៣៥. ឯកបទុមិយវគ្គោ

១. ឯកបទុមិយត្ថេរអបទានំ

១. ‘‘បទុមុត្តរោ នាម ជិនោ, សព្ពធម្មាន បារគូ;

ភវាភវេ វិភាវេន្តោ, តារេសិ ជនតំ ពហុំ.

២. ‘‘ហំសរាជា តទា ហោមិ, ទិជានំ បវរោ អហំ;

ជាតស្សរំ សមោគយ្ហ, កីឡាមិ ហំសកីឡិតំ.

៣. ‘‘បទុមុត្តរោ លោកវិទូ, អាហុតីនំ បដិគ្គហោ;

ជាតស្សរស្ស ឧបរិ, អាគច្ឆិ តាវទេ ជិនោ.

៤. ‘‘ទិស្វានហំ ទេវទេវំ, សយម្ភុំ លោកនាយកំ;

វណ្ដេ ឆេត្វាន បទុមំ, សតបត្តំ មនោរមំ.

៥. ‘‘មុខតុណ្ឌេន បគ្គយ្ហ, បសន្នោ លោកនាយកេ [វិប្បសន្នេន ចេតសា (ស្យា.)];

ឧក្ខិបិត្វាន គគណេ [ឧក្ខិបិត្វា នលាដេន (ក.)], ពុទ្ធសេដ្ឋំ អបូជយិំ.

៦. ‘‘បទុមុត្តរោ លោកវិទូ, អាហុតីនំ បដិគ្គហោ;

អន្តលិក្ខេ ឋិតោ សត្ថា, អកា មេ អនុមោទនំ.

៧. ‘‘‘ឥមិនា ឯកបទុមេន, ចេតនាបណិធីហិ ច;

កប្បានំ សតសហស្សំ, វិនិបាតំ ន គច្ឆសិ’.

៨. ‘‘ឥទំ វត្វាន សម្ពុទ្ធោ, ជលជុត្តមនាមកោ;

មម កម្មំ បកិត្តេត្វា, អគមា យេន បត្ថិតំ.

៩. ‘‘សតសហស្សិតោ កប្បេ, យំ កម្មមករិំ តទា;

ទុគ្គតិំ នាភិជានាមិ, ពុទ្ធបូជាយិទំ ផលំ.

១០. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា ឯកបទុមិយោ ថេរោ ឥមា គាថាយោ អភាសិត្ថាតិ.

ឯកបទុមិយត្ថេរស្សាបទានំ បឋមំ.

២. តីណុប្បលមាលិយត្ថេរអបទានំ

១១. ‘‘ចន្ទភាគានទីតីរេ, អហោសិំ វានរោ តទា;

អទ្ទសំ វិរជំ ពុទ្ធំ, និសិន្នំ បព្ពតន្តរេ.

១២. ‘‘ឱភាសេន្តំ ទិសា សព្ពា, សាលរាជំវ ផុល្លិតំ;

លក្ខណព្យញ្ជនូបេតំ, ទិស្វា អត្តមនោ អហុំ.

១៣. ‘‘ឧទគ្គចិត្តោ សុមនោ, បីតិយា ហដ្ឋមានសោ;

តីណិ ឧប្បលបុប្ផានិ, មត្ថកេ អភិរោបយិំ.

១៤. ‘‘បុប្ផានិ អភិរោបេត្វា, វិបស្សិស្ស មហេសិនោ;

សគារវោ ភវិត្វាន [គមិត្វាន (សី.), នមិត្វាន (ក.)], បក្កាមិំ ឧត្តរាមុខោ.

១៥. ‘‘គច្ឆន្តោ បដិកុដិកោ, វិប្បសន្នេន ចេតសា;

សេលន្តរេ បតិត្វាន [បបតិត្វា (ស្យា. ក.)], បាបុណិំ ជីវិតក្ខយំ.

១៦. ‘‘តេន កម្មេន សុកតេន, ចេតនាបណិធីហិ ច;

ជហិត្វា មានុសំ ទេហំ [បុរិមំ ជាតិំ (?) ឧបរិ ៣៨ វគ្គេ តតិយាបទានេ ឯវមេវ ទិស្សតិ], តាវតិំសមគច្ឆហំ.

១៧. ‘‘សតានំ តីណិក្ខត្តុញ្ច, ទេវរជ្ជំ អការយិំ;

សតានំ បញ្ចក្ខត្តុញ្ច, ចក្កវត្តី អហោសហំ.

១៨. ‘‘ឯកនវុតិតោ កប្បេ, យំ បុប្ផមភិបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

១៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា តីណុប្បលមាលិយោ [តិឧប្បលមាលិយោ (សី.)] ថេរោ ឥមា គាថាយោ អភាសិត្ថាតិ.

តីណុប្បលមាលិយត្ថេរស្សាបទានំ ទុតិយំ.

៣. ធជទាយកត្ថេរអបទានំ

២០. ‘‘តិស្សោ នាម អហុ សត្ថា, លោកជេដ្ឋោ នរាសភោ;

តយោបធិក្ខយេ [តស្សោបធិក្ខយេ (សី.)] ទិស្វា, ធជំ អារោបិតំ មយា.

២១. ‘‘តេន កម្មេន សុកតេន, ចេតនាបណិធីហិ ច;

ជហិត្វា មានុសំ ទេហំ, តាវតិំសមគច្ឆហំ.

២២. ‘‘សតានំ តីណិក្ខត្តុញ្ច, ទេវរជ្ជំ អការយិំ;

សតានំ បញ្ចក្ខត្តុញ្ច, ចក្កវត្តី អហោសហំ.

២៣. ‘‘បទេសរជ្ជំ វិបុលំ, គណនាតោ អសង្ខិយំ;

អនុភោមិ សកំ កម្មំ, បុព្ពេ សុកតមត្តនោ.

២៤. ‘‘ទ្វេនវុតេ ឥតោ កប្បេ, យំ កម្មមករិំ តទា;

ទុគ្គតិំ នាភិជានាមិ, ធជទានស្សិទំ ផលំ.

២៥. ‘‘ឥច្ឆមានោ ចហំ អជ្ជ, សកាននំ សបព្ពតំ;

ខោមទុស្សេន ឆាទេយ្យំ, តទា មយ្ហំ កតេ ផលំ.

២៦. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ធជទាយកោ ថេរោ ឥមា គាថាយោ អភាសិត្ថាតិ.

ធជទាយកត្ថេរស្សាបទានំ តតិយំ.

៤. តិកិង្កណិបូជកត្ថេរអបទានំ

២៧. ‘‘ហិមវន្តស្សាវិទូរេ, ភូតគណោ នាម បព្ពតោ;

តត្ថទ្ទសំ បំសុកូលំ, ទុមគ្គម្ហិ វិលគ្គិតំ.

២៨. ‘‘តីណិ កិង្កណិបុប្ផានិ, ឱចិនិត្វានហំ តទា;

ហដ្ឋោ ហដ្ឋេន ចិត្តេន, បំសុកូលំ អបូជយិំ.

២៩. ‘‘ឯកត្តិំសេ ឥតោ កប្បេ, យំ កម្មមករិំ តទា;

ទុគ្គតិំ នាភិជានាមិ, តិណ្ណំ បុប្ផានិទំ ផលំ.

៣០. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា តិកិង្កណិបូជកោ ថេរោ ឥមា គាថាយោ អភាសិត្ថាតិ.

តិកិង្កណិបូជកត្ថេរស្សាបទានំ ចតុត្ថំ.

៥. នឡាគារិកត្ថេរអបទានំ

៣១. ‘‘ហិមវន្តស្សាវិទូរេ, ហារិតោ នាម បព្ពតោ;

សយម្ភូ នារទោ នាម, រុក្ខមូលេ វសី តទា.

៣២. ‘‘នឡាគារំ ករិត្វាន, តិណេន ឆាទយិំ អហំ;

ចង្កមំ សោធយិត្វាន, សយម្ភុស្ស អទាសហំ.

៣៣. ‘‘ចតុទ្ទសសុ កប្បេសុ, ទេវលោកេ រមិំ អហំ;

ចតុសត្តតិក្ខត្តុញ្ច, ទេវរជ្ជំ អការយិំ.

៣៤. ‘‘ចតុសត្តតិ [សត្តសត្តតិ (សី.)] ក្ខត្តុញ្ច, ចក្កវត្តី អហោសហំ;

បទេសរជ្ជំ វិបុលំ, គណនាតោ អសង្ខិយំ.

៣៥. ‘‘ឧព្ពិទ្ធំ ភវនំ មយ្ហំ, ឥន្ទលដ្ឋីវ ឧគ្គតំ;

សហស្សថម្ភំ អតុលំ, វិមានំ សបភស្សរំ.

៣៦. ‘‘ទ្វេ សម្បត្តី អនុភោត្វា, សុក្កមូលេន ចោទិតោ;

គោតមស្ស ភគវតោ, សាសនេ បព្ពជិំ អហំ.

៣៧. ‘‘បធានបហិតត្តោម្ហិ, ឧបសន្តោ និរូបធិ;

នាគោវ ពន្ធនំ ឆេត្វា, វិហរាមិ អនាសវោ.

៣៨. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា នឡាគារិកោ ថេរោ ឥមា គាថាយោ អភាសិត្ថាតិ.

នឡាគារិកត្ថេរស្សាបទានំ បញ្ចមំ.

៦. ចម្បកបុប្ផិយត្ថេរអបទានំ

៣៩. ‘‘ហិមវន្តស្សាវិទូរេ, ជាបលោ [ចាបលោ (សី.), ឆាបលោ (ស្យា.)] នាម បព្ពតោ;

ពុទ្ធោ សុទស្សនោ នាម, វិហាសិ បព្ពតន្តរេ.

៤០. ‘‘បុប្ផំ ហេមវន្តំ [ហេមវតំ (សី.), ហេមវណ្ណំ (ស្យា.)] គយ្ហ, គច្ឆំ វេហាយសេនហំ;

អទ្ទសំ វិរជំ ពុទ្ធំ, ឱឃតិណ្ណមនាសវំ.

៤១. ‘‘សត្ត ចម្បកបុប្ផានិ, សីសេ កត្វានហំ តទា;

ពុទ្ធស្ស អភិរោបេសិំ, សយម្ភុស្ស មហេសិនោ.

៤២. ‘‘ឯកត្តិំសេ ឥតោ កប្បេ, យំ បុប្ផមភិរោបយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

៤៣. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ចម្បកបុប្ផិយោ ថេរោ ឥមា គាថាយោ អភាសិត្ថាតិ.

ចម្បកបុប្ផិយត្ថេរស្សាបទានំ ឆដ្ឋំ.

៧. បទុមបូជកត្ថេរអបទានំ

៤៤. ‘‘ហិមវន្តស្សាវិទូរេ, រោមសោ នាម បព្ពតោ;

ពុទ្ធោបិ សម្ភវោ នាម, អព្ភោកាសេ វសី តទា.

៤៥. ‘‘ភវនា និក្ខមិត្វាន, បទុមំ ធារយិំ អហំ;

ឯកាហំ ធារយិត្វាន, បុន ភវនុបាគមិំ.

៤៦. ‘‘ឯកនវុតិតោ កប្បេ, យំ បុប្ផមភិរោបយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

៤៧. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បទុមបូជកោ ថេរោ ឥមា គាថាយោ អភាសិត្ថាតិ.

បទុមបូជកត្ថេរស្សាបទានំ សត្តមំ.

តេរសមំ ភាណវារំ.

៨. តិណមុដ្ឋិទាយកត្ថេរអបទានំ

៤៨. ‘‘ហិមវន្តស្សាវិទូរេ, លម្ពកោ នាម បព្ពតោ;

ឧបតិស្សោ នាម សម្ពុទ្ធោ, អព្ភោកាសម្ហិ ចង្កមិ.

៤៩. ‘‘មិគលុទ្ទោ តទា អាសិំ, អរញ្ញេ កាននេ អហំ;

ទិស្វាន តំ ទេវទេវំ, សយម្ភុំ អបរាជិតំ.

៥០. ‘‘វិប្បសន្នេន ចិត្តេន, តទា តស្ស មហេសិនោ;

និសីទនត្ថំ ពុទ្ធស្ស, តិណមុដ្ឋិមទាសហំ.

៥១. ‘‘ទត្វាន ទេវទេវស្ស, ភិយ្យោ ចិត្តំ បសាទយិំ;

សម្ពុទ្ធំ អភិវាទេត្វា, បក្កាមិំ ឧត្តរាមុខោ.

៥២. ‘‘អចិរំ គតមត្តំ មំ, មិគរាជា អបោថយិ [អហេឋយិ (សី. ស្យា.)];

សីហេន បោថិតោ [បាតិតោ (សី. ស្យា.)] សន្តោ, តត្ថ កាលង្កតោ អហំ.

៥៣. ‘‘អាសន្នេ មេ កតំ កម្មំ, ពុទ្ធសេដ្ឋេ អនាសវេ;

សុមុត្តោ សរវេគោវ, ទេវលោកំ អគញ្ឆហំ.

៥៤. ‘‘យូបោ តត្ថ សុភោ អាសិ, បុញ្ញកម្មាភិនិម្មិតោ;

សហស្សកណ្ឌោ សតភេណ្ឌុ, ធជាលុ ហរិតាមយោ.

៥៥. ‘‘បភា និទ្ធាវតេ តស្ស, សតរំសីវ ឧគ្គតោ;

អាកិណ្ណោ ទេវកញ្ញាហិ, អាមោទិំ កាមកាមហំ.

៥៦. ‘‘ទេវលោកា ចវិត្វាន, សុក្កមូលេន ចោទិតោ;

អាគន្ត្វាន មនុស្សត្តំ, បត្តោម្ហិ អាសវក្ខយំ.

៥៧. ‘‘ចតុន្នវុតិតោ កប្បេ, និសីទនមទាសហំ;

ទុគ្គតិំ នាភិជានាមិ, តិណមុដ្ឋិយិទំ ផលំ.

៥៨. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា តិណមុដ្ឋិទាយកោ ថេរោ ឥមា គាថាយោ អភាសិត្ថាតិ.

តិណមុដ្ឋិទាយកត្ថេរស្សាបទានំ អដ្ឋមំ.

៩. តិន្ទុកផលទាយកត្ថេរអបទានំ

៥៩. ‘‘កណិការំវ ជោតន្តំ, និសិន្នំ បព្ពតន្តរេ;

អទ្ទសំ វិរជំ ពុទ្ធំ, ឱឃតិណ្ណមនាសវំ.

៦០. ‘‘តិន្ទុកំ សផលំ ទិស្វា, ភិន្ទិត្វាន សកោសកំ [សកោដកំ (សី.), សកោដិកំ (ស្យា.)];

បសន្នចិត្តោ សុមនោ, សយម្ភុស្ស មទាសហំ [វេស្សភុស្ស អទាសហំ (សី.)].

៦១. ‘‘ឯកនវុតិតោ កប្បេ, យំ ផលមទទិំ តទា;

ទុគ្គតិំ នាភិជានាមិ, ផលទានស្សិទំ ផលំ.

៦២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា តិន្ទុកផលទាយកោ ថេរោ ឥមា គាថាយោ អភាសិត្ថាតិ.

តិន្ទុកផលទាយកត្ថេរស្សាបទានំ នវមំ.

១០. ឯកញ្ជលិយត្ថេរអបទានំ

៦៣. ‘‘រោមសោ [រេវតោ (សី.)] នាម សម្ពុទ្ធោ, នទីកូលេ វសី តទា;

អទ្ទសំ វិរជំ ពុទ្ធំ, បីតរំសិំវ ភាណុមំ.

៦៤. ‘‘ឧក្កាមុខបហដ្ឋំវ, ខទិរង្គារសន្និភំ;

ឱសធិំវ វិរោចន្តំ, ឯកញ្ជលិមកាសហំ.