៣. សព្ពកិត្តិកត្ថេរអបទានំ

៣០៤. ‘‘កណិការំវ ជលិតំ [ជោតន្តំ (សី.)], ទីបរុក្ខំវ ឧជ្ជលំ [ជោតិតំ (ស្យា.)];

ឱសធិំវ វិរោចន្តំ, វិជ្ជុតំ គគនេ យថា.

៣០៥. ‘‘អសម្ភីតំ អនុត្តាសិំ, មិគរាជំវ កេសរិំ;

ញាណាលោកំ បកាសេន្តំ, មទ្ទន្តំ តិត្ថិយេ គណេ.

៣០៦. ‘‘ឧទ្ធរន្តំ ឥមំ លោកំ, ឆិទ្ទន្តំ សព្ពសំសយំ;

គជ្ជន្តំ [អសម្ភីតំ (ស្យា.), គច្ឆន្តំ (ក.)] មិគរាជំវ, អទ្ទសំ លោកនាយកំ.

៣០៧. ‘‘ជដាជិនធរោ អាសិំ, ព្រហា ឧជុ បតាបវា;

វាកចីរំ គហេត្វាន, បាទមូលេ អបត្ថរិំ.

៣០៨. ‘‘កាឡានុសារិយំ គយ្ហ, អនុលិម្បិំ តថាគតំ;

សម្ពុទ្ធមនុលិម្បេត្វា, សន្ថវិំ លោកនាយកំ.

៣០៩. ‘‘សមុទ្ធរសិមំ លោកំ, ឱឃតិណ្ណ [ឱឃតិណ្ណោ (ស្យា. ក.)] មហាមុនិ;

ញាណាលោកេន ជោតេសិ, នាវដំ [បវរំ (ស្យា.), វជិរ (បី.)] ញាណមុត្តមំ.

៣១០. ‘‘ធម្មចក្កំ [តុវំ ចក្កំ (ក.)] បវត្តេសិ, មទ្ទសេ បរតិត្ថិយេ;

ឧសភោ ជិតសង្គាមោ, សម្បកម្បេសិ មេទនិំ.

៣១១. ‘‘មហាសមុទ្ទេ ឩមិយោ, វេលន្តម្ហិ បភិជ្ជរេ;

តថេវ តវ ញាណម្ហិ, សព្ពទិដ្ឋី បភិជ្ជរេ.

៣១២. ‘‘សុខុមច្ឆិកជាលេន, សរម្ហិ សម្បតានិតេ;

អន្តោជាលិកតា [ជាលគតា (សី.)] បាណា, បីឡិតា ហោន្តិ តាវទេ.

៣១៣. ‘‘តថេវ តិត្ថិយា លោកេ, បុថុបាសណ្ឌនិស្សិតា [មូឡ្ហា សច្ចវិនិស្សដា (ស្យា.), មុដ្ឋសច្ចវិនិស្សដា (ក.)];

អន្តោញាណវរេ តុយ្ហំ, បរិវត្តន្តិ មារិស.

៣១៤. ‘‘បតិដ្ឋា វុយ្ហតំ ឱឃេ, ត្វញ្ហិ នាថោ អពន្ធុនំ;

ភយដ្ដិតានំ សរណំ, មុត្តិត្ថីនំ បរាយណំ.

៣១៥. ‘‘ឯកវីរោ អសទិសោ, មេត្តាករុណសញ្ចយោ [សញ្ញុតោ (ស្យា.)];

អសមោ សុសមោ សន្តោ [សុសីលោ អសមោ សន្តោ (សី.), បញ្ញវា យុត្តចាគោ ច (ស្យា.)], វសី តាទី ជិតញ្ជយោ.

៣១៦. ‘‘ធីរោ វិគតសម្មោហោ, អនេជោ អកថំកថី;

តុសិតោ [វុសិតោ (សី.)] វន្តទោសោសិ, និម្មលោ សំយតោ សុចិ.

៣១៧. ‘‘សង្គាតិគោ ហតមទោ [គតមទោ (ស្យា.), តមនុទោ (ក.)], តេវិជ្ជោ តិភវន្តគោ;

សីមាតិគោ ធម្មគរុ, គតត្ថោ ហិតវព្ភុតោ [ហិតវប្បថោ (សី. ស្យា.)].

៣១៨. ‘‘តារកោ ត្វំ យថា នាវា, និធីវស្សាសការកោ;

អសម្ភីតោ យថា សីហោ, គជរាជាវ ទប្បិតោ.

៣១៩. ‘‘ថោមេត្វា ទសគាថាហិ, បទុមុត្តរំ មហាយសំ;

វន្ទិត្វា សត្ថុនោ បាទេ, តុណ្ហី អដ្ឋាសហំ តទា.

៣២០. ‘‘បទុមុត្តរោ លោកវិទូ, អាហុតីនំ បដិគ្គហោ;

ភិក្ខុសង្ឃេ ឋិតោ សត្ថា, ឥមា គាថា អភាសថ.

៣២១. ‘‘‘យោ មេ សីលញ្ច ញាណញ្ច, សទ្ធម្មញ្ចាបិ វណ្ណយិ [ធម្មញ្ចាបិ បកិត្តយិ (សី. ស្យា.)];

តមហំ កិត្តយិស្សាមិ, សុណាថ មម ភាសតោ.

៣២២. ‘‘‘សដ្ឋិ កប្បសហស្សានិ, ទេវលោកេ រមិស្សតិ;

អញ្ញេ ទេវេភិភវិត្វា, ឥស្សរំ ការយិស្សតិ.

៣២៣. ‘‘‘សោ បច្ឆា បព្ពជិត្វាន, សុក្កមូលេន ចោទិតោ;

គោតមស្ស ភគវតោ, សាសនេ បព្ពជិស្សតិ.

៣២៤. ‘‘‘បព្ពជិត្វាន កាយេន, បាបកម្មំ វិវជ្ជិយ;

សព្ពាសវេ បរិញ្ញាយ, និព្ពាយិស្សតិនាសវោ’.

៣២៥. ‘‘យថាបិ មេឃោ ថនយំ, តប្បេតិ មេទិនិំ ឥមំ;

តថេវ ត្វំ មហាវីរ, ធម្មេន តប្បយី មមំ.

៣២៦. ‘‘សីលំ បញ្ញញ្ច ធម្មញ្ច, ថវិត្វា លោកនាយកំ;

បត្តោម្ហិ បរមំ សន្តិំ, និព្ពានំ បទមច្ចុតំ.

៣២៧. ‘‘អហោ នូន ស ភគវា, ចិរំ តិដ្ឋេយ្យ ចក្ខុមា;

អញ្ញាតញ្ច វិជានេយ្យុំ, ផុសេយ្យុំ [អញ្ញាតញ្ចាបិ ជានេយ្យ, បស្សេយ្យ (ក.)] អមតំ បទំ.

៣២៨. ‘‘អយំ មេ បច្ឆិមា ជាតិ, ភវា សព្ពេ សមូហតា;

សព្ពាសវេ បរិញ្ញាយ, វិហរាមិ អនាសវោ.

៣២៩. ‘‘សតសហស្សិតោ កប្បេ, យំ ពុទ្ធមភិថោមយិំ

ទុគ្គតិំ នាភិជានាមិ, កិត្តនាយ ឥទំ ផលំ.

៣៣០. ‘‘កិលេសា ឈាបិតា មយ្ហំ, ភវា សព្ពេ សមូហតា;

សព្ពាសវា បរិក្ខីណា, នត្ថិ ទានិ បុនព្ភវោ.

៣៣១. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៣៣២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សព្ពកិត្តិកោ ថេរោ ឥមា គាថាយោ អភាសិត្ថាតិ.

សព្ពកិត្តិកត្ថេរស្សាបទានំ តតិយំ.