមិ, សុគតស្ស មហេសិនោ.

៣៩៩. ‘‘បស្សទ្ធំ ទរថំ ទិស្វា, អនោមទស្សី មហាយសោ;

សកាសនេ និសីទិត្វា, ឥមា គាថា អភាសថ.

៤០០. ‘‘‘យោ មេ បាទាសិ ភេសជ្ជំ, ព្យាធិញ្ច សមយី មម;

តមហំ កិត្តយិស្សាមិ, សុណាថ មម ភាសតោ.

៤០១. ‘‘‘កប្បសតសហស្សានិ, ទេវលោកេ រមិស្សតិ;

វាទិតេ តូរិយេ តត្ថ, មោទិស្សតិ សទា អយំ.

៤០២. ‘‘‘មនុស្សលោកមាគន្ត្វា, សុក្កមូលេន ចោទិតោ;

សហស្សក្ខត្តុំ រាជា ច, ចក្កវត្តី ភវិស្សតិ.

៤០៣. ‘‘‘បញ្ចបញ្ញាសកប្បម្ហិ, អនោមោ នាម ខត្តិយោ;

ចាតុរន្តោ វិជិតាវី, ជម្ពុមណ្ឌស្ស [ជម្ពុទីបស្ស (ស្យា.)] ឥស្សរោ.

៤០៤. ‘‘‘សត្តរតនសម្បន្នោ, ចក្កវត្តី មហព្ពលោ;

តាវតិំសេបិ ខោភេត្វា, ឥស្សរំ ការយិស្សតិ.

៤០៥. ‘‘‘ទេវភូតោ មនុស្សោ វា, អប្បាពាធោ ភវិស្សតិ;

បរិគ្គហំ វិវជ្ជេត្វា, ព្យាធិំ លោកេ តរិស្សតិ.

៤០៦. ‘‘‘អប្បរិមេយ្យេ ឥតោ កប្បេ, ឱក្កាកកុលសម្ភវោ;

គោតមោ នាម គោត្តេន, សត្ថា លោកេ ភវិស្សតិ.

៤០៧. ‘‘‘តស្ស ធម្មេសុ ទាយាទោ, ឱរសោ ធម្មនិម្មិតោ;

សព្ពាសវេ បរិញ្ញាយ, និព្ពាយិស្សតិនាសវោ.

៤០៨. ‘‘‘កិលេសេ ឈាបយិត្វាន, តណ្ហាសោតំ តរិស្សតិ;

ពាកុលោ [ពក្កុលោ (សី. ស្យា.)] នាម នាមេន, ហេស្សតិ សត្ថុ សាវកោ.

៤០៩. ‘‘‘ឥទំ សព្ពំ អភិញ្ញាយ, គោតមោ សក្យបុង្គវោ;

ភិក្ខុសង្ឃេ និសីទិត្វា, ឯតទគ្គេ ឋបេស្សតិ’.

៤១០. ‘‘អនោមទស្សី ភគវា, សយម្ភូ លោកនាយកោ;

វិវេកានុវិលោកេន្តោ, មមស្សមមុបាគមិ.

៤១១. ‘‘ឧបាគតំ មហាវីរំ, សព្ពញ្ញុំ លោកនាយកំ;

សព្ពោសធេន តប្បេសិំ, បសន្នោ សេហិ បាណិភិ.

៤១២. ‘‘តស្ស មេ សុកតំ កម្មំ, សុខេត្តេ ពីជសម្បទា;

ខេបេតុំ នេវ សក្កោមិ, តទា ហិ សុកតំ មម.

៤១៣. ‘‘លាភា មម សុលទ្ធំ មេ, យោហំ អទ្ទក្ខិ នាយកំ;

តេន កម្មាវសេសេន, បត្តោម្ហិ អចលំ បទំ.

៤១៤. ‘‘សព្ពមេតំ អភិញ្ញាយ, គោតមោ សក្យបុង្គវោ;

ភិក្ខុសង្ឃេ និសីទិត្វា, ឯតទគ្គេ ឋបេសិ មំ.

៤១៥. ‘‘អបរិមេយ្យេ ឥតោ កប្បេ, យំ កម្មមករិំ តទា;

ទុគ្គតិំ នាភិជានាមិ, ភេសជ្ជស្ស ឥទំ ផលំ.

៤១៦. ‘‘កិលេសា ឈាបិតា មយ្ហំ, ភវា សព្ពេ សមូហតា;

សព្ពាសវា បរិក្ខីណា, នត្ថិ ទានិ បុនព្ភវោ.

៤១៧. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៤១៨. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ពាកុលោ [ពក្កុលោ (សី. ស្យា.)] ថេរោ ឥមា គាថាយោ អភាសិត្ថាតិ;

ពាកុលត្ថេរស្សាបទានំ ឆដ្ឋំ.