៤. មធុទាយកត្ថេរអបទានំ

៣៣៣. ‘‘សិន្ធុយា នទិយា តីរេ, សុកតោ អស្សមោ មម;

តត្ថ វាចេមហំ សិស្សេ, ឥតិហាសំ សលក្ខណំ.

៣៣៤. ‘‘ធម្មកាមា វិនីតា តេ, សោតុកាមា សុសាសនំ;

ឆឡង្គេ បារមិប្បត្តា, សិន្ធុកូលេ វសន្តិ តេ.

៣៣៥. ‘‘ឧប្បាតគមនេ ចេវ, លក្ខណេសុ ច កោវិទា;

ឧត្តមត្ថំ គវេសន្តា, វសន្តិ វិបិនេ តទា.

៣៣៦. ‘‘សុមេធោ នាម សម្ពុទ្ធោ, លោកេ ឧប្បជ្ជិ តាវទេ;

អម្ហាកំ អនុកម្បន្តោ, ឧបាគច្ឆិ វិនាយកោ.

៣៣៧. ‘‘ឧបាគតំ មហាវីរំ, សុមេធំ លោកនាយកំ;

តិណសន្ថារកំ កត្វា, លោកជេដ្ឋស្សទាសហំ.

៣៣៨. ‘‘វិបិនាតោ មធុំ គយ្ហ, ពុទ្ធសេដ្ឋស្សទាសហំ;

សម្ពុទ្ធោ បរិភុញ្ជិត្វា, ឥទំ វចនមព្រវិ.

៣៣៩. ‘‘‘យោ តំ អទាសិ មធុំ មេ, បសន្នោ សេហិ បាណិភិ;

តមហំ កិត្តយិស្សាមិ, សុណាថ មម ភាសតោ.

៣៤០. ‘‘‘ឥមិនា មធុទានេន, តិណសន្ថារកេន ច;

តិំស កប្បសហស្សានិ, ទេវលោកេ រមិស្សតិ.

៣៤១. ‘‘‘តិំស កប្បសហស្សម្ហិ, ឱក្កាកកុលសម្ភវោ;

គោតមោ នាម គោត្តេន, សត្ថា លោកេ ភវិស្សតិ.

៣៤២. ‘‘‘តស្ស ធម្មេសុ ទាយាទោ, ឱរសោ ធម្មនិម្មិតោ;

សព្ពាសវេ បរិញ្ញាយ, និព្ពាយិស្សតិនាសវោ.

៣៤៣. ‘‘‘ទេវលោកា ឥធាគន្ត្វា, មាតុកុច្ឆិំ ឧបាគតេ;

មធុវស្សំ បវស្សិត្ថ, ឆាទយំ មធុនា មហិំ’.

៣៤៤. ‘‘មយិ និក្ខន្តមត្តម្ហិ, កុច្ឆិយា ច សុទុត្តរា;

តត្រាបិ មធុវស្សំ មេ, វស្សតេ និច្ចកាលិកំ.

៣៤៥. ‘‘អគារា អភិនិក្ខម្ម, បព្ពជិំ អនគារិយំ;

លាភី អន្នស្ស បានស្ស, មធុទានស្សិទំ ផលំ.

៣៤៦. ‘‘សព្ពកាមសមិទ្ធោហំ, ភវិត្វា ទេវមានុសេ;

តេនេវ មធុទានេន, បត្តោម្ហិ អាសវក្ខយំ.

៣៤៧. ‘‘វុដ្ឋម្ហិ ទេវេ ចតុរង្គុលេ តិណេ, សម្បុប្ផិតេ [សុបុប្ផិតេ (ស្យា.)] ធរណីរុហេ សញ្ឆន្នេ [វប្បទេសេ (ស្យា.)];

សុញ្ញេ ឃរេ មណ្ឌបរុក្ខមូលកេ, វសាមិ និច្ចំ សុខិតោ អនាសវោ.

៣៤៨. ‘‘មជ្ឈេ មហន្តេ ហីនេ ច [មជ្ឈេ មយ្ហំ ភវា អស្សុ (ស្យា. បី. ក.)], ភវេ សព្ពេ អតិក្កមិំ [យេ ភវេ សមតិក្កមិំ (ស្យា. ក.), យោ ភវេសុ បកិត្តយិ (ក.)];

អជ្ជ មេ អាសវា ខីណា, នត្ថិ ទានិ បុនព្ភវោ.

៣៤៩. ‘‘តិំសកប្បសហស្សម្ហិ, យំ ទានមទទិំ តទា;

ទុគ្គតិំ នាភិជានាមិ, មធុទានស្សិទំ ផលំ.

៣៥០. ‘‘កិលេសា ឈាបិតា មយ្ហំ, ភវា សព្ពេ សមូហតា;

សព្ពាសវា បរិក្ខីណា, នត្ថិ ទានិ បុនព្ភវោ.

៣៥១. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៣៥២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា មធុទាយកោ ថេរោ ឥមា គាថាយោ អភាសិត្ថាតិ.

មធុទាយកត្ថេរស្សាបទានំ ចតុត្ថំ.