៤. តិកិង្កណិបូជកត្ថេរអបទានំ

២៧. ‘‘ហិមវន្តស្សាវិទូរេ, ភូតគណោ នាម បព្ពតោ;

តត្ថទ្ទសំ បំសុកូលំ, ទុមគ្គម្ហិ វិលគ្គិតំ.

២៨. ‘‘តីណិ កិង្កណិបុប្ផានិ, ឱចិនិត្វានហំ តទា;

ហដ្ឋោ ហដ្ឋេន ចិត្តេន, បំសុកូលំ អបូជយិំ.

២៩. ‘‘ឯកត្តិំសេ ឥតោ កប្បេ, យំ កម្មមករិំ តទា;

ទុគ្គតិំ នាភិជានាមិ, តិណ្ណំ បុប្ផានិទំ ផលំ.

៣០. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា តិកិង្កណិបូជកោ ថេរោ ឥមា គាថាយោ អភាសិត្ថាតិ.

តិកិង្កណិបូជកត្ថេរស្សាបទានំ ចតុត្ថំ.