៦. ចម្បកបុប្ផិយត្ថេរអបទានំ

៣៩. ‘‘ហិមវន្តស្សាវិទូរេ, ជាបលោ [ចាបលោ (សី.), ឆាបលោ (ស្យា.)] នាម បព្ពតោ;

ពុទ្ធោ សុទស្សនោ នាម, វិហាសិ បព្ពតន្តរេ.

៤០. ‘‘បុប្ផំ ហេមវន្តំ [ហេមវតំ (សី.), ហេមវណ្ណំ (ស្យា.)] គយ្ហ, គច្ឆំ វេហាយសេនហំ;

អទ្ទសំ វិរជំ ពុទ្ធំ, ឱឃតិណ្ណមនាសវំ.

៤១. ‘‘សត្ត ចម្បកបុប្ផានិ, សីសេ កត្វានហំ តទា;

ពុទ្ធស្ស អភិរោបេសិំ, សយម្ភុស្ស មហេសិនោ.

៤២. ‘‘ឯកត្តិំសេ ឥតោ កប្បេ, យំ បុប្ផមភិរោបយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

៤៣. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ចម្បកបុប្ផិយោ ថេរោ ឥមា គាថាយោ អភាសិត្ថាតិ.

ចម្បកបុប្ផិយត្ថេរស្សាបទានំ ឆដ្ឋំ.