៩. ធម្មសវនិយត្ថេរអបទានំ

១១១. ‘‘បទុមុត្តរោ នាម ជិនោ, សព្ពធម្មាន បារគូ;

ចតុសច្ចំ បកាសេន្តោ, សន្តារេសិ ពហុំ ជនំ.

១១២. ‘‘អហំ តេន សមយេន, ជដិលោ ឧគ្គតាបនោ;

ធុនន្តោ វាកចីរានិ, គច្ឆាមិ អម្ពរេ តទា.

១១៣. ‘‘ពុទ្ធសេដ្ឋស្ស ឧបរិ, គន្តុំ ន វិសហាមហំ;

បក្ខីវ សេលមាសជ្ជ [សេលមាបជ្ជ (ស្យា.)], គមនំ ន លភាមហំ.

១១៤. ‘‘ន មេ ឥទំ ភូតបុព្ពំ, ឥរិយស្ស វិកោបនំ;

ទកេ យថា ឧម្មុជ្ជិត្វា, ឯវំ គច្ឆាមិ អម្ពរេ.

១១៥. ‘‘ឧឡារភូតោ មនុជោ, ហេដ្ឋាសីនោ [ហេដ្ឋាបិ នោ (ក.)] ភវិស្សតិ;

ហន្ទ មេនំ គវេសិស្សំ, អបិ អត្ថំ លភេយ្យហំ.

១១៦. ‘‘ឱរោហន្តោ អន្តលិក្ខា, សទ្ទមស្សោសិ សត្ថុនោ;

អនិច្ចតំ កថេន្តស្ស, តមហំ ឧគ្គហិំ តទា.

១១៧. ‘‘អនិច្ចសញ្ញមុគ្គយ្ហ, អគមាសិំ មមស្សមំ;

យាវតាយុំ វសិត្វាន, តត្ថ កាលង្កតោ អហំ.

១១៨. ‘‘ចរិមេ វត្តមានម្ហិ, តំ ធម្មសវនំ [ធម្មសវណំ (សី.)] សរិំ;

តេន កម្មេន សុកតេន, តាវតិំសមគច្ឆហំ.

១១៩. ‘‘តិំសកប្បសហស្សានិ, ទេវលោកេ រមិំ អហំ;

ឯកបញ្ញាសក្ខត្តុញ្ច, ទេវរជ្ជមការយិំ.

១២០. ‘‘ឯកសត្តតិក្ខត្តុញ្ច, ចក្កវត្តី អហោសហំ;

បទេសរជ្ជំ វិបុលំ, គណនាតោ អសង្ខិយំ.

១២១. ‘‘បិតុគេហេ និសីទិត្វា, សមណោ ភាវិតិន្ទ្រិយោ;

គាថាយ បរិទីបេន្តោ, អនិច្ចតមុទាហរិ [អនិច្ចវត្ថុទាហរិ (ស្យា. ក.)].

១២២. ‘‘អនុស្សរាមិ តំ សញ្ញំ, សំសរន្តោ ភវាភវេ;

ន កោដិំ បដិវិជ្ឈាមិ [ន កោចិ បដិវជ្ជាមិ (ក.)], និព្ពានំ អច្ចុតំ បទំ [អយំ គាថា ឧបរិ ៤៣ វគ្គេ សត្តមាបទានេ បុរិមគាថាយ បុរេតរំ ទិស្សតិ].

១២៣. ‘‘អនិច្ចា វត សង្ខារា, ឧប្បាទវយធម្មិនោ;

ឧប្បជ្ជិត្វា និរុជ្ឈន្តិ, តេសំ វូបសមោ សុខោ.

១២៤. ‘‘សហ គាថំ សុណិត្វាន, បុព្ពកម្មំ អនុស្សរិំ;

ឯកាសនេ និសីទិត្វា, អរហត្តមបាបុណិំ.

១២៥. ‘‘ជាតិយា សត្តវស្សោហំ, អរហត្តមបាបុណិំ;

ឧបសម្បាទយិ ពុទ្ធោ, គុណមញ្ញាយ ចក្ខុមា.

១២៦. ‘‘ទារកោវ អហំ សន្តោ, ករណីយំ សមាបយិំ;

កិំ មេ ករណីយំ អជ្ជ, សក្យបុត្តស្ស សាសនេ.

១២៧. ‘‘សតសហស្សិតោ កប្បេ, យំ កម្មមករិំ តទា;

ទុគ្គតិំ នាភិជានាមិ, សទ្ធម្មសវនេ ផលំ.

១២៨. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ធម្មសវនិយោ ថេរោ ឥមា គាថាយោ អភាសិត្ថាតិ.

ធម្មសវនិយត្ថេរស្សាបទានំ នវមំ.