៣៦. សទ្ទសញ្ញកវគ្គោ

១. សទ្ទសញ្ញកត្ថេរអបទានំ

១. ‘‘មិគលុទ្ទោ បុរេ អាសិំ, អរញ្ញេ កាននេ អហំ;

តត្ថទ្ទសាសិំ សម្ពុទ្ធំ, ទេវសង្ឃបុរក្ខតំ.

២. ‘‘ចតុសច្ចំ បកាសេន្តំ, ឧទ្ធរន្តំ មហាជនំ;

អស្សោសិំ មធុរំ វាចំ, ករវីករុទោបមំ [រុតោបមំ (?)].

៣. ‘‘ព្រហ្មសរស្ស មុនិនោ, សិខិនោ លោកពន្ធុនោ;

ឃោសេ ចិត្តំ បសាទេត្វា, បត្តោម្ហិ អាសវក្ខយំ.

៤. ‘‘ឯកត្តិំសេ ឥតោ កប្បេ, យំ កម្មមករិំ តទា;

ទុគ្គតិំ នាភិជានាមិ, បសាទស្ស ឥទំ ផលំ.

៥. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា សទ្ទសញ្ញកោ ថេរោ ឥមា គាថាយោ អភាសិត្ថាតិ.

សទ្ទសញ្ញកត្ថេរស្សាបទានំ បឋមំ.

២. យវកលាបិយត្ថេរអបទានំ

៦. ‘‘នគរេ អរុណវតិយា, អាសិំ យវសិកោ តទា;

បន្ថេ ទិស្វាន សម្ពុទ្ធំ, យវកលាបំ សន្ថរិំ [យវកលាបមវត្ថរិំ (សី.)].

៧. ‘‘អនុកម្បកោ ការុណិកោ, សិខី លោកគ្គនាយកោ;

មម សង្កប្បមញ្ញាយ, និសីទិ យវសន្ថរេ.

៨. ‘‘ទិស្វា និសិន្នំ វិមលំ, មហាឈាយិំ វិនាយកំ;

បាមោជ្ជំ ជនយិត្វាន, តត្ថ កាលង្កតោ អហំ.

៩. ‘‘ឯកត្តិំសេ ឥតោ កប្បេ, យំ កម្មមករិំ តទា;

ទុគ្គតិំ នាភិជានាមិ, យវត្ថរេ ឥទំ ផលំ.

១០. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា យវកលាបិយោ ថេរោ ឥមា គាថាយោ អភាសិត្ថាតិ.

យវកលាបិយត្ថេរស្សាបទានំ ទុតិយំ.

៣. កិំសុកបូជកត្ថេរអបទានំ

១១. ‘‘កិំសុកំ បុប្ផិតំ ទិស្វា, បគ្គហេត្វាន អញ្ជលិំ;

ពុទ្ធំ សរិត្វា សិទ្ធត្ថំ, អាកាសេ អភិបូជយិំ.

១២. ‘‘ចតុន្នវុតិតោ កប្បេ, យំ បុប្ផមភិបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

១៣. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា កិំសុកបូជកោ ថេរោ ឥមា គាថាយោ អភាសិត្ថាតិ.

កិំសុកបូជកត្ថេរស្សាបទានំ តតិយំ.

៤. សកោសកកោរណ្ឌទាយកត្ថេរអបទានំ

១៤. ‘‘អក្កន្តញ្ច បទំ ទិស្វា, សិខិនោ លោកពន្ធុនោ;

ឯកំសំ អជិនំ កត្វា, បទសេដ្ឋំ អវន្ទហំ.

១៥. ‘‘កោរណ្ឌំ បុប្ផិតំ ទិស្វា, បាទបំ ធរណីរុហំ;

សកោសកំ [សកោដកំ (សី. ស្យា.)] គហេត្វាន, បទចក្កំ អបូជយិំ.

១៦. ‘‘ឯកត្តិំសេ ឥតោ កប្បេ, យំ កម្មមករិំ តទា;

ទុគ្គតិំ នាភិជានាមិ, បទបូជាយិទំ ផលំ.

១៧. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សកោសក [សកោដក (សី. ស្យា.)] កោរណ្ឌទាយកោ ថេរោ ឥមា គាថាយោ អភាសិត្ថាតិ.

សកោសកកោរណ្ឌទាយកត្ថេរស្សាបទានំ ចតុត្ថំ.

៥. ទណ្ឌទាយកត្ថេរអបទានំ

១៨. ‘‘កាននំ វនមោគយ្ហ, វេឡុំ ឆេត្វានហំ តទា;

អាលម្ពនំ ករិត្វាន, សង្ឃស្ស អទទំ អហំ.

១៩. ‘‘តេន ចិត្តប្បសាទេន, សុព្ពតេ អភិវាទិយ;

អាលម្ពនម្បិ ទត្វាន, បក្កាមិំ ឧត្តរាមុខោ.

២០. ‘‘ចតុន្នវុតិតោ កប្បេ, យំ ទណ្ឌមទទិំ តទា;

ទុគ្គតិំ នាភិជានាមិ, ទណ្ឌទានស្សិទំ ផលំ.

២១. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ទណ្ឌទាយកោ ថេរោ ឥមា គាថាយោ អភាសិត្ថាតិ.

ទណ្ឌទាយកត្ថេរស្សាបទានំ បញ្ចមំ.

៦. អម្ពយាគុទាយកត្ថេរអបទានំ

២២. ‘‘សតរំសី នាម សម្ពុទ្ធោ, សយម្ភូ អបរាជិតោ;

វុដ្ឋហិត្វា សមាធិម្ហា, ភិក្ខាយ មមុបាគមិ.

២៣. ‘‘បច្ចេកពុទ្ធំ ទិស្វាន, អម្ពយាគុំ អទាសហំ;

វិប្បសន្នមនំ តស្ស, វិប្បសន្នេន ចេតសា.

២៤. ‘‘ចតុន្នវុតិតោ កប្បេ, យំ កម្មមករិំ តទា;

ទុគ្គតិំ នាភិជានាមិ, អម្ពយាគុយិទំ ផលំ.

២៥. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា អម្ពយាគុទាយកោ ថេរោ ឥមា គាថាយោ អភាសិត្ថាតិ.

អម្ពយាគុទាយកត្ថេរស្សាបទានំ ឆដ្ឋំ.

៧. សុបុដកបូជកត្ថេរអបទានំ

២៦. ‘‘ទិវាវិហារា និក្ខន្តោ, វិបស្សី លោកនាយកោ;

ភិក្ខាយ វិចរន្តោ សោ, មម សន្តិកុបាគមិ.

២៧. ‘‘តតោ បតីតោ សុមនោ, ពុទ្ធសេដ្ឋស្ស តាទិនោ;

លោណសុបុដកំ ទត្វា, កប្បំ សគ្គម្ហិ មោទហំ.

២៨. ‘‘ឯកនវុតិតោ កប្បេ, យំ បុដកមទាសហំ;

ទុគ្គតិំ នាភិជានាមិ, បុដកស្ស ឥទំ ផលំ.

២៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សុបុដកបូជកោ ថេរោ ឥមា គាថាយោ អភាសិត្ថាតិ.

សុបុដកបូជកត្ថេរស្សាបទានំ សត្តមំ.

៨. មញ្ចទាយកត្ថេរអបទានំ

៣០. ‘‘វិបស្សិនោ ភគវតោ, លោកជេដ្ឋស្ស តាទិនោ;

ឯកំ មញ្ចំ មយា ទិន្នំ, បសន្នេន សបាណិនា.

៣១. ‘‘ហត្ថិយានំ អស្សយានំ, ទិព្ពយានំ សមជ្ឈគំ;

តេន មញ្ចកទានេន, បត្តោម្ហិ អាសវក្ខយំ.

៣២. ‘‘ឯកនវុតិតោ កប្បេ, យំ មញ្ចមទទិំ តទា;

ទុគ្គតិំ នាភិជានាមិ, មញ្ចទានស្សិទំ ផលំ.

៣៣. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា មញ្ចទាយកោ ថេរោ ឥមា គាថាយោ អភាសិត្ថាតិ.

មញ្ចទាយកត្ថេរស្សាបទានំ អដ្ឋមំ.

៩. សរណគមនិយត្ថេរអបទានំ

៣៤. ‘‘អារុហិម្ហ តទា នាវំ, ភិក្ខុ ចាជីវកោ ចហំ;

នាវាយ ភិជ្ជមានាយ, ភិក្ខុ មេ សរណំ អទា.

៣៥. ‘‘ឯកត្តិំសេ ឥតោ កប្បេ, យញ្ច មេ សរណំ អទា;

ទុគ្គតិំ នាភិជានាមិ, សរណាគមនេ ផលំ.

៣៦. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សរណគមនិយោ ថេរោ ឥមា គាថាយោ អភាសិត្ថាតិ.

សរណគមនិយត្ថេរស្សាបទានំ នវមំ.

១០. បិណ្ឌបាតិកត្ថេរអបទានំ

៣៧. ‘‘តិស្សោ នាមាសិ សម្ពុទ្ធោ, វិហាសិ វិបិនេ តទា;

តុសិតា ហិ ឥធាគន្ត្វា, បិណ្ឌបាតំ អទាសហំ.

៣៨. ‘‘សម្ពុទ្ធមភិវាទេត្វា, តិស្សំ នាម មហាយសំ;

សកំ ចិត្តំ បសាទេត្វា, តុសិតំ អគមាសហំ.

៣៩. ‘‘ទ្វេនវុតេ ឥតោ កប្បេ, យំ ទានមទទិំ តទា;

ទុគ្គតិំ នាភិជានាមិ, បិណ្ឌបាតស្សិទំ ផលំ.

៤០. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បិណ្ឌបាតិកោ ថេរោ ឥមា គាថាយោ អភាសិត្ថាតិ.

បិណ្ឌបាតិកត្ថេរស្សាបទានំ ទសមំ.

សទ្ទសញ្ញកវគ្គោ ឆត្តិំសតិមោ.