៥. បទុមកូដាគារិយត្ថេរអបទានំ

៣៥៣. ‘‘បិយទស្សី នាម ភគវា, សយម្ភូ លោកនាយកោ;

វិវេកកាមោ សម្ពុទ្ធោ, សមាធិកុសលោ មុនិ.

៣៥៤. ‘‘វនសណ្ឌំ សមោគយ្ហ, បិយទស្សី មហាមុនិ;

បំសុកូលំ បត្ថរិត្វា, និសីទិ បុរិសុត្តមោ.

៣៥៥. ‘‘មិគលុទ្ទោ បុរេ អាសិំ, អរញ្ញេ [វិបិនេ (សី.), ឥរិនេ (ស្យា. ក.)] កាននេ អហំ;

បសទំ មិគមេសន្តោ, អាហិណ្ឌាមិ អហំ តទា.

៣៥៦. ‘‘តត្ថទ្ទសាសិំ សម្ពុទ្ធំ, ឱឃតិណ្ណមនាសវំ;

បុប្ផិតំ សាលរាជំវ, សតរំសិំវ ឧគ្គតំ.

៣៥៧. ‘‘ទិស្វានហំ ទេវទេវំ, បិយទស្សិំ មហាយសំ;

ជាតស្សរំ សមោគយ្ហ, បទុមំ អាហរិំ តទា.

៣៥៨. ‘‘អាហរិត្វាន បទុមំ, សតបត្តំ មនោរមំ;

កូដាគារំ ករិត្វាន, ឆាទយិំ បទុមេនហំ.

៣៥៩. ‘‘អនុកម្បកោ ការុណិកោ, បិយទស្សី មហាមុនិ;

សត្តរត្តិន្ទិវំ ពុទ្ធោ, កូដាគារេ វសី ជិនោ.

៣៦០. ‘‘បុរាណំ ឆឌ្ឌយិត្វាន, នវេន ឆាទយិំ អហំ;

អញ្ជលិំ បគ្គហេត្វាន, អដ្ឋាសិំ តាវទេ អហំ.

៣៦១. ‘‘វុដ្ឋហិត្វា សមាធិម្ហា, បិយទស្សី មហាមុនិ;

ទិសំ អនុវិលោកេន្តោ, និសីទិ លោកនាយកោ.

៣៦២. ‘‘តទា សុទស្សនោ នាម, ឧបដ្ឋាកោ មហិទ្ធិកោ;

ចិត្តមញ្ញាយ ពុទ្ធស្ស, បិយទស្សិស្ស សត្ថុនោ.

៣៦៣. ‘‘អសីតិយា សហស្សេហិ, ភិក្ខូហិ បរិវារិតោ;

វនន្តេ សុខមាសីនំ, ឧបេសិ លោកនាយកំ.

៣៦៤. ‘‘យាវតា វនសណ្ឌម្ហិ, អធិវត្ថា ច ទេវតា;

ពុទ្ធស្ស ចិត្តមញ្ញាយ, សព្ពេ សន្និបតុំ តទា.

៣៦៥. ‘‘សមាគតេសុ យក្ខេសុ, កុម្ភណ្ឌេ សហរក្ខសេ;

ភិក្ខុសង្ឃេ ច សម្បត្តេ, គាថា បព្យាហរី [សព្យាហរី (ស្យា.), មាព្យាហរី (សី.)] ជិនោ.

៣៦៦. ‘‘‘យោ មំ សត្តាហំ បូជេសិ, អាវាសញ្ច អកាសិ មេ;

តមហំ កិត្តយិស្សាមិ, សុណាថ មម ភាសតោ.

៣៦៧. ‘‘‘សុទុទ្ទសំ សុនិបុណំ, គម្ភីរំ សុប្បកាសិតំ;

ញាណេន កិត្តយិស្សាមិ, សុណាថ មម ភាសតោ.

៣៦៨. ‘‘‘ចតុទ្ទសានិ កប្បានិ, ទេវរជ្ជំ ករិស្សតិ;

កូដាគារំ មហន្តស្ស [ព្រហំ តស្ស (សី. ស្យា.)], បទ្មបុប្ផេហិ ឆាទិតំ.

៣៦៩. ‘‘‘អាកាសេ ធារយិស្សតិ, បុប្ផកម្មស្សិទំ [បុព្ពកម្មស្សិទំ (ស្យា.)] ផលំ;

ចតុព្ពីសេ [ចតុទ្ទសេ (ស្យា.)] កប្បសតេ, វោកិណ្ណំ សំសរិស្សតិ.

៣៧០. ‘‘‘តត្ថ បុប្ផមយំ ព្យម្ហំ, អាកាសេ ធារយិស្សតិ;

យថា បទុមបត្តម្ហិ, តោយំ ន ឧបលិម្បតិ.

៣៧១. ‘‘‘តថេវីមស្ស ញាណម្ហិ, កិលេសា នោបលិម្បរេ;

មនសា វិនិវដ្ដេត្វា, បញ្ច នីវរណេ អយំ.

៣៧២. ‘‘‘ចិត្តំ ជនេត្វា នេក្ខម្មេ, អគារា បព្ពជិស្សតិ;

តតោ បុប្ផមយេ ព្យម្ហេ, ធារេន្តេ [បុប្ផមយំ ព្យម្ហំ, ធារេន្តំ (ស្យា. ក.)] និក្ខមិស្សតិ.

៣៧៣. ‘‘‘រុក្ខមូលេ វសន្តស្ស, និបកស្ស សតីមតោ;

តត្ថ បុប្ផមយំ ព្យម្ហំ, មត្ថកេ ធារយិស្សតិ.

៣៧៤. ‘‘‘ចីវរំ បិណ្ឌបាតញ្ច, បច្ចយំ សយនាសនំ;

ទត្វាន ភិក្ខុសង្ឃស្ស, និព្ពាយិស្សតិនាសវោ’.

៣៧៥. ‘‘កូដាគារេន ចរតា [ចរណា (សី. បី. ក.), ចរិតេ (ស្យា.)], បព្ពជ្ជំ អភិនិក្ខមិំ;

រុក្ខមូលេ វសន្តម្បិ [វសន្តម្ហិ (សី.), វសតោបិ (?)], កូដាគារំ ធរីយតិ.

៣៧៦. ‘‘ចីវរេ បិណ្ឌបាតេ ច, ចេតនា មេ ន វិជ្ជតិ;

បុញ្ញកម្មេន សំយុត្តោ, លភាមិ បរិនិដ្ឋិតំ.

៣៧៧. ‘‘គណនាតោ អសង្ខេយ្យា, កប្បកោដី ពហូ មម;

រិត្តកា តេ អតិក្កន្តា, បមុត្តា លោកនាយកា.

៣៧៨. ‘‘អដ្ឋារសេ កប្បសតេ, បិយទស្សី វិនាយកោ;

តមហំ បយិរុបាសិត្វា, ឥមំ យោនិំ ឧបាគតោ.

៣៧៩. ‘‘ឥធ បស្សាមិ [ឥធទ្ទសាសិំ (សី.)] សម្ពុទ្ធំ, អនោមំ នាម ចក្ខុមំ;

តមហំ ឧបគន្ត្វាន, បព្ពជិំ អនគារិយំ.

៣៨០. ‘‘ទុក្ខស្សន្តករោ ពុទ្ធោ, មគ្គំ មេ ទេសយី ជិនោ;

តស្ស ធម្មំ សុណិត្វាន, បត្តោម្ហិ អចលំ បទំ.

៣៨១. ‘‘តោសយិត្វាន សម្ពុទ្ធំ, គោតមំ សក្យបុង្គវំ;

សព្ពាសវេ បរិញ្ញាយ, វិហរាមិ អនាសវោ.

៣៨២. ‘‘អដ្ឋារសេ កប្បសតេ, យំ ពុទ្ធមភិបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

៣៨៣. ‘‘កិលេសា ឈាបិតា មយ្ហំ, ភវា សព្ពេ សមូហតា;

សព្ពាសវា បរិក្ខីណា, នត្ថិ ទានិ បុនព្ភវោ.

៣៨៤. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៣៨៥. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បទុមកូដាគារិយោ ថេរោ ឥមា គាថាយោ អភាសិត្ថាតិ.

បទុមកូដាគារិយត្ថេរស្សាបទានំ បញ្ចមំ.