៣. ធជទាយកត្ថេរអបទានំ

២០. ‘‘តិស្សោ នាម អហុ សត្ថា, លោកជេដ្ឋោ នរាសភោ;

តយោបធិក្ខយេ [តស្សោបធិក្ខយេ (សី.)] ទិស្វា, ធជំ អារោបិតំ មយា.

២១. ‘‘តេន កម្មេន សុកតេន, ចេតនាបណិធីហិ ច;

ជហិត្វា មានុសំ ទេហំ, តាវតិំសមគច្ឆហំ.

២២. ‘‘សតានំ តីណិក្ខត្តុញ្ច, ទេវរជ្ជំ អការយិំ;

សតានំ បញ្ចក្ខត្តុញ្ច, ចក្កវត្តី អហោសហំ.

២៣. ‘‘បទេសរជ្ជំ វិបុលំ, គណនាតោ អសង្ខិយំ;

អនុភោមិ សកំ កម្មំ, បុព្ពេ សុកតមត្តនោ.

២៤. ‘‘ទ្វេនវុតេ ឥតោ កប្បេ, យំ កម្មមករិំ តទា;

ទុគ្គតិំ នាភិជានាមិ, ធជទានស្សិទំ ផលំ.

២៥. ‘‘ឥច្ឆមានោ ចហំ អជ្ជ, សកាននំ សបព្ពតំ;

ខោមទុស្សេន ឆាទេយ្យំ, តទា មយ្ហំ កតេ ផលំ.

២៦. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ធជទាយកោ ថេរោ ឥមា គាថាយោ អភាសិត្ថាតិ.

ធជទាយកត្ថេរស្សាបទានំ តតិយំ.