៣៨. ពោធិវន្ទនវគ្គោ

១. ពោធិវន្ទកត្ថេរអបទានំ

១. ‘‘បាដលិំ ហរិតំ ទិស្វា, បាទបំ ធរណីរុហំ;

ឯកំសំ អញ្ជលិំ កត្វា, អវន្ទិំ បាដលិំ អហំ.

២. ‘‘អញ្ជលិំ បគ្គហេត្វាន, គរុំ កត្វាន មានសំ;

អន្តោសុទ្ធំ ពហិសុទ្ធំ, សុវិមុត្តមនាសវំ.

៣. ‘‘វិបស្សិំ លោកមហិតំ, ករុណាញាណសាគរំ;

សម្មុខា វិយ សម្ពុទ្ធំ, អវន្ទិំ បាដលិំ អហំ.

៤. ‘‘ឯកនវុតិតោ កប្បេ, យំ ពោធិមភិវន្ទហំ;

ទុគ្គតិំ នាភិជានាមិ, វន្ទនាយ ឥទំ ផលំ.

៥. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា ពោធិវន្ទកោ ថេរោ ឥមា គាថាយោ អភាសិត្ថាតិ.

ពោធិវន្ទកត្ថេរស្សាបទានំ បឋមំ.

២. បាដលិបុប្ផិយត្ថេរអបទានំ

៦. ‘‘វិបស្សី នាម ភគវា, សយម្ភូ អគ្គបុគ្គលោ;

បុរក្ខតោ សសិស្សេហិ, បាវិសិ ពន្ធុមំ ជិនោ.

៧. ‘‘តីណិ បាដលិបុប្ផានិ, ឧច្ឆង្គេ ឋបិតានិ មេ;

សីសំ ន្ហាយិតុកាមោវ, នទីតិត្ថំ អគច្ឆហំ.

៨. ‘‘និក្ខម្ម ពន្ធុមតិយា, អទ្ទសំ លោកនាយកំ;

ឥន្ទីវរំវ ជលិតំ, អាទិត្តំវ ហុតាសនំ.

៩. ‘‘ព្យគ្ឃូសភំវ បវរំ, អភិជាតំវ កេសរិំ;

គច្ឆន្តំ សមណានគ្គំ, ភិក្ខុសង្ឃបុរក្ខតំ.

១០. ‘‘តស្មិំ បសន្នោ [សមណេ (ក.)] សុគតេ, កិលេសមលធោវនេ;

គហេត្វា តីណិ បុប្ផានិ, ពុទ្ធសេដ្ឋំ អបូជយិំ.

១១. ‘‘ឯកនវុតិតោ កប្បេ, យំ បុប្ផមភិបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

១២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បាដលិបុប្ផិយោ ថេរោ ឥមា គាថាយោ អភាសិត្ថាតិ.

បាដលិបុប្ផិយត្ថេរស្សាបទានំ ទុតិយំ.

៣. តីណុប្បលមាលិយត្ថេរអបទានំ

១៣. ‘‘ចន្ទភាគានទីតីរេ, អហោសិំ វានរោ តទា;

អទ្ទសំ វិរជំ ពុទ្ធំ, និសិន្នំ បព្ពតន្តរេ.

១៤. ‘‘ឱភាសេន្តំ ទិសា សព្ពា, សាលរាជំវ ផុល្លិតំ;

លក្ខណព្យញ្ជនូបេតំ, ទិស្វានត្តមនោ អហំ.

១៥. ‘‘ឧទគ្គចិត្តោ សុមនោ, បីតិយា ហដ្ឋមានសោ;

តីណិ ឧប្បលបុប្ផានិ, មត្ថកេ អភិរោបយិំ.

១៦. ‘‘បូជយិត្វាន បុប្ផានិ, ផុស្សស្សាហំ មហេសិនោ;

សគារវោ ភវិត្វាន, បក្កាមិំ ឧត្តរាមុខោ.

១៧. ‘‘គច្ឆន្តោ បដិកុដិកោ, វិប្បសន្នេន ចេតសា;

សេលន្តរេ បតិត្វាន, បាបុណិំ ជីវិតក្ខយំ.

១៨. ‘‘តេន កម្មេន សុកតេន, ចេតនាបណិធីហិ ច;

ជហិត្វា បុរិមំ ជាតិំ, តាវតិំសមគច្ឆហំ.

១៩. ‘‘សតានំ តីណិក្ខត្តុញ្ច, ទេវរជ្ជមការយិំ;

សតានំ បញ្ចក្ខត្តុញ្ច, ចក្កវត្តី អហោសហំ.

២០. ‘‘ទ្វេនវុតេ ឥតោ កប្បេ, យំ បុប្ផមភិបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

២១. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា តីណុប្បលមាលិយោ ថេរោ ឥមា គាថាយោ អភាសិត្ថាតិ.

តីណុប្បលមាលិយត្ថេរស្សាបទានំ តតិយំ.

៤. បដ្ដិបុប្ផិយត្ថេរអបទានំ

២២. ‘‘យទា និព្ពាយិ សម្ពុទ្ធោ, មហេសី បទុមុត្តរោ;

សមាគម្ម ជនា សព្ពេ, សរីរំ នីហរន្តិ តេ.

២៣. ‘‘នីហរន្តេ សរីរម្ហិ, វជ្ជមានាសុ ភេរិសុ;

បសន្នចិត្តោ សុមនោ, បដ្ដិបុប្ផំ អបូជយិំ.

២៤. ‘‘សតសហស្សិតោ កប្បេ, យំ បុប្ផមភិបូជយិំ;

ទុគ្គតិំ នាភិជានាមិ, សរីរបូជិតេ ផលំ.

២៥. ‘‘កិលេសា ឈាបិតា មយ្ហំ, ភវា សព្ពេ សមូហតា;

នាគោវ ពន្ធនំ ឆេត្វា, វិហរាមិ អនាសវោ.

២៦. ‘‘ស្វាគតំ វត មេ អាសិ, មម ពុទ្ធស្ស [ពុទ្ធសេដ្ឋស្ស (សី.)] សន្តិកេ;

តិស្សោ វិជ្ជា អនុប្បត្តា, កតំ ពុទ្ធស្ស សាសនំ.

២៧. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បដ្ដិបុប្ផិយោ ថេរោ ឥមា គាថាយោ អភាសិត្ថាតិ.

បដ្ដិបុប្ផិយត្ថេរស្សាបទានំ ចតុត្ថំ.

៥. សត្តបណ្ណិយត្ថេរអបទានំ

២៨. ‘‘សុមនោ នាម សម្ពុទ្ធោ, ឧប្បជ្ជិ លោកនាយកោ;

បសន្នចិត្តោ សុមនោ, សត្តបណ្ណិមបូជយិំ.

២៩. ‘‘សតសហស្សិតោ កប្បេ, សត្តបណ្ណិមបូជយិំ;

ទុគ្គតិំ នាភិជានាមិ, សត្តបណ្ណិបូជាយិទំ [សត្តបណ្ណិស្សិទំ (សី.)] ផលំ.

៣០. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៣១. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៣២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សត្តបណ្ណិយោ ថេរោ ឥមា គាថាយោ អភាសិត្ថាតិ.

សត្តបណ្ណិយត្ថេរស្សាបទានំ បញ្ចមំ.

៦. គន្ធមុដ្ឋិយត្ថេរអបទានំ

៣៣. [ឥធ គាថាទ្ធំ ឩនំ វិយ ទិស្សតិ] ‘‘ចិតកេ ករីយមានេ, នានាគន្ធេ សមាហតេ;

បសន្នចិត្តោ សុមនោ, គន្ធមុដ្ឋិមបូជយិំ.

៣៤. ‘‘សតសហស្សិតោ កប្បេ, ចិតកំ យំ អបូជយិំ;

ទុគ្គតិំ នាភិជានាមិ, ចិតបូជាយិទំ ផលំ.

៣៥. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៣៦. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៣៧. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា គន្ធមុដ្ឋិយោ ថេរោ ឥមា គាថាយោ អភាសិត្ថាតិ.

គន្ធមុដ្ឋិយត្ថេរស្សាបទានំ ឆដ្ឋំ.

៧. ចិតកបូជកត្ថេរអបទានំ

៣៨. ‘‘បរិនិព្ពុតេ ភគវតិ, ជលជុត្តមនាមកេ;

អារោបិតម្ហិ ចិតកេ, សាលបុប្ផមបូជយិំ.

៣៩. ‘‘សតសហស្សិតោ កប្បេ, យំ បុប្ផមភិបូជយិំ;

ទុគ្គតិំ នាភិជានាមិ, ចិតបូជាយិទំ ផលំ.

៤០. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៤១. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៤២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ចិតកបូជកោ ថេរោ ឥមា គាថាយោ អភាសិត្ថាតិ.

ចិតកបូជកត្ថេរស្សាបទានំ សត្តមំ.

៨. សុមនតាលវណ្ដិយត្ថេរអបទានំ

៤៣. ‘‘សិទ្ធត្ថស្ស ភគវតោ, តាលវណ្ដមទាសហំ;

សុមនេហិ បដិច្ឆន្នំ, ធារយាមិ មហារហំ.

៤៤. ‘‘ចតុន្នវុតិតោ កប្បេ, តាលវណ្ដមទាសហំ;

ទុគ្គតិំ នាភិជានាមិ, តាលវណ្ដស្សិទំ ផលំ.

៤៥. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៤៦. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៤៧. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សុមនតាលវណ្ដិយោ ថេរោ ឥមា គាថាយោ អភាសិត្ថាតិ.

សុមនតាលវណ្ដិយត្ថេរស្សាបទានំ អដ្ឋមំ.

៩. សុមនទាមិយត្ថេរអបទានំ

៤៨. ‘‘សិទ្ធត្ថស្ស ភគវតោ, ន្ហាតកស្ស តបស្សិនោ;

កត្វាន សុមនទាមំ, ធារយិំ បុរតោ ឋិតោ.

៤៩. ‘‘ចតុន្នវុតិតោ កប្បេ, យំ ទាមំ ធារយិំ តទា;

ទុគ្គតិំ នាភិជានាមិ, សុមនធារណេ ផលំ.

៥០. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៥១. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៥២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សុមនទាមិយោ ថេរោ ឥមា គាថាយោ អភាសិត្ថាតិ.

សុមនទាមិយត្ថេរស្សាបទានំ នវមំ.

១០. កាសុមារិផលទាយកត្ថេរអបទានំ

៥៣. ‘‘កណិការំវ ជោតន្តំ, និសិន្នំ បព្ពតន្តរេ;

អទ្ទសំ វិរជំ ពុទ្ធំ, លោកជេដ្ឋំ នរាសភំ.

៥៤. ‘‘បសន្នចិត្តោ សុមនោ, សិរេ កត្វាន អញ្ជលិំ;

កាសុមារិផលំ គយ្ហ, ពុទ្ធសេដ្ឋស្សទាសហំ.

៥៥. ‘‘ឯកត្តិំសេ ឥតោ កប្បេ, យំ ផលមទទិំ អហំ;

ទុគ្គតិំ នាភិជានាមិ, ផលទានស្សិទំ ផលំ.

៥៦. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៥៧. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៥៨. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា កាសុមារិផលទាយកោ ថេរោ ឥមា គាថាយោ អភាសិត្ថាតិ.

កាសុមារិផលទាយកត្ថេរស្សាបទានំ ទសមំ.

ពោធិវន្ទនវគ្គោ អដ្ឋតិំសតិមោ.