៩. តិន្ទុកផលទាយកត្ថេរអបទានំ

៥៩. ‘‘កណិការំវ ជោតន្តំ, និសិន្នំ បព្ពតន្តរេ;

អទ្ទសំ វិរជំ ពុទ្ធំ, ឱឃតិណ្ណមនាសវំ.

៦០. ‘‘តិន្ទុកំ សផលំ ទិស្វា, ភិន្ទិត្វាន សកោសកំ [សកោដកំ (សី.), សកោដិកំ (ស្យា.)];

បសន្នចិត្តោ សុមនោ, សយម្ភុស្ស មទាសហំ [វេស្សភុស្ស អទាសហំ (សី.)].

៦១. ‘‘ឯកនវុតិតោ កប្បេ, យំ ផលមទទិំ តទា;

ទុគ្គតិំ នាភិជានាមិ, ផលទានស្សិទំ ផលំ.

៦២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា តិន្ទុកផលទាយកោ ថេរោ ឥមា គាថាយោ អភាសិត្ថាតិ.

តិន្ទុកផលទាយកត្ថេរស្សាបទានំ នវមំ.