៣៧. មន្ទារវបុប្ផិយវគ្គោ

១. មន្ទារវបុប្ផិយត្ថេរអបទានំ

១. ‘‘តាវតិំសា ឥធាគន្ត្វា, មង្គលោ នាម មាណវោ;

មន្ទារវំ គហេត្វាន, វិបស្សិស្ស មហេសិនោ.

២. ‘‘សមាធិនា និសិន្នស្ស, មត្ថកេ ធារយិំ អហំ;

សត្តាហំ ធារយិត្វាន, ទេវលោកំ បុនាគមិំ.

៣. ‘‘ឯកនវុតិតោ កប្បេ, យំ បុប្ផមភិបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

៤. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា មន្ទារវបុប្ផិយោ ថេរោ ឥមា គាថាយោ អភាសិត្ថាតិ.

មន្ទារវបុប្ផិយត្ថេរស្សាបទានំ បឋមំ.

២. កក្ការុបុប្ផិយត្ថេរអបទានំ

៥. ‘‘យាមា ទេវា ឥធាគន្ត្វា, គោតមំ សិរិវច្ឆសំ;

កក្ការុមាលំ [គោក្ខនុមាលំ (សី.)] បគ្គយ្ហ, ពុទ្ធស្ស អភិរោបយិំ.

៦. ‘‘ទ្វេនវុតេ ឥតោ កប្បេ, យំ ពុទ្ធមភិបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

៧. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា កក្ការុបុប្ផិយោ [គោក្ខនុបុប្ផិយោ (ក.)] ថេរោ ឥមា គាថាយោ អភាសិត្ថាតិ.

កក្ការុបុប្ផិយត្ថេរស្សាបទានំ ទុតិយំ.

៣. ភិសមុឡាលទាយកត្ថេរអបទានំ

៨. ‘‘ផុស្សោ នាមាសិ សម្ពុទ្ធោ, សព្ពធម្មាន បារគូ;

វិវេកកាមោ សព្ពញ្ញូ [សប្បញ្ញោ (សី. ស្យា.)], អាគញ្ឆិ មម សន្តិកេ.

៩. ‘‘តស្មិំ ចិត្តំ បសាទេត្វា, មហាការុណិកេ ជិនេ;

ភិសមុឡាលំ បគ្គយ្ហ, ពុទ្ធសេដ្ឋស្សទាសហំ.

១០. ‘‘ទ្វេនវុតេ ឥតោ កប្បេ, យំ ភិសមទទិំ តទា;

ទុគ្គតិំ នាភិជានាមិ, ភិសទានស្សិទំ ផលំ.

១១. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ភិសមុឡាលទាយកោ ថេរោ ឥមា គាថាយោ អភាសិត្ថាតិ.

ភិសមុឡាលទាយកត្ថេរស្សាបទានំ តតិយំ.

៤. កេសរបុប្ផិយត្ថេរអបទានំ

១២. ‘‘វិជ្ជាធរោ តទា អាសិំ, ហិមវន្តម្ហិ បព្ពតេ;

អទ្ទសំ វិរជំ ពុទ្ធំ, ចង្កមន្តំ មហាយសំ.

១៣. ‘‘តីណិ កេសរបុប្ផានិ [កេសរិបុប្ផានិ (សី.)], សីសេ កត្វានហំ តទា;

ឧបសង្កម្ម សម្ពុទ្ធំ, វេស្សភុំ អភិបូជយិំ.

១៤. ‘‘ឯកត្តិំសេ ឥតោ កប្បេ, យំ កម្មមករិំ តទា;

ទុគ្គតិំ នាភិជានាមិ, ពុទ្ធបូជាយិទំ ផលំ.

១៥. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា កេសរបុប្ផិយោ ថេរោ ឥមា គាថាយោ អភាសិត្ថាតិ.

កេសរបុប្ផិយត្ថេរស្សាបទានំ ចតុត្ថំ.

៥. អង្កោលបុប្ផិយត្ថេរអបទានំ

១៦. ‘‘បទុមោ នាម សម្ពុទ្ធោ, ចិត្តកូដេ វសី តទា;

ទិស្វាន តំ អហំ ពុទ្ធំ, សយម្ភុំ អបរាជិតំ [ឧបគច្ឆិហំ (សី. ស្យា.)].

១៧. ‘‘អង្កោលំ បុប្ផិតំ ទិស្វា, ឱចិនិត្វានហំ តទា;

ឧបគន្ត្វាន សម្ពុទ្ធំ, បូជយិំ បទុមំ ជិនំ.

១៨. ‘‘ឯកត្តិំសេ ឥតោ កប្បេ, យំ បុប្ផមភិបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

១៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា អង្កោលបុប្ផិយោ ថេរោ ឥមា គាថាយោ អភាសិត្ថាតិ.

អង្កោលបុប្ផិយត្ថេរស្សាបទានំ បញ្ចមំ.

៦. កទម្ពបុប្ផិយត្ថេរអបទានំ

២០. ‘‘សុវណ្ណវណ្ណំ សម្ពុទ្ធំ, គច្ឆន្តំ អន្តរាបណេ;

កញ្ចនគ្ឃិយសង្កាសំ, ពាត្តិំសវរលក្ខណំ.

២១. ‘‘និសជ្ជ បាសាទវរេ, អទ្ទសំ លោកនាយកំ;

កទម្ពបុប្ផំ បគ្គយ្ហ, វិបស្សិំ អភិបូជយិំ.

២២. ‘‘ឯកនវុតិតោ កប្បេ, យំ ពុទ្ធមភិបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

២៣. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា កទម្ពបុប្ផិយោ ថេរោ ឥមា គាថាយោ អភាសិត្ថាតិ.

កទម្ពបុប្ផិយត្ថេរស្សាបទានំ ឆដ្ឋំ.

៧. ឧទ្ទាលកបុប្ផិយត្ថេរអបទានំ

២៤. ‘‘អនោមោ [សុជាតោ (ស្យា.), អនុមោ (ក.)] នាម សម្ពុទ្ធោ, គង្គាកូលេ វសី តទា;

ឧទ្ទាលកំ គហេត្វាន, បូជយិំ អបរាជិតំ.

២៥. ‘‘ឯកត្តិំសេ ឥតោ កប្បេ, យំ បុប្ផមភិបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

២៦. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ឧទ្ទាលកបុប្ផិយោ ថេរោ ឥមា គាថាយោ អភាសិត្ថាតិ.

ឧទ្ទាលកបុប្ផិយត្ថេរស្សាបទានំ សត្តមំ.

៨. ឯកចម្បកបុប្ផិយត្ថេរអបទានំ

២៧. ‘‘ឧបសន្តោ ច សម្ពុទ្ធោ, វសតី បព្ពតន្តរេ;

ឯកចម្បកមាទាយ, ឧបគច្ឆិំ នរុត្តមំ.

២៨. ‘‘បសន្នចិត្តោ សុមនោ, បច្ចេកមុនិមុត្តមំ;

ឧភោហត្ថេហិ បគ្គយ្ហ, បូជយិំ អបរាជិតំ.

២៩. ‘‘បញ្ចសដ្ឋិម្ហិតោ កប្បេ, យំ បុប្ផមភិបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

៣០. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ឯកចម្បកបុប្ផិយោ ថេរោ ឥមា គាថាយោ អភាសិត្ថាតិ.

ឯកចម្បកបុប្ផិយត្ថេរស្សាបទានំ អដ្ឋមំ.

៩. តិមិរបុប្ផិយត្ថេរអបទានំ

៣១. ‘‘ចន្ទភាគានទីតីរេ, អនុសោតំ វជាមហំ;

អទ្ទសំ វិរជំ ពុទ្ធំ, សាលរាជំវ ផុល្លិតំ.

៣២. ‘‘បសន្នចិត្តោ សុមនោ, បច្ចេកមុនិមុត្តមំ;

គហេត្វា តិមិរំ បុប្ផំ, មត្ថកេ ឱកិរិំ អហំ.

៣៣. ‘‘ឯកនវុតិតោ កប្បេ, យំ បុប្ផមភិបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

៣៤. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា តិមិរបុប្ផិយោ ថេរោ ឥមា គាថាយោ អភាសិត្ថាតិ.

តិមិរបុប្ផិយត្ថេរស្សាបទានំ នវមំ.

១០. សឡលបុប្ផិយត្ថេរអបទានំ

៣៥. ‘‘ចន្ទភាគានទីតីរេ, អហោសិំ កិន្នរោ តទា;

តត្ថទ្ទសំ ទេវទេវំ, ចង្កមន្តំ នរាសភំ.

៣៦. ‘‘ឱចិនិត្វាន សឡលំ, បុប្ផំ ពុទ្ធស្សទាសហំ;

ឧបសិង្ឃិ មហាវីរោ, សឡលំ ទេវគន្ធិកំ.

៣៧. ‘‘បដិគ្គហេត្វា សម្ពុទ្ធោ, វិបស្សី លោកនាយកោ;

ឧបសិង្ឃិ មហាវីរោ, បេក្ខមានស្ស មេ សតោ.

៣៨. ‘‘បសន្នចិត្តោ សុមនោ, វន្ទិត្វា ទ្វិបទុត្តមំ;

អញ្ជលិំ បគ្គហេត្វាន, បុន បព្ពតមារុហិំ.

៣៩. ‘‘ឯកនវុតិតោ កប្បេ, យំ បុប្ផមភិបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

៤០. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សឡលបុប្ផិយោ ថេរោ ឥមា គាថាយោ អភាសិត្ថាតិ.

សឡលបុប្ផិយត្ថេរស្សាបទានំ ទសមំ.

មន្ទារវបុប្ផិយវគ្គោ សត្តតិំសតិមោ.