២. សេលត្ថេរអបទានំ

២០៨. ‘‘នគរេ ហំសវតិយា, វីថិសាមី អហោសហំ;

មម ញាតី សមានេត្វា, ឥទំ វចនមព្រវិំ.

២០៩. ‘‘‘ពុទ្ធោ លោកេ សមុប្បន្នោ, បុញ្ញក្ខេត្តោ អនុត្តរោ [បុញ្ញក្ខេត្តំ អនុត្តរំ (សី.)];

អាសិ សោ [អាសីសោ (សី.), អាធារោ (បី.)] សព្ពលោកស្ស, អាហុតីនំ បដិគ្គហោ.

២១០. ‘‘‘ខត្តិយា នេគមា ចេវ, មហាសាលា ច ព្រាហ្មណា;

បសន្នចិត្តា សុមនា, បូគធម្មំ អកំសុ តេ.

២១១. ‘‘‘ហត្ថារោហា អនីកដ្ឋា, រថិកា បត្តិការកា;

បសន្នចិត្តា សុមនា, បូគធម្មំ អកំសុ តេ.

២១២. ‘‘‘ឧគ្គា ច រាជបុត្តា ច, វេសិយានា ច ព្រាហ្មណា;

បសន្នចិត្តា សុមនា, បូគធម្មំ អកំសុ តេ.

២១៣. ‘‘‘អាឡារិកា កប្បកា [អាឡារិកា ច សូទា (ស្យា.)] ច, ន្ហាបកា មាលការកា;

បសន្នចិត្តា សុមនា, បូគធម្មំ អកំសុ តេ.

២១៤. ‘‘‘រជកា បេសការា ច, ចម្មការា ច ន្ហាបិតា;

បសន្នចិត្តា សុមនា, បូគធម្មំ អកំសុ តេ.

២១៥. ‘‘‘ឧសុការា ភមការា, ចម្មការា ច តច្ឆកា;

បសន្នចិត្តា សុមនា, បូគធម្មំ អកំសុ តេ.

២១៦. ‘‘‘កម្មារា សោណ្ណការា ច, តិបុលោហករា តថា;

បសន្នចិត្តា សុមនា, បូគធម្មំ អកំសុ តេ.

២១៧. ‘‘‘ភតកា ចេដកា ចេវ, ទាសកម្មករា ពហូ;

យថាសកេន ថាមេន, បូគធម្មំ អកំសុ តេ.

២១៨. ‘‘‘ឧទហារា កដ្ឋហារា, កស្សកា តិណហារកា;

យថាសកេន ថាមេន, បូគធម្មំ អកំសុ តេ.

២១៩. ‘‘‘បុប្ផិកា មាលិកា ចេវ, បណ្ណិកា ផលហារកា;

យថាសកេន ថាមេន, បូគធម្មំ អកំសុ តេ.

២២០. ‘‘‘គណិកា កុម្ភទាសី ច, បូវិកា [សូបិកា (ក.)] មច្ឆិកាបិ ច;

យថាសកេន ថាមេន, បូគធម្មំ អកំសុ តេ.

២២១. ‘‘‘ឯថ សព្ពេ សមាគន្ត្វា, គណំ ពន្ធាម ឯកតោ;

អធិការំ ករិស្សាម, បុញ្ញក្ខេត្តេ អនុត្តរេ’.

២២២. ‘‘តេ មេ សុត្វាន វចនំ, គណំ ពន្ធិំសុ តាវទេ;

ឧបដ្ឋានសាលំ សុកតំ, ភិក្ខុសង្ឃស្ស ការយុំ.

២២៣. ‘‘និដ្ឋាបេត្វាន តំ សាលំ, ឧទគ្គោ តុដ្ឋមានសោ;

បរេតោ តេហិ សព្ពេហិ, សម្ពុទ្ធមុបសង្កមិំ.

២២៤. ‘‘ឧបសង្កម្ម សម្ពុទ្ធំ, លោកនាថំ នរាសភំ;

វន្ទិត្វា សត្ថុនោ បាទេ, ឥទំ វចនមព្រវិំ.

២២៥. ‘‘‘ឥមេ តីណិ សតា វីរ, បុរិសា ឯកតោ គណា;

ឧបដ្ឋានសាលំ សុកតំ, និយ្យាទេន្តិ [និយ្យាតេន្តិ (សី.)] តុវំ [តវំ (សី.), តវ (ស្យា.)] មុនិ’.

២២៦. ‘‘ភិក្ខុសង្ឃស្ស បុរតោ, សម្បដិច្ឆត្វ ចក្ខុមា;

តិណ្ណំ សតានំ បុរតោ, ឥមា គាថា អភាសថ.

២២៧. ‘‘‘តិសតាបិ ច ជេដ្ឋោ ច, អនុវត្តិំសុ ឯកតោ;

សម្បត្តិញ្ហិ [សម្បត្តីហិ (ស្យា. ក.)] ករិត្វាន, សព្ពេ អនុភវិស្សថ.

២២៨. ‘‘‘បច្ឆិមេ ភវេ សម្បត្តេ, សីតិភាវមនុត្តរំ;

អជរំ អមតំ សន្តំ, និព្ពានំ ផស្សយិស្សថ’.

២២៩. ‘‘ឯវំ ពុទ្ធោ វិយាកាសិ, សព្ពញ្ញូ សមណុត្តរោ;

ពុទ្ធស្ស វចនំ សុត្វា, សោមនស្សំ បវេទយិំ.

២៣០. ‘‘តិំស កប្បសហស្សានិ, ទេវលោកេ រមិំ អហំ;

ទេវាធិបោ បញ្ចសតំ, ទេវរជ្ជមការយិំ.

២៣១. ‘‘សហស្សក្ខត្តុំ រាជា ច, ចក្កវត្តី អហោសហំ;

ទេវរជ្ជំ ករោន្តស្ស, មហាទេវា អវន្ទិសុំ.

២៣២. ‘‘ឥធ មានុសកេ រជ្ជំ [រជ្ជេ (សី.)], បរិសា ហោន្តិ ពន្ធវា;

បច្ឆិមេ ភវេ សម្បត្តេ, វាសេដ្ឋោ នាម ព្រាហ្មណោ.

២៣៣. ‘‘អសីតិកោដិ និចយោ, តស្ស បុត្តោ អហោសហំ;

សេលោ ឥតិ មម នាមំ, ឆឡង្គេ បារមិំ គតោ.

២៣៤. ‘‘ជង្ឃាវិហារំ វិចរំ, សសិស្សេហិ បុរក្ខតោ;

ជដាភារិកភរិតំ, កេណិយំ នាម តាបសំ.

២៣៥. ‘‘បដិយត្តាហុតិំ ទិស្វា, ឥទំ វចនមព្រវិំ;

‘អាវាហោ វា វិវាហោ វា, រាជា វា តេ និមន្តិតោ’.

២៣៦. ‘‘អាហុតិំ [នាហុតិំ (?)] យិដ្ឋុកាមោហំ, ព្រាហ្មណេ ទេវសម្មតេ;

ន និមន្តេមិ រាជានំ, អាហុតី មេ ន វិជ្ជតិ.

២៣៧. ‘‘ន ចត្ថិ មយ្ហមាវាហោ, វិវាហោ មេ ន វិជ្ជតិ;

សក្យានំ នន្ទិជននោ, សេដ្ឋោ លោកេ សទេវកេ.

២៣៨. ‘‘សព្ពលោកហិតត្ថាយ, សព្ពសត្តសុខាវហោ;

សោ មេ និមន្តិតោ អជ្ជ, តស្សេតំ បដិយាទនំ.

២៣៩. ‘‘តិម្ពរូសកវណ្ណាភោ, អប្បមេយ្យោ អនូបមោ;

រូបេនាសទិសោ ពុទ្ធោ, ស្វាតនាយ និមន្តិតោ.

២៤០. ‘‘ឧក្កាមុខបហដ្ឋោវ, ខទិរង្គារសន្និភោ;

វិជ្ជូបមោ មហាវីរោ, សោ មេ ពុទ្ធោ និមន្តិតោ.

២៤១. ‘‘បព្ពតគ្គេ យថា អច្ចិ, បុណ្ណមាយេវ ចន្ទិមា;

នឡគ្គិវណ្ណសង្កាសោ, សោ មេ ពុទ្ធោ និមន្តិតោ.

២៤២. ‘‘អសម្ភីតោ ភយាតីតោ, ភវន្តករណោ មុនិ;

សីហូបមោ មហាវីរោ, សោ មេ ពុទ្ធោ និមន្តិតោ.

២៤៣. ‘‘កុសលោ ពុទ្ធធម្មេហិ, អបសយ្ហោ បរេហិ សោ;

នាគូបមោ មហាវីរោ, សោ មេ ពុទ្ធោ និមន្តិតោ.

២៤៤. ‘‘សទ្ធម្មាចារកុសលោ, ពុទ្ធនាគោ អសាទិសោ;

ឧសភូបមោ មហាវីរោ, សោ មេ ពុទ្ធោ និមន្តិតោ.

២៤៥. ‘‘អនន្តវណ្ណោ អមិតយសោ, វិចិត្តសព្ពលក្ខណោ;

សក្កូបមោ មហាវីរោ, សោ មេ ពុទ្ធោ និមន្តិតោ.

២៤៦. ‘‘វសី គណី បតាបី ច, តេជស្សី ច ទុរាសទោ;

ព្រហ្មូបមោ មហាវីរោ, សោ មេ ពុទ្ធោ និមន្តិតោ.

២៤៧. ‘‘បត្តធម្មោ ទសពលោ, ពលាតិពលបារគោ;

ធរណូបមោ មហាវីរោ, សោ មេ ពុទ្ធោ និមន្តិតោ.

២៤៨. ‘‘សីលវីចិសមាកិណ្ណោ, ធម្មវិញ្ញាណខោភិតោ;

ឧទធូបមោ មហាវីរោ, សោ មេ ពុទ្ធោ និមន្តិតោ.

២៤៩. ‘‘ទុរាសទោ ទុប្បសហោ, អចលោ ឧគ្គតោ ព្រហា;

នេរូបមោ មហាវីរោ, សោ មេ ពុទ្ធោ និមន្តិតោ.

២៥០. ‘‘អនន្តញាណោ អសមសមោ, អតុលោ អគ្គតំ គតោ;

គគនូបមោ មហាវីរោ, សោ មេ ពុទ្ធោ និមន្តិតោ.

បន្នរសមំ ភាណវារំ.

២៥១. ‘‘បតិដ្ឋា ភយភីតានំ, តាណោ សរណគាមិនំ;

អស្សាសកោ មហាវីរោ, សោ មេ ពុទ្ធោ និមន្តិតោ.

២៥២. ‘‘អាសយោ ពុទ្ធិមន្តានំ, បុញ្ញក្ខេត្តំ សុខេសិនំ;

រតនាករោ មហាវីរោ, សោ មេ ពុទ្ធោ និមន្តិតោ.

២៥៣. ‘‘អស្សាសកោ វេទករោ, សាមញ្ញផលទាយកោ;

មេឃូបមោ មហាវីរោ, សោ មេ ពុទ្ធោ និមន្តិតោ.

២៥៤. ‘‘លោកចក្ខុ មហាតេជោ, សព្ពតមវិនោទនោ;

សូរិយូបមោ មហាវីរោ, សោ មេ ពុទ្ធោ និមន្តិតោ.

២៥៥. ‘‘អារម្មណវិមុត្តីសុ, សភាវទស្សនោ មុនិ;

ចន្ទូបមោ មហាវីរោ, សោ មេ ពុទ្ធោ និមន្តិតោ.

២៥៦. ‘‘ពុទ្ធោ សមុស្សិតោ លោកេ, លក្ខណេហិ អលង្កតោ;

អប្បមេយ្យោ មហាវីរោ, សោ មេ ពុទ្ធោ និមន្តិតោ.

២៥៧. ‘‘យស្ស ញាណំ អប្បមេយ្យំ, សីលំ យស្ស អនូបមំ;

វិមុត្តិ អសទិសា យស្ស, សោ មេ ពុទ្ធោ និមន្តិតោ.

២៥៨. ‘‘យស្ស ធីតិ អសទិសា, ថាមោ យស្ស អចិន្តិយោ;

យស្ស បរក្កមោ ជេដ្ឋោ, សោ មេ ពុទ្ធោ និមន្តិតោ.

២៥៩. ‘‘រាគោ ទោសោ ច មោហោ ច, វិសា សព្ពេ សមូហតា;

អគទូបមោ មហាវីរោ, សោ មេ ពុទ្ធោ និមន្តិតោ.

២៦០. ‘‘ក្លេសព្យាធិពហុទុក្ខ សព្ពតមវិនោទនោ [វិនោទកោ (សី. ស្យា.)];

វេជ្ជូបមោ មហាវីរោ, សោ មេ ពុទ្ធោ និមន្តិតោ.

២៦១. ‘‘ពុទ្ធោតិ ភោ យំ វទេសិ, ឃោសោបេសោ សុទុល្លភោ;

ពុទ្ធោ ពុទ្ធោតិ សុត្វាន, បីតិ មេ ឧទបជ្ជថ.

២៦២. ‘‘អព្ភន្តរំ អគណ្ហន្តំ, បីតិ មេ ពហិ និច្ឆរេ;

សោហំ បីតិមនោ សន្តោ, ឥទំ វចនមព្រវិំ.

២៦៣. ‘‘‘កហំ នុ ខោ សោ ភគវា, លោកជេដ្ឋោ នរាសភោ;

តត្ថ គន្ត្វា នមស្សិស្សំ, សាមញ្ញផលទាយកំ’.

២៦៤. ‘‘‘បគ្គយ្ហ ទក្ខិណំ ពាហុំ, វេទជាតោ កតញ្ជលី;

អាចិក្ខិ មេ ធម្មរាជំ, សោកសល្លវិនោទនំ.

២៦៥. ‘‘‘ឧទេន្តំវ មហាមេឃំ, នីលំ អញ្ជនសន្និភំ;

សាគរំ វិយ ទិស្សន្តំ, បស្សសេតំ មហាវនំ.

២៦៦. ‘‘‘ឯត្ថ សោ វសតេ ពុទ្ធោ, អទន្តទមកោ មុនិ;

វិនយន្តោ ច វេនេយ្យេ, ពោធេន្តោ ពោធិបក្ខិយេ.

២៦៧. ‘‘‘បិបាសិតោវ ឧទកំ, ភោជនំវ ជិឃច្ឆិតោ;

គាវី យថា វច្ឆគិទ្ធា, ឯវាហំ វិចិនិំ ជិនំ.

២៦៨. ‘‘‘អាចារឧបចារញ្ញូ, ធម្មានុច្ឆវិសំវរំ;

សិក្ខាបេមិ សកេ សិស្សេ, គច្ឆន្តេ ជិនសន្តិកំ.

២៦៩. ‘‘‘ទុរាសទា ភគវន្តោ, សីហាវ ឯកចារិនោ;

បទេ បទំ និក្ខិបន្តា, អាគច្ឆេយ្យាថ មាណវា.

២៧០. ‘‘‘អាសីវិសោ យថា ឃោរោ, មិគរាជាវ កេសរី;

មត្តោវ កុញ្ជរោ ទន្តី, ឯវំ ពុទ្ធា ទុរាសទា.

២៧១. ‘‘‘ឧក្កាសិតញ្ច ខិបិតំ, អជ្ឈុបេក្ខិយ មាណវា;

បទេ បទំ និក្ខិបន្តា, ឧបេថ ពុទ្ធសន្តិកំ.

២៧២. ‘‘‘បដិសល្លានគរុកា, អប្បសទ្ទា ទុរាសទា;

ទុរូបសង្កមា ពុទ្ធា, គរូ ហោន្តិ សទេវកេ.

២៧៣. ‘‘‘យទាហំ បញ្ហំ បុច្ឆាមិ, បដិសម្មោទយាមិ វា;

អប្បសទ្ទា តទា ហោថ, មុនិភូតាវ តិដ្ឋថ.

២៧៤. ‘‘‘យំ សោ ទេសេតិ សម្ពុទ្ធោ [សទ្ធម្មំ (សី. ស្យា.)], ខេមំ និព្ពានបត្តិយា;

តមេវត្ថំ និសាមេថ, សទ្ធម្មសវនំ សុខំ’.

២៧៥. ‘‘ឧបសង្កម្ម សម្ពុទ្ធំ, សម្មោទិំ មុនិនា អហំ;

តំ កថំ វីតិសារេត្វា, លក្ខណេ ឧបធារយិំ.

២៧៦. ‘‘លក្ខណេ ទ្វេ ច កង្ខាមិ, បស្សាមិ តិំសលក្ខណេ;

កោសោហិតវត្ថគុយ្ហំ, ឥទ្ធិយា ទស្សយី មុនិ.

២៧៧. ‘‘ជិវ្ហំ និន្នាមយិត្វាន, កណ្ណសោតេ ច នាសិកេ;

បដិមសិ នលាដន្តំ, កេវលំ ឆាទយី ជិនោ.

២៧៨. ‘‘តស្សាហំ លក្ខណេ ទិស្វា, បរិបុណ្ណេ សព្យញ្ជនេ;

ពុទ្ធោតិ និដ្ឋំ គន្ត្វាន, សហ សិស្សេហិ បព្ពជិំ.

២៧៩. ‘‘សតេហិ តីហិ សហិតោ, បព្ពជិំ អនគារិយំ;

អទ្ធមាសេ អសម្បត្តេ, សព្ពេ បត្តាម្ហ និព្ពុតិំ.

២៨០. ‘‘ឯកតោ កម្មំ កត្វាន, បុញ្ញក្ខេត្តេ អនុត្តរេ;

ឯកតោ សំសរិត្វាន, ឯកតោ វិនិវត្តយុំ.

២៨១. ‘‘គោបានសិយោ ទត្វាន, បូគធម្មេ វសិំ អហំ;

តេន កម្មេន សុកតេន, អដ្ឋ ហេតូ លភាមហំ.